Ecni në dritën e Perëndisë

Ju mund ta keni Frymën e Shenjtë si shoqërues të vazhdueshëm. Kur u konfirmuat anëtar/e i/e Kishës, ju u ftuat të “merrni[t] Frymën e Shenjtë”. Mundësia për të pasur Shpirtin si shoqëruesin tuaj të vazhdueshëm është njëra nga dhuratat më të mëdha të Perëndisë për ju.

Bërja e zgjedhjeve të mira e përmirëson aftësinë tuaj për ta ndier Shpirtin. Ka shumë gjëra të mira dhe të shëndetshme në këtë botë. Ashtu si trupi juaj ndikohet nga ajo që hani dhe pini, mendja dhe shpirti juaj ndikohen thellësisht nga ato që lexoni, shikoni e dëgjoni.

Gjeni kohë për Zotin çdo ditë. Mësoni për Të. Kujtojeni gjithmonë Atë. Lutjuni Atit tuaj Qiellor. Studiojini shkrimet e shenjta dhe fjalët e profetëve të gjallë. Më pas, përpiquni fort që të jetoni sipas asaj që mësoni.

Kërkojeni atë që e lartëson, e frymëzon dhe e fton Shpirtin. Ndërsa bëni zgjedhje se çfarë të shikoni, lexoni, dëgjoni ose në çfarë të merrni pjesë, mendoni se si ju bën të ndiheni. A ju fton mendime të mira? Qëndroni larg çdo gjëje që tallet me gjërat e shenjta ose është e pamoralshme. Mos merrni pjesë në ndonjë gjë që e turbullon gjykimin ose ndjeshmërinë tuaj ndaj Shpirtit, të tilla si dhuna, alkooli dhe drogat e dëmshme. Kini guximin të fikni një material filmik ose lojë, të dilni nga një shfaqje filmi ose mbrëmje vallëzimi, të ndryshoni muzikën tuaj ose të largoheni nga çdo gjë që nuk është në përputhje me Shpirtin.

Përdorini mediat shoqërore për të lartësuar moralisht. Mediat shoqërore mund të jenë një mjet i fuqishëm komunikimi. Nëse i përdorni, përqendrohuni te drita, besimi dhe e vërteta. Mos e krahasoni jetën tuaj me atë që njerëzit e tjerë duket se po përjetojnë. Mos harroni se vlera juaj vjen nga të qenit fëmijë i prindërve qiellorë, jo nga mediat shoqërore.

Kërkoni përvoja të shëndetshme dhe marrëdhënie reale e të qëndrueshme. Kini kujdes që përdorimi nga ana juaj i teknologjisë dhe mediave të mos e zëvendësojë kohën që kaloni fizikisht me familjen dhe miqtë tuaj. Mediat shoqërore dhe teknologji të tjera mund të marrin shumë nga koha juaj pa ju dhënë si shkëmbim vlerë të madhe. Bëni një shkëputje nga bota virtuale dhe lidhuni me njerëz në jetën reale.

Ju mund ta keni gjithmonë Shpirtin me vete. Ky premtim është pjesë e besëlidhjes që bëni çdo herë që merrni sakramentin. Shpirti do t’ju japë dëshmi për Atin Qiellor dhe Jezu Krishtin. Ai do t’ju ngushëllojë, udhërrëfejë, paralajmërojë dhe shenjtërojë. Ai do t’ju ndihmojë të dalloni të vërtetën dhe të shikoni të mirën në botë.