Ol odinens na ol kavanen i opim rot bilong yu long kisim ol blesing bilong God

Ol odinens soim yu i go long Jisas Krais Odinens em i wanpela sekred seremoni i gat mining i tisim yumi long Jisas Krais. Kain olsem, sakramen em i no bret na wara nating. Em i helpim yumi tingim Sevia.

Ol kavanen i mak bilong bikpela lav, tras, na ekspektesen bilong God. Ol save apim stap bilong yu wantaim God i go long narapela mak. Pasin bilong mekim kavanen i soim olsem yu laikim tru God na yu givim yu yet long Em. Yu ken trastim Em, na Em ken trastim yu. Taim yu givim yu yet moa long Em, dispela i opim rot moa long strong bilong God long kam long yu, na helpim bilong bihainim ol kavanen bilong yu.

Yu mekim kavanen wantaim God taim yu kisim baptais na kisim konfemesen na taim yu kisim sakramen. Taim yu kisim baptais, yu mekim promis long kisim nem bilong Jisas Krais antap long yu, mekim wok bilong Em, na bihainim ol lo bilong Em olgeta taim long laip bilong yu. Long taim bilong sakramen, yu promis tu long tingim Em oltaim. Dispela em ol promis bilong yu. Taim yu gat bikpela laik long bihainim ol, God i promis long givim yu Holi Spirit olsem wanpela poroman bai i stap wantaim yu olgeta taim.

Kisim sakramen olsem wanpela sekred presen. Soim komitmen bilong yu long Jisas Krais taim yu redim yu yet long kisim samting i sekred long taim bilong sakramen. Skelim wanem yu ken mekim long larim dispela odinens i stap olsem bikpela samting bilong spirit long wik bilong yu.

Painim Seivia insait long ol dispela odinens. Taim yu lukluk o stap insait long wanpela odinens, askim yu yet, “Dispela i lainim mi wanem samting long Jisas Krais?” o “Hau dispela i bringim mi go klostu moa long Em?” Putim yau long wanem samting Holi Spirit i lainim yu.

Larim ol kavanen bilong yu i gaidim ol pasin bilong yu. Taim yu gat laik long mekim wanpela samting, tingim stap bilong yu wantaim God insait long kavanen yu mekim wantaim Em pinis. Stap loyol long Em. Askim yu yet: Dispela samting i bihainim ol kavanen bilong mi, o nogat? Kain olsem, mi save laikim na helpim ol arapela, givim bel isi long ol manmeri husat i nidim bel isi, na witnes long Krais—long olgeta hap na olgeta taim?

Yu ken kisim strong bilong winim traim, sin, na ol hevi bilong laip. Mmekim na bihainim ol kavanen i opim rot bilong yu long kisim strong bilong God. Wantaim dispela strong, yu ken bungim olgeta samting wantaim strongpela bel na tingting. Jisas Krais em strong bilong yu!

Yu ken kamap klin na God bai rausim ol sin bilong yu. Promis bilong God long yu taim yu bihainim ol kavanen yu mekim taim yu kisim baptais, em God bai rausim ol sin bilong yu. Em i olsem, olgeta taim yu tok sori long ol asua bilong yu na bihainim ol promis bilong yu wantaim God, Em bai lusim sin bilong yu na helpim yu kamap gutpela moa.

Holi Gos i ken stap wantaim yu oltaim. Narapela promis we i pas wantaim baptais na sakramen em Holi Spirit bai poromanim yu olgeta taim na ol ensel bai helpim yu. Yu bai i no inap karim ol hevi yu yet. God i no save givim baksait long ol pikinini Em i mekim kavanen pinis wantaim ol—dispela yu ken bilipim tru tru.

Yu ken kisim helpim bilong ol manmeri husat i mekim kavanen wantaim God. Yu stap insait namel long ol manmeri husat i mekim kavanen insait long Sios bilong Sevia. Yupela i save strongim bel na strongim tingting bilong yupela yet. Yupela i sore wantaim na amamas wantaim. Yupela i save karim hevi bilong wanpela narapela. Famili bilong yu, bisop, ol lida, na narapela ol memba bilong Sios i stap bilong helpim yu, na yu ken helpim ol.