3.
Yu ken helpim wantaim wok bilong God.
Moses 1:39
Papa long Heven laikim tru olgeta pikinini bilong Em. Em laik helpim ol painim amamas, go bek long Em, na kisim laip i stap gut oltaim oltaim. Dispela em i wok bilong Em long kisim bek yumi na mekim yumi kamap wankain olsem Em yet, na Em askim yu long halivim!
Ol Tok i Tru bilong Oltaim
Wok bilong God em long kamapim yu long laip i nogat dai na i stap gut oltaim, na God i kisim biknem long dispela. Laip i nogat dai em long stap laip oltaim wantaim bodi i kirap bek na i gutpela. Laip nogat pinis, o eksaltesen, em long kamap moa olsem God na stap wantaim Em oltaim olsem famili. Olgeta dispela em kamap, long wanem, Jisas Krais em i mekim Ofa bilong Em pinis. Yu ken trastim Em.
Yu ken helpim long mekim wok bilong God long rot bilong kam long Krais na helpim ol arapela long mekim wankain. Taim yu mekim wanpela samting long helpim wanpela bihainim Jisas Krais, yu helpim long mekim wok bilong God.
Ol Askim bilong Bihainim
Bihainim gospel. Strongim bilip bilong yu long Jisas Krais. Tok sori long ol asua bilong yu olgeta de. Kisim ol prishud odinens bilong God na bihainim ol kavanen bilong yu. Bihainim olsem olgeta taim long laip bilong yu.
Lukautim ol lain i sot. Painim ol rot bilong helpim na mekim wok bilong ol narapela, olsem famili bilong yu, ol pren bilong yu, na komuniti bilong yu. Wanpela gutpela rot long helpim ol lain i gat nid em long bihainim lo bilong tambuim kaikai na givim ofa bilong tambuim kaikai.
Invaitim olgeta long kisim gutnius Larim ol toktok na pasin bilong yu soim bilip bilong yu long Jisas Krais. Yu mas redi long tokim olgeta husat i askim yu long gutpela tingting na amamas yu pilim olsem disaipel bilong Em. Long ol yangpela man, wok misin em wanpela wok bilong prishud. Long ol yangpela meri, em wanpela samting bilong givim strong; beten long save sapos Bikpela i laik yu mas mekim wok misin. Redi long autim gutnius olgeta taim long laip bilong yu.
Bungim ol famili long oltaim long rot bilong famili histri na wok bilong tempel. Lainim moa long ol tumbuna bilong yu. Painimaut husat i nidim ol odinens bilong tempel. Sapos yu inap, go planti taim long tempel long kisim baptais na konfemesen bilong ol. Sapos yu nidim helpim, go long FamilySearch.org.
Ol Blesing God Promis long Givim
Yu bai kisim helpim bilong God. Papa long heven i no laikim yu long mekim dispela wok long strong bilong yu yet. Em i stap wantaim yu. Taim yu givim taim na bel bilong yu wantaim daunpasin, Em bai mekim ol gutpela samting long han bilong yu. Jisas Krais em strong bilong yu!
Yu bai pulap wantaim amamas. Wok bilong God em wok bilong amamas! Taim yu stap insait long en, yu ken pilim amamas Em pilim long en. Tingim dispela amamas yu bai serim wantaim Papa long Heven na ol pikinini bilong Em husat yu helpim long bringim kam long Em!
Ol Askim na Bekim
Tru tru God i ken yusim mi long mekim wok bilong Em? Yes! I gat planti rot long helpim wok bilong God. Ating i ken luk olsem ol narapela i gat moa save long mekim samting, tasol Papa long heven i lukim pinis wanem samting yu inap mekim. Em givim pinis long yu ol presen we yu ken yusim long helpim na bungim ol pikinini bilong Em. Em orait sapos dispela ol presen i narakain long wanem ol narapela i gat long en. Dispela em i as, bilong wanem na presen bilong yu i dia tumas. Em nidim yu!
Lukim Matyu 10:39 (sapos yu lusim laip bilong yu taim yu mekim wok bilong God, yu bai kisim laip tru); 1 Korin 12:14–27 (Bikpela i nidim yumi olgeta memba bilong bodi bilong Krais); Filipai 1:6 (gat strongpela tingting olsem God i wok wantaim yu); Jekop 5:72 (Bikpela bilong gaden i mekim wok wantaim yu); Doktrin na ol Kavanen 18:15–16 (amamas bilong yu bai bikpela wantaim ol husat bringim kam long Krais); 64:33–34 (ol liklik samting i save kirapim bikpela wok tru); Moses 1:6 (Mi gat wok long givim yu); 6:31–34 (God i save givim strong bilong mekim wok long husat Em i makim, maski em pilim olsem em i no inap mekim dispela wok).
Askim bilong Temple Rekomen
-
Yu gat testimoni long Restoresen bilong gospel bilong Jisas Krais?