Kò ou sakre

Kò ou kreye daprè imaj Bondye—Pèsonaj ki pi gloriye ak pi majestye nan inivè a. Ekriti yo konpare kò ou avèk yon tanp sakre, yon andwa kote Lespri a kapab abite. Natirèlman, kò ou pa pafè pou kouneya. Men eksperyans w ap fè avèk kò w yo kapab ede w prepare pou w resevwa yon kò pafè, resisite, ak glorifye yon jou.

Nanm ou fèt avèk kò ou ak lespri ou. Pou rezon sa a, sante fizik ak sante espirityèl makònnen ansanm. Sovè a te revele Pawòl Sajès la pou anseye prensip sou kijan pou pran swen kò ou epi pou pwomèt benediksyon fizik ak espirityèl.

Santiman seksyèl yo se yon pati enpòtan nan plan Bondye pou kreye maryaj ki gen bonè ak fanmi etènèl la. Sansasyon sa yo se pa peche—yo sakre. Paske sansasyon seksyèl si sakre ak si puisan konsa, Bondye ba ou lwa chastete Li a pou prepare w pou w itilize sansasyon sa yo nan fason Li prevwa a. Lwa chastete a deklare ke Bondye apwouve aktivite seksyèl sèlman ant yon gason ak yon fi ki marye. Anpil moun nan mond lan inyore oswa menm moke lwa Bondye yo, men Senyè a envite nou pou nou vin disip Li epi viv yon prensip ki pi elve.

Trete kò ou—ak kò lòt moun—avèk respè. Lè w ap pran desizyon konsènan fason pou w abiye, kwafi, ak aparans ou, mande tèt ou, “Èske m ap onore kò mwen kòm yon don sakre Bondye ban mwen?” Papa nou ki nan Syèl la vle nou youn konsidere lòt pou sa nou reyèlman ye a: non pa jis kò fizik men kòm pitit byeneme Li ki gen yon destine divin. Evite lamòd ki mete aksan oubyen atire atansyon inapwopriye sou kò fizik ou olye de kiyès ou ye kòm yon pitit Bondye ki gen yon avni etènèl. Kite purte moral ak lanmou pou Bondye gide chwa w yo. Chèche konsèy nan men fanmi ou.

Fè bagay ki pral fòtifye kò ou, non pa bagay ki pral blese l oubyen domaje li. Avèk rekonesans, jwi pil bon bagay Bondye ofri w yo. Sonje ke alkòl, tabak, kafe, te, ak lòt dwòg ak sibstans danjere se pa pou kò ou ni pou lespri ou. Menm sibstans ki ede, tankou medikaman yo preskri ou, kapab destriktè si ou pa itilize yo kòrèkteman.

Kenbe seksyalite ou ak sansasyon seksyèl yo sakre. Ou pa dwe itilize yo kòm bagay pou fè plezantri oubyen divètisman. Andeyò maryaj ant yon gason ak yon fi, li pa kòrèk pou w touche pati prive ak sakre kò yon lòt moun, menmsi li abiye. Lè w ap chwazi sa pou ou fè, pou gade, li, koute, ak panse, ak poste, oubyen tèks, evite tout bagay ki ka volontèman reveye emosyon seksyèl nan lòt moun oubyen nan oumenm. Sa enkli pònografi sou tout fòm. Si ou twouve ou nan sitiyasyon oswa aktivite ki fè tantasyon yo vin pi fò, evite yo. Ou konnen kisa sitiyasyon ak aktivite sa yo ye. Epi, si ou pa sèten, Lespri a, fanmi ou, ak dirijan ou yo kapab ede ou konnen yo. Montre Papa nou ki nan Syèl la ke ou onore ak respekte pouvwa sakre pou kreye lavi a.

Respè ou pou tèt ou ak pou lòt moun ap ogmante pandan w ap onore kò ou atravè konpòtman, aparans, ak abiman ou.

Senyè a pwomèt gwo trezò konesans pou moun ki kenbe Pawòl Sajès la. Yon kò ansante, lib anba adiksyon, ogmante kapasite ou pou resevwa revelasyon pèsonèl, panse ak klète, ak pou sèvi Senyè a tou.

Viv lwa chastete a pote apwobasyon Bondye ak pouvwa espirityèl pèsonèl. Li pwoteje ou ak fanmi alavni ou. Lè ou marye, lwa sa a pral pote pi gwo lanmou, konfyans, ak inite nan maryaj ou. Obeyi lwa sa a pral rann posib pou ou pwogrese etènèlman epi vin pi plis sanble avèk Papa nou ki nan Syèl la. Konfyans ou pral grandi pandan w ap viv antanke yon disip Jezikri.