Bodi bilong yu em i sekred.

Bodi bilong yu em i kamap long piksa bilong God—i gat bikpela glori, strongpela pawa long dispela yunives. Skripsa i skelim ol bodi bilong yumi olsem wanpela holi temple, wanpela ples we Spirit i ken stap. Em tru, olsem bodi bilong yu i no stret nau. Tasol dispela ekspiriens yu wok long gat wantaim bodi bilong yu inap helpim yu redi long wanpela de kisim stretpela, bodi i kirap bek na pulap long glori.

Sol bilong yu em bodi na spirit bilong yu. Bilong dispela as, helt long bodi na spirit i konekt wantaim. Sevia i soim Wod bilong Wisdom long tisim ol prinsipel long lukautim bodi bilong yu na long promis blesing bilong bodi na spirit.

Ol piling bilong slip wantaim man o meri em i impoten hap plen bilong God long kamapim gutpela marit na famili bilong oltaim. Dispela ol piling i nogat sin—ol i sekred. Bikos ol piling bilong slip wantaim man o meri i sekred tumas na pawaful, God i givim yu lo bilong Em bilong sastiti long redim yu long yusim dispela ol pilim olsem Em i laikim. Lo bilong sastiti i soim klia olsem God i givim tok orait long pasin bilong slip wantaim namel long man na meri husat ol i marit. Planti manmeri i no save rispektim o pilai pilai long lo bilong God, tasol Bikpela invaitim yumi long kamap disaipel bilong Em na bihainim wanpela stended i antap tru.

Lukautim bodi bilong yu—na bodi bilong ol narapela—wantaim rispek. Taim yu mekim ol disisen long kolos bilong yu, stail bilong gras, na lukluk bilong yu, askim yu yet, ‘Mi givim ona long bodi bilong mi olsem wanpela sekred presen i kam long God?’” Papa long Heven i laikim yumi long lukim yumi yet olsem wanem kain manmeri yumi tru tru: i no long fisikol bodi tasol olsem ol divain pikinini bilong Em. Noken yusim ol stail we i bringim nogut atensen long bodi bilong yu, God i lukim yu olsem pikinini bilong Em wantaim laip oltaim. Larim stretpela pasin na lav bilong God i gaidim ol disisen bilong yu. Kisim kaunsel long famili bilong yu.

Mekim ol samting we bai strongim bodi bilong yu, i no ol samting we bai bagarapim. Amamas wantaim planti gutpela samting God i givim. Tingim olsem alkohol, tabako, kofi, ti, na ol narapela samting i nogut long bodi bilong yu o spirit bilong yu. Maski ol samting we i givim helpim olsem ol drag we dokta i raitim, i ken bagaraim yu sapos yu no yusim gut.

Mekim ol piling bilong slip wantaim man o meri i sekred. Ol i no ken kamap samting bilong tok pilai o amamas. Ausait long marit namel long man na meri, em i no stret long tatsim ol praivet, sekred hap bilong bodi bilong narapela man maski em i werim klos. Long ol disisen bilong yu long wanem samting yu mekim, lukim, ritim, harim, tingim, post, o teks, abrusim ol samting we bai kirapim nogut pasin long yu o ol narapela. Dispela em piksa nogut o ponografi long kaikain wei. Sapos yu painim olsem ol situesen o ektiviti i mekim temtesen i strong, abrusim ol. Yu save olsem dispela ol situesen na ektivi em wanem samting. Na sapos yu no klia gut, Spirit, ol famili, na ol lidas bilong yu ken helpim yu long save. Soim Papa bilong yu long Heven olsem yu onaim na rispektim dispela sekred pawa long kamapim laip.

Rispekt bilong yu yet na ol narapela bai go bikpela taim yu onarim bodi bilong yu thru long pasin bilong yu, lukluk, na kolos yu werim.

Bikpela i promis long givim planti save long ol manmeri husat i holim pas long Wod bilong Wisdom. Helti bodi, fri long ediksen, inkrisim save bilong yu long kisim revelesen long yu yet, tingting gut, na sevim Bikpela.

Stap bihainim lo bilong sasiti i bringim tok orait long God na long kisim strong bilong spirit long yu yet. Em save banisim yu na famili bilong yu long bihain taim. Taim yu marit, dispela lo bai bringim bikpela lav, tras, na yuniti insait long marit bilong yu. Bihainim dispela lo bai mekim isi long yu long go het oltaim na kamap moa olsem Papa bilong yu long Heven. Konfidens bilong yu bai gro taim yu stap olsem disaipel bilong Jisas Krais.