Na iDusidusi ni Veiyalayalati Makawa me Karona na iVakatakilakila Vakalou

Ena iVakatekivu sa Bula ko Koya na Vosa, mai vei Eva Timothy, rawa ni lavetaki me vakayagataki ga ena Lotu

Au na lasu keu tukuna vei iko niu se sega ni taroga na noqu itavi ena ituvatuva ni Kalou.

E rawa vakacava vei au—niu tawakilikili tu—me okati kina Nona ituvatuva uasivi? Au na kilikili rawa vakacava ena veigauna e vakatara voli tu vei au na Tamada Vakalomalagi? Au na nuitaki vakacava ni wasea na Nona loloma vei ira na tani ni dredre tu me au vakila vakai au ena so na gauna?

Ke kilai tu na ka veilecayaki oqo, e sega nio iko ga.

Dua na ivadi levu sara ni vunica oya me valuta na kilai vinaka ni keda ivakatakilakila vakalou. A vakatavulica o Elder Brian K. Taylor ena Vitusagavulu, “Sa kaukauwa sara na ivalu levu oqo ena ivakatakilakila vakalou ni saga totolo tu o Setani me vakarusa na vakabauta kei na kila ni noda veiwekani kei na Kalou.”

Vinaka ga, ni sa vakatavulica na Tamada Vakalomalagi—ka tomana me vakatavulici—ira na Luvena ena kedra yaga. Mai na kena ivakatekivu, era a rairai lomatarotarotaka na tamata ena ivolanikalou eso na taro vataga e rawa ni tiko vei kedaru nikua.

Nio vulica na Veiyalayalati Makawa ena yabaki oqo, o rawa ni vulica na nomu ivakatakilakila vakalou ena tutaki ni ka era sotava na tamata ena ivolanikalou kina nomu bula. E rawa nio raica na isau ni taro kina dua nataro bibi sara:

O cei o au?

E dusia na itekitekivu ni gagadre ni bula vakatamata o Atama kei Ivi ena kilai vinaka ni vakatakilakila vakalou. A buli rau na Tamada Vakalomalagi me ucui Koya, me rau lewa na ka kecega e vuravura kei na ibulibuli kece sara, ka vakarota me rau vakaluveni ka vakatawai vuravura (raica na Mosese 2:26–28).

Vaka kawa i Atama kei Ivi, o rawa ni tutaka na veivakavuvuli vataga oqo ni vakatakilakila vei iko. O iko na luvena vakayalo dina na Kalou ena itavi vakalou mo cakacaka vaka dauveiqaravi yalomatua ka tara e dua na matavuvale tawamudu.

Ni sa kania o Atama kei Ivi na vua ni kau ni kila na vinaka kei na ca, rau sa vakasavi tani mai na Were ko Iteni. Dina ga ni rau muduki tani mai na iserau ni Tamada Vakalomalagi, vakayago ka vakayalo, a vakarautaka o Koya e dua na iVakabula me vukei rau ni ulabaleta na mate vakayago ka vakayalo ena Veisorovaki i Jisu Karisito.

Vakataki Atama kei Ivi, na nomu yaga sa “ka levu ena mata ni Kalou” (Vunau kei na Veiyalayalati 18:10).

Na italanoa i Eparaama sa semati vakadodonu kina ivakatakilakila vakalou. A yalataka na Turaga vei Eparaama na veika tawamudu:

“Kau na vakayacori iko mo matanitu levu, ia kau na vakalougatataki iko, ka vakarogorogoya na yacamu; ia ko na vu ni veivakalougatataki:

“Ia kau na vakalougatataki ira era vosavakalougatataki iko, ka cudruvi koya sa rukaki iko: ena kalougata talega ena vukumu na veimataqali kecega e vuravura” (Nai Vakatekivu 12:2–3).

Oti e vuqa na yabaki ni wawa ena vakabauta, a vakalougatataki o Eparaama kei Sera ena sucu ni luvedrau tagane, o Aisake. A qai vakaroti Eparaama na Kalou me cabori Aisake me “ivakatakarakara ni Kalou kei na Luvena e Duabau ga” (Jekope 4:5). Ni sa vakaraitaka o Eparama na nona lomasoli me vakacaboisoro, a tarovi koya e dua na agilosi ni Turaga.

Eda wilika:

“Sa vaka ko Jiova, au sa bubului kina yacaqu, nio sa cakava na ka oqo, ka sa sega ni bureitaka na luvemu, na luvemuni e dua bauga:

“Au na vakalougatataki iko vakalevu, ka vakavuqataka vakalevu na nomu kawa mera vaka na kalokalo ni lomalagi, kei na nuku mai matasawa; ia ena taukena na matamata ni koro ni nodra meca ko ira na nomu;

“Ena kalougata talega na veimatanitu kecega e vuravura ena nomu kawa; nio a vakarorogo kina domoqu” (Nai Vakatekivu 22:16–18).

Sa vakatavulica na italanoa qaqa oqo ni rawa ni rawata o ira kece ka cakava ka muria na veiyalayalati ni Tamada Vakalomalagi na veivakalougatataki a yalataki ki na kawa i Eparaama. Vaka na gone ni veiyalayalati, o rawa ni ciqoma na veivakalougatataki yalataki ni veiyalayalati vaka Eparaama ena kukube tu kina yalayala o vakayacora kei na Turaga ena veiyalayalati ni papitaiso se valetabu.

O Eka—na dauveiqaravi i Sera ka tinai Isimeli—sa vakatavulica keda vakavinaka ena gugumatua. Ni oti na sucu i Aisake, na luvei Eparaama kei Sera, a vakatikitikitaki o Eka kei Isimeli kina vanua dravuisiga (raica na Nai Vakatekivu 21:9–14).

Ni raica na Turaga na yaluma kei na vakatakekere dina i Eka ena vuku ni bula i Isimeli, a tala o Koya e dua na agilosi me vakacegui koya: “Kakua ni rere; ni sa rogoca na Kalou na domo ni gone ena tikina sa koto kina. Mo tucake, mo keveta cake na gone, ka taura e ligamu; niu na vakamatanitulevutaki koya” (Nai Vakatekivu 21:17–18).

Ni vakila vakaoti tu madaga o Eka na bula galili ena vanua dravuisiga, a sega ni biuti koya na Tamada Vakalomalagi. Sa taqomaki o koya ka vukei ena nona vakabauta kei na gugumatua.

Vakataki Eka, o na rairai vakila nio lakosese tu vakai iko ena vanua dravuisiga. Ia o sa yaga vakalevu sara vua na Tamamu Vakalomalagi. O rawa ni lakosese ena vanua dravuisiga ena dua na gauna, ia e sega ni guilecavi iko o Koya. Sa vakarautaki iko tiko o Koya kina veika levu ena tarai cake ni Nona matanitu.

A kacivi Mosese na Tamada Vakalomalagi me sereki ira na Isireli mai na veivakabobulataki e Ijipita. A vakayacora e vica na cakamana qaqa e muataki tu kina nodra vagalalataki (raica na Lako Yani 7; 14).

Dina ga ni rawata ena nona veikacivi, a sega ni dau yalodei o Mosese ena veika a kerei koya kina na Tamada Vakalomalagi me kitaka. Ni vakatakila tu o Mosese na nona yalolailai, a sauma na Turaga, “Au na tiko vakaidina kei iko; ia oqo sa kena ivakatakilakila vei iko, niu sa talai iko: Nio sa kauti ira tani na tamata mai Ijipita, dou na qarava na Kalou ena ulunivanua oqo” (Lako Yani 3:12).

A ciqoma o Mosese na nona ivakatakilakila vaka luve ni Kalou ka rawata na kaukauwa ni Tamada Vakalomalagi me vakayacora na Nona cakamana. Vakataki Mosese, o rawa ni rawata na kaukauwa mo kitaka na cakacaka ni Kalou nio vakaveiwekanitaki iko tawamudu kei na Tamada Vakalomalagi.

Ia, o cei o Iko?

Sa kena gauna oqo mo dikeva kina vakai iko na isaunitaro.

Vakasaqara na ivolanikalou ena isau ni nomu vakatataro, ka na raica dina. E vinakati na Tamada Vakalomalagi mo kilai iko vakavinaka sara mo rawa ni lomani iko me vaka na Nona lomani iko.

Na kilaka ni nomu vakatakilakila vakalou, tawamudu sa voleka tu ga—ia na cava o waraka tiko?