I Shall Not Want, Yongsung Kim i mekim. Courtesy of Havenlight
5.
Wokabaut insait long lait bilong God
Galatians 5:25
Yu ken mekim ol gutpela samting taim yu ken lukim klia ol samting. Long dispela as, lait em i bikpela samting; lait i mekim isi long yumi lukim stretpela rot. Papa long heven i opim rot long yu kisim wanpela lait bilong heven—em presen bilong Holi Spirit—long helpim yu luksave long wanem samting i gutpela na nogut, samting i stretpela na samting i rong.
Ol Tok Tru bilong Oltaim
Holi Gos i ken stap wantaim yu olsem wanpela poroman i save stap oltaim. Taim yu bin kisim konfemesen olsem wanpela memba bilong Sios, yu bin kisim invitesen long “kisim Holi Gos.” Em i wanpela bikpela presen bilong God i go long yu, long kisim Spirit olsem poroman bilong yu we i save stap oltaim.
Mekim ol gutpela sois, na dispela bai helpim yu long pilim Spirit moa yet. I gat planti ol gutpela samting insait long dispela graun. Kain olsem wanem samting yu kaikai o dring i mekim gutpela o mekim nogut long bodi bilong yu, ol samting yu ritim, lukim, na harim i save mekim gutpela o mekim nogut long bodi bilong yu.
Ol invitesen
Givim taim long Bikpela olgeta de. Lainim long Em. Tingim Em olgeta taim. Beten long Papa bilong yu long heven. Stadim ol skripsa holi na ol toktok bilong ol profet bilong i stap laip. Bihain traim long bihainim ol samting yu lainim.
Painim ol samting we i strongim bel bilong yu, kirapim bel bilong yu, na i larim Spirit long kam stap wantaim yu. Taim yu mekim ol sois long wanem yu bai yu lukim, ritim, harim, o stap insait long en, tingim dispela i mekim yu pilim olsem wanem. Em i save bringim ol gutpela tingting, o nogat? Stap longwe long ol samting we i tok bilas long ol samting i holi o ol pasin nogut tru. Noken stap insait long ol samting we i pasim skel bilong yu o i mekim yu hat long pilim Spirit, olsem pasin bilong kros pait, pasin bilong spak, na ol drag na marasin nogut bilong bagarapim yu. Yu mas gat strong long pasim vidio o gem, go autsait long wanpela muvi o danis, senisim musik bilong yu, o givim baksait long ol samting we i no stret wantaim Spirit.
Yusim sosel midia long strongim ol arapela. Sosel midia ken kamap wanpela strongpela tul bilong toktok long ol arapela. Sapos yu yusim, sanap antap long lait, bilip, na trupela pasin na toktok. Noken skelim laip bilong yu wantaim wanem samting i kamap long ol arapela. Tingim olsem yu dia tumas, long wanem, yu pikinini bilong papamama long heven, i no bilong sosel midia.
Painim ol gutpela samting na ol trupela rilesensip we i save stap longpela taim. Yu mas lukaut long taim yu yusim ol teknoloji na midia, em i noken kisim ples bilong stap bilong yu wantaim ol famili na ol pren bilong yu. Sosel midia na ol narapela teknoloji ken kisim planti taim bilong yu na i no inap givim yu ol gutpela samting. Kisim liklik malolo long ol samting insait long ol masin samting na bung wantaim ol manmeri klostu long yu.
Ol Blesing God Promis long Givim
Spirit i ken stap wantaim yu olgeta taim. Dispela promis em hap bilong kavanen yu mekim olgeta taim, taim yu kisim sakramen. Holi Spirit bai witnes long Papa long Heven na Jisas Krais long yu. Em bai givim yu bel isi, gaidim yu, givim ol tok lukaut long yu, na mekim yu kamap klin. Em bai helpim yu long luksave long tok tru na lukim gutpela bilong dispela graun.
Ol Askim na Bekim
Hau bai mi save mi pilim strong bilong Holi Gos? Taim yu lainim long luksave long strong bilong Spirit, dispela bai kisim taim, pasin bilong lainim moa, na pasin bilong bel isi. Em save toktok long ol manmeri long kainkain rot. Noken abrusim ol liklik samting—dispela bel isi yu kisim taim yu harim testimoni bilong wanpela o dispela ol bel hevi yu gat bihain long yu mekim wanpela asua. Painim insait long skripsa ol sampela rot Holi Spirit i save toktok wantaim yu, beten long dispela, na go het long painim sampela taim we yu bai pilim Spirit.
Ponografi em wanem samting? Bilong wanem na mi mas abrusim? Ponografi em sampela samting i makim ol pasin doti, long rot bilong ol piksa o toktok, long kirapim ol tingting doti. Ponografi save kamap long planti rot, olsem ol vidio, piksa, buk, gem, na musik. Em ken ol toksave o piksa ol pren i salim namel long ol yet. Ponografi i mekim ol sekred samting—ol bodi na laik bilong yumi long slip wantaim narapela—olsem ol i samting nating. Sampela taim yu ken abrus na lukim ponografi tu. Maski sapos yu lukim ponografi long laik bilong yu o nogat, hariap tru yu mas lusim. Yu ken toktok wantaim wanpela papa o mama o wanpela bikpela man o meri yu trastim. Sapos yu laik, na yu lukim ponografi, dispela em i sin na em bagarapim strong bilong yu long pilim Spirit. Em rausim strong bilong yumi long holim pas tingting bilong yu na i senisim i go kranki wanem rot yu save luksave long yu yet na ol arapela. Jisas Krais i gat strong bilong helpim yu givim baksait long ponografi na tanim bel. Tanim go long Em na givim baksait long tudak. Bisop bilong yu ken helpim yu kisim strong na lusim sin i kam long Jisas. Jisas Krais em strong bilong yu!
Lukim Buk Song 119:105 (Tok bilong God em i olsem lait bilong soim rot long yumi); Amos 5:14 (bihainim gutpela pasin); Galesia 5:22–23 (ol kaikai bilong Holi Spirit); Moronai 7:18–19 (lait bilong Krais); Doktrin na ol Kavanen 6:23 (Bikpela i save givim bel isi); 20:77, 79 (ol beten bilong blesim sakramen).
Askim bilong Temple Rekomen
-
Bikpela i bin tok olsem yumi mas mekim olgeta samting “wantaim klinpela pasin” long ai bilong Em (Doktrin na ol Kavanen 42:41). Yu save strong long stap klinpela insait long ol tingting na ol pasin bilong yu?