Ordinancat dhe besëlidhjet e tempullit ju japin të drejtë më të madhe për bekimet e Perëndisë

Dhurimi është një dhuratë diturie dhe fuqie. Në ordinancat e dhurimit në tempull ju e merrni emrin e Shpëtimtarit mbi vete më plotësisht. Ju besëlidhni t’i bindeni Perëndisë, të sakrifikoni për të bërë vullnetin e Tij, të jetoni ungjillin e Jezu Krishtit, t’i bindeni ligjit të dëlirësisë dhe t’ia kushtoni, ose dedikoni Kishës së Tij, jetën dhe gjithçka që ju ka dhënë Perëndia. Këto janë premtimet tuaja. Perëndia premton t’ju bekojë me njohuri, mbrojtje dhe të drejtë më të madhe përdorimi të fuqisë së Tij. Ai gjithashtu premton t’ju japë jetë të përjetshme me Të. Si pjesë e dhurimit, ju merrni privilegjin e shenjtë të mbajtjes së veshjes së brendshme të priftërisë së shenjtë. Veshja e brendshme është një simbol i Jezu Krishtit dhe një kujtues i besëlidhjeve tuaja të tempullit.

Vulosja në tempull i bashkon çiftet dhe familjet për përjetësinë. Në ordinancën e vulosjes në tempull, ju dhe bashkëshorti/ja juaj do të bëni një besëlidhje me Perëndinë dhe me njëri‑tjetrin. Ju do të premtoni që të jeni tërësisht besnikë ndaj Perëndisë dhe ndaj njëri‑tjetrit, ta doni dhe t’i shërbeni njëri‑tjetrit dhe të punoni së bashku për të zbatuar ligjet e Perëndisë. Ky është premtimi juaj. Perëndia premton se marrëdhënia juaj me bashkëshortin/en tuaj dhe fëmijët tuaj mund të zgjatë përgjithmonë. Ai gjithashtu premton se ju mund të merrni lavdinë më të madhe me Të në mbretërinë çelestiale kur i mbani besëlidhjet tuaja. Ky bekim quhet ekzaltim.

Kini gjithmonë një rekomandim tempulli. Takohuni me një anëtar të peshkopatës suaj për të marrë një rekomandim. Ai do t’ju bëjë pyetje rreth mënyrës se si po i jetoni standardet e Zotit për të hyrë në shtëpinë e Tij të shenjtë. Rishikojini këto pyetje shpesh. (Mund t’i gjeni ato në shtojcën e këtij udhëzuesi.) Edhe nëse jetoni larg nga një tempull, lejojeni rekomandimin tuaj që të jetë simbol i dashurisë suaj për Zotin dhe zotimit tuaj për të jetuar standardet e Tij.

Shkoni në tempull sa më shpesh që të mundeni. Me rekomandimin tuaj të tempullit, mund të hyni në shtëpinë e Zotit dhe të pagëzoheni e konfirmoheni për paraardhësit tuaj, që ata të mund të marrin bekimet që ju janë dhënë. Përfitoni nga çdo mundësi për të qenë në tempull. Kërkojeni Zotin në shtëpinë e Tij. Kërkojeni Atë në ordinancat, simbolet dhe Shpirtin që ndieni. Do ta gjeni Atë.

Përgatituni që të bëni besëlidhje në shtëpinë e Zotit. Një nga mënyrat më të mira për ta bërë këtë gjë, është të mbani besëlidhjen tuaj të pagëzimit. Bëjeni atë njërin nga synimet tuaja udhërrëfyese për të marrë ordinancat e tempullit dhe për të qenë një mbajtës i besëlidhjeve gjatë gjithë jetës. Filloni tani të jetoni ligjet, të cilave do të premtoni t’u bindeni në tempull: bindja ndaj urdhërimeve të Perëndisë, sakrifica, ungjilli i Jezu Krishtit, dëlirësia dhe përkushtimi. Familja, peshkopi juaj dhe udhëheqës të tjerë të Kishës mund t’ju ndihmojnë.

Ju mund të bëheni më shumë si Jezu Krishti. Ai do t’ju ndihmojë të bëheni një ndjekës më i madh i drejtësisë. Ordinancat dhe besëlidhjet e tempullit do t’ju mësojnë se si të hyni në praninë e Perëndisë dhe të merrni jetë të përjetshme me Të.

Ju do të armatoseni me fuqinë e Perëndisë. Besëlidhjet e tempullit vijnë me premtimin se fuqia dhe lavdia e Perëndisë do të jenë mbi ju. Engjëjt e Tij do të bëjnë rojë për ju.

Koha në tempull do t’ju lidhë më ngushtë me Jezu Krishtin dhe Frymën e Shenjtë. Do të ndieni paqen dhe prehjen e Perëndisë. Do ta dëgjoni zërin e Tij me qartësi më të madhe. Qiejt do t’ju hapen dhe do t’i kuptoni më mirë udhët e Tij. Do të keni forcë më të madhe për t’u përballur me sfidat tuaja, sepse zemra juaj lidhet me zemrën e Tij.