Ol temple odinens na kavanen i givim yu bikpela rot long kisim ol blesing bilong God

Endaunmen i presen bilong save na strong. Insait long ol odinens bilong temple endaunmen, yu kisim nem bilong Jisas antap long yu moa yet. Yu mekim kontrak long bihainim ol tok bilong God, givim baksait long laik bilong yu long mekim wok bilong Em, stap aninit long gospel bilong Jisas Krais, bihainim klinpela pasin, na givim laip bilong yu na olgeta samting God i givim yu i go long Sios bilong Em. Dispela em ol promis yu mekim. God promis long blesim yumi wantaim bikpela save, banis, na Em bai opim rot bilong yumi kisim strong bilong Em. Em promis tu long givim yu laip i stap gut oltaim oltaim wantaim Em. Olsem wanpela hap bilong endaumen, yu kisim dispela sekred sans long werim klos bilong prishud holi. Dispela klos i mak bilong Jisas Krais na i helpim yu tingim ol temple kavanen bilong yu.

Temple siling i save pasim tupela marit na ol famili wantaim oltaim igo. Insait long odinens bilong temple siling, yu na man o meri bilong yu bai mekim kavanen wantaim God na namel long yutupela yet. Yu bai promis long stap pas wantaim God na long yutupela yet, long laikim na helpim yutupela yet, na long wok wantaim long bihainim ol lo bilong God. Dispela em promis bilong yu. God i promis olsem stap bilong yu wantaim marit poro bilong yu na ol pikinini bilong yutupela i ken stap oltaim. Em promis tu olsem yu ken kisim namba wan biknem wantaim Em insait long selestiel kingdom sapos yu bihainim ol kavanen bilong yu. Dispela blesing yumi kolim eksaltesen.

Oltaim yu mas gat temple rekomen. Bung wantaim wanpela memba bilong bisoprik bilong yu long kisim wanpela. Em bai askim ol kwesten long olsem wanem yu stap bihainim stended bilong God long go insait long haus holi bilong Em. Lukim gen ol dispela askim moa. (Yu ken painim dispela ol askim insait long ol toktok baksait long dispela buk.) Maski yu stap longwe long temple, larim rekomen bilong yu kamap wanpela mak bilong laikim bilong yu long Bikpela na mak olsem yu givim bel long stap bihainim stended bilong Em.

Go long temple planti taim sapos yu inap. Wantaim temple rekomen bilong yu, yu ken go insait long haus bilong Bikpela long kisim baptais na kisim konfemesen bilong ol lain tumbuna bilong yu, bai ol i ken kisim ol blesing yu kisim pinis. Sapos yu inap, na taim em stap long han bilong yu, go long temple. Painim Bikpela insait long haus bilong Em. Painim Em insait long ol odinens, ol mak, na Spirit yu pilim. Yu bai painim Em.

Redi long mekim ol kavanen insait long haus bilong Bikpela. Wanpela gutpela rot bilong mekim dispela em long bihainim kontrak yu mekim taim yu kisim baptais. Mekim dispela kamap olsem wanpela gol long kisim temple odinens na wanpela i holim pas ol kavanen long laip bilong em. Stat nau long stap bihainim ol lo yu bai promis long bihainim insait long temple: bihainim ol komanmen bilong God, sakripais, gospel bilong Jisas Krais, sastiti, na konsekresen. Famili bilong yu, bisop, na ol narapela Sios lida i ken helpim yu.

Yu ken kamap moa olsem Jisas Krais. Em bai helpim yu kamap wanpela gutpela man bilong bihainim stretpela pasin. Ol temple odinens na ol kavanen bai lainim yu wanem rot bilong go stap wantaim God na kisim laip i stap gut oltaim oltaim wantaim Em.

Yu bai kisim strong bilong God. Ol temple kavanen bilong yu i kam wantaim promis olsem pawa na glori bilong God bai stap antap long yu. Ol ensel bilong Em bai putim was antap long yu.

Taim bilong yu insait long temple bai pasim yu moa klostu long Jisas Krais na Holi Spirit. Yu bai pilim bel isi na gutpela sindaun bilong God. Yu bai harim nek bilong Em wantaim klia tingting. Heven bai op long yu, na yu bai save gut long ol pasin bilong Em. Yu bai gat bikpela strong long bungim ol hevi bilong yu, long wanem, bel bilong yu i pas wantaim Em.