Plani i Perëndisë është për ju

Ati Qiellor është autori i planit. Ai është Ati i shpirtit tuaj dhe Ai ju do. Ai dëshiron t’ju japë bekimin e Tij më të madh, jetën e përjetshme me Të. Me fjalë të tjera, Ai dëshiron që ju të bëheni më shumë si Ai dhe të jetoni jetën e gëzueshme e të lavdishme që jeton Ai. Ai ka gjithë fuqinë dhe i di të gjitha gjërat. Mund t’i mirëbesoni Atij, edhe kur jeta është e vështirë.

Jezu Krishti e bën të mundur planin. Përpara se të krijohej bota, Ati Qiellor e zgjodhi Atë që të ishte Shpëtimtari juaj. Jezu Krishti është i vetmi që mund t’ju kthejë drejt Atit tuaj në Qiell. Kjo është arsyeja përse zgjedhim që ta ndjekim Atë. Çdo gjë varet nga ajo zgjedhje.

Martesa dhe familja janë thelbësore në planin e Perëndisë. Ju jeni pjesë e familjes së Perëndisë dhe të gjithë fëmijët e Tij shpirtërorë vijnë në tokë nëpërmjet një nëne dhe një babai. Perëndia dëshiron që bijat dhe bijtë e Tij të përparojnë së bashku drejt përsosjes së përjetshme. Burrat dhe gratë bëjnë secili pjesën e vet në mënyrë të barabartë për një martesë me dashuri e me unitet. Jeta familjare këtu në tokë, madje me tërë papërsosuritë e saj, mund të sjellë gëzim të madh. Ajo ka për qëllim që t’ju ndihmojë të përgatiteni për jetën e përjetshme me Perëndinë.

Mbani një këndvështrim të përjetshëm. Kurdoherë që përballeni me tundime, sprova, zhgënjime ose zgjedhje të vështira, sillni ndërmend planin e Perëndisë. Kuptoni se si të vërtetat e përjetshme që i dini rreth planit të Tij, mund t’ju ndihmojnë t’i shihni ndryshe sfidat tuaja.

Kërkojeni dorën e Perëndisë në jetën tuaj. Dallojini mënyrat se si Perëndia po ju bekon. Mund të jetë një veprim i mirë nga dikush, një çast paqeje ose një përgjigje ndaj lutjes.

Zgjidhni që ta ndiqni planin e Perëndisë. Mësoni rreth asaj që Ati juaj Qiellor dëshiron që ju të bëni. Kërkojeni udhërrëfimin e Tij teksa i studioni shkrimet e shenjta, fjalët e profetëve të gjallë, proklamatën mbi familjen dhe bekimin tuaj patriarkal. Kjo do t’ju ndihmojë të përgatiteni për t’i shërbyer Zotit, si misionar ose misionare dhe gjatë gjithë jetës suaj. Bëjeni shërbimin ndaj Zotit, martesën e përjetshme dhe rritjen e fëmijëve një përparësi të lartë. Bëni pjesën tuaj që të keni një familje të lumtur tani duke ndjekur mësimet e Jezu Krishtit.

Ju mund të përballeni me sprovat e jetës me guxim e shpresë te Krishti. Ngaqë keni njohuri rreth planit të përjetshëm të Perëndisë, keni një mjet të vlefshëm që mund t’ju ndihmojë gjatë kohëve të vështira. Ju e dini se jeta është më shumë sesa ajo që ndodh nga lindja e deri në vdekje. Ju e dini se kush jeni vërtet, cili është qëllimi juaj dhe kush mund të bëheni me ndihmën e Shpëtimtarit. Jezu Krishti është forca juaj!

Ju mund të merrni jetë të përjetshme ndërkohë që ndiqni Jezu Krishtin. Ai do t’ju japë fuqi që të bëheni më shumë si Ai, të ktheheni te prindërit tuaj qiellorë dhe të jetoni në gëzim me njerëzit tuaj të dashur përjetësisht. Mirëbesojini Jezu Krishtit.