Jezu Krishti sjell gëzim

Ju u krijuat që të keni lumturi e gëzim. Ai është qëllimi i jetës suaj. Është qëllimi i planit të Atit Qiellor për lumturinë. Kjo nuk do të thotë se nuk do të jeni kurrë të trishtuar ose nuk do të keni kohë të vështira. Por do të thotë që Shpëtimtari mund t’ju ndihmojë që t’i kaloni kohët e vështira dhe të gjeni gëzim.

Gëzimi nuk vjen nga rrethanat tuaja; vjen nga ndjekja e Jezu Krishtit. Mund të kaloni një ditë të keqe, një javë të keqe ose një vit të keq. Por gëzimi nuk është mungesa e hidhërimit në jetën tuaj; është prania e Krishtit në jetën tuaj.

Gëzimi i Shpëtimtarit është më i madh dhe më afatgjatë sesa çdo gjë tjetër. Satani do t’ju tundojë të kërkoni argëtim dhe kënaqësi në mënyra egoiste ose nga kënaqësitë e botës. Gjithçka që është në kundërshtim me Jezu Krishtin dhe urdhërimet e Tij, nuk mund t’ju sjellë gëzim dhe lumturi të vërtetë dhe afatgjatë. Mbajeni mend se gjërat e kësaj toke janë të përkohshme. Ungjilli i Jezu Krishtit ofron gëzim e lumturi që janë të thella, të shenjta dhe të përhershme.

Zgjidhni gëzim. Megjithëse është e vërtetë që ka trishtim dhe vështirësi në këtë botë, Ati Qiellor gjithashtu e ka mbushur botën me shumë gjëra të bukura dhe të shëndetshme. Kërkojini ato. Përpiquni të vini re arsyet për t’u gëzuar çdo ditë, ndoshta edhe t’i shkruani ato. Këto janë dhurata nga Ati juaj i dashur në Qiell.

Silluni gëzim dhe lumturi të tjerëve. Jezu Krishti gjeti plotësi të gëzimit duke na sjellë ne gëzim. Ju mund ta ndiqni shembullin e Tij duke gjetur gëzim e lumturi tek u shërbeni të tjerëve. Ndihmojeni dikë të ndiejë se e duan. Bëni një përgëzim të sinqertë. Jepini zemër dikujt që po has vështirësi. Nëse e ndieni ndonjëherë se keni nevojë për më shumë gëzim në jetën tuaj, përpiquni t’i sillni gëzim dikujt tjetër.

Jini plot gëzim tek adhuroni Zotin. Kur shkoni në kishë, përqendrohuni te gëzimi që ju jep Jezu Krishti dhe përlëvdojeni Atë për këtë gjë. Bëni pjesën tuaj për të kontribuar te një frymë e gëzueshme në mbledhjet tuaja të Kishës. Bëjeni muzikën e shenjtë pjesë të adhurimit tuaj në shtëpi dhe në kishë.

Ju mund të ndieni gëzim edhe kur jeta është e vështirë. Mund të pyesni veten se si është e mundur kjo, por është e vërtetë. Besimi juaj te Jezu Krishti, fuqia e Tij shëruese dhe premtimet e Tij të përjetshme mund t’ju japin gëzim të vazhdueshëm. Gëzimi i Tij e tejkalon hidhërimin dhe sjellë paqe që e kapërcen gjithë të kuptuarit.

Një plotësi gëzimi ju pret në mbretërinë çelestiale të Perëndisë. Jezu Krishti i mposhti të gjitha gjërat që mund t’ju mbanin larg nga marrja e gëzimit të përjetshëm. Kur mirëbesoni tek Ai dhe e ndiqni Atë, ky gëzim do të jetë i juaji.