Imigenzo n’ibihango byo mu ngoro birushaho kubahesha imigisha y’Imana

Ingabire ni impano y’ubumenyi n’ububasha. Mu migenzo y’ingabire mu ngoro, murushaho kwitirirwa izina ry’Umukiza mu buryo bwuzuye. Mukora igihango cyo kumvira Imana, kwitanga kugira ngo mukore ugushaka Kwayo, kubahiriza inkuru nziza ya Yesu Kristo, kubahiriza itegeko ry’ukwifata no kweza (cyangwa kwegurira) Itorero Ryayo ubuzima bwanyu n’ibintu byose Imana yabahaye. Aya ni amasezerano yanyu. Imana isezeranya kubahesha umugisha w’ubumenyi, uburinzi n’ububasha Bwayo bwisumbuyeho. Isezeranya kandi kubaha ubugingo buhoraho hamwe na Yo. Nk’igice cy’ingabire, mubona uburenganzira budasanzwe butagatifujwe bwo kwambara gamenti y’ubutambyi butagatifu. Gamenti ni ikimenyetso cya Yesu Kristo n’urwibutso rw’ibihango byanyu mu ngoro.

Ugufatanyirizwa mu ngoro guhuza abashyingiranwe n’imiryango ubuziraherezo. Mu mugenzo w’ugufatanyirizwa mu ngoro, wowe n’uwo mwashyingiranwe muzakora igihango n’Imana ndetse no hagati yanyu. Muzasezeranya kubera Imana namwe indahemuka byuzuye, gukundana no gufashanya, no gukorera hamwe kugira ngo mwitondere amategeko y’Imana. Iri ni isezerano ryawe. Imana isezeranya ko umubano wawe n’uwo mwashyingiranwe n’abana banyu ushobora kuramba iteka ryose. Isezeranya kandi ko mushobora kwakira ikuzo risumba ayandi hamwe na Yo mu bwami bwa selesitiyeli uko mwubahiriza ibihango. Uyu mugisha witwa ikuzwa.

Muhore mufite uruhushya rwo kujya mu ngoro. Muhure n’umwe mu bagize ubwepisikopi kugira ngo arubahe. Azababaza ibibazo byerekeranye n’uburyo mubaho mukurikiza ibigenderwaho Nyagasani yashyizeho kugira ngo mwinjire mu nzu Ye ntagatifu. Musubiremo ibi bibazo kenshi. (Mushobora kubibona mu mugereka w’iyi mfashanyigisho.) Nubwo mwaba mutuye kure y’ingoro, mureke uruhushya rwanyu rube ikimenyetso cy’urukundo mukunda Nyagasani n’ukwiyemeza kubahiriza ibigenderwaho Bye.

Mujye mu ngoro kenshi uko mubishoboye. Mufite uruhushya rwanyu rwo kujya mu ngoro, mushobora kwinjira mu nzu ya Nyagasani maze mukabatizwa kandi mukemezwa kubw’abakurambere banyu, kugira ngo bakire imigisha mwamaze guhabwa. Mufatirane buri mahirwe yo kuba mu ngoro. Mushakire Nyagasani mu nzu Ye. Mumushakire mu migenzo, ibimenyetso na Roho mwiyumvamo. Muzamubona.

Mwitegure gukorera ibihango mu nzu ya Nyagasani. Bumwe mu buryo bwiza cyane bwo kubigenza mutyo ni ukubahiriza igihango cyanyu cy’umubatizo. Kwakira imigenzo mu ngoro no kuba abubahiriza igihango ubuzima bwose mubigire imwe mu ntego zibayobora. Mutangire none aha kwitondera amategeko mwasezeranyije kubahiriza mu ngoro: ukubahiriza amategeko y’Imana, ubwitange, inkuru nziza ya Yesu Kristo, ukwifata n’ukwegurira. Umuryango wawe, umwepisikopi n’abandi bayobozi b’Itorero bashobora kubafasha.

Mushobora kurushaho guhinduka nka Yesu Kristo. Azabafasha kurushaho guhinduka umuyoboke w’ubukiranutsi. Imigenzo n’ibihango byo mu ngoro bizabigisha uburyo mwagera imbere y’Imana kandi mukakira ubugingo buhoraho hamwe na Yo.

Muzambikwa ububasha bw’Imana Ibihango byo mu ngoro bizana n’isezerano ko ububasha n’ikuzo ry’Imana bizaba kuri mwebwe. Abamarayika bayo bazabarinda.

Igihe tumara mu ngoro kizarushaho kubahuza cyane na Yesu Kristo na Roho Mutagatifu. Muziyumvamo amahoro n’uburuhukiro bw’Imana. Muzumva ijwi Ryayo mufite ubusobanuke bwisumubuyeho. Amajuru azabakingukira, kandi muzarushaho gusobanukirwa uburyo Bwayo. Muzarushaho kugira imbaraga zo guhangana n’imbogamizi zanyu kubera ko umutima wanyu uhuye n’Uwe.