“Ena Nona Veitalai,” Liaona, Maji 2026.
Domodra na Yalododonu Edaidai
Ena Nona Veitalai
Au sega ni kila na sala meu tukuna kina matavuvale na leqa ni luvedratou yalewa me yacova ni sa vukei au na Yalo Tabu.
Droini mai vei Briana Kranz
Ke sa ka vakamosiyalo vakalevu kina tamata na vosota ni yali bibi, tawanamaki ni dua na daulomani, au nanuma na ikarua ni ka mosimosi levu e rawa ni yaco ni raica na matai ni dauveivuke ena mata i tina kei tama ka tukuna vei rau ni sa mate na luvedrau.
Dua na mataka au talai meu lai vakadewataka kina dua na matavuvale ni sa mate na luvedrau yalewa gone duadua ni draiva tiko i vale mai koronivuli. E moce ni taura tu na iuli ka mate ena gauna vata ga ni dri tani na nona motoka mai na gaunisala ka coqa bibi sara. Oqo ena mataka ni Siganimate.
Au ririkotaka na mosi au na vakavuna kina matavuvale oqo. Ena so na sala tani, e via vaka tu ni sa na baleti au na voroki ni matavuvale ena itukutuku oqo.
Au qirita na lali ni katuba, ka basika e dua na turaga. E sota na matai keirau ena iloilo ni katuba. E kidacala o koya, e veilecayaki na irairai ni matana. Kila o koya na noqu yaco yani e tukuna na yali ni luvena yalewa. Vakasauri, au ciqoma e dua na veivakauqeti vakayalo:
“Jason, guilecavi iko. O sa tiko ena noqu veitalai ka tu vei iko na noqu kaukauwa. Vakayagataka. Nuitaka. Na Yalo Tabu ena tuberi iko mo kila vinaka kei na vakatulewa mana vei ira ka saqati se veilecayaki tu.”
A dolava na turaga na katuba e kukube ka sakure. Na nuidei vakayalo e sosomitaka na noqu yalolailai niu vakatakilai au ka kerea meu curu i loma. Niu vaqaqacotaki tu ena Yalotabu, e luvuci dina na lomaqu me baleti koya. Au via oka tu ena nona rarawa, luluvu vata kei koya, ka tagi vata kei koya (raica na Mosaia 18:8–9), ena vakanananu ni na vakalailaitaka na nona rarawa ke au vakayacora.
Keirau lakova sobu e dua na salaniolo lekaleka ki na rumu e kumuni tu kina na watina kei ira na gone. Ena veivaqaqacotaki ni Yalo Tabu, e dei ka matata na noqu vakasama. Au sauma na nodrau vakatataro ka qai wasea na noqu vakadinadina ena vuku i Jisu Karisito, Nona solibula kei na Tucaketale, rau na raica tale na luvedrau yalewa.
Ena ka sotavi oqo, na noqu vakabauta na Turaga e kovuti ena vakanuinui. Au nuitaka ni vakakina vei rau.
A vakatavulica o Elder Paul B. Pieper ena Vitusagavulu, “Ena so na gauna na sala vinaka duadua me vulici kina na vakararavi vua na Kalou oya meda nuitaki Koya ga.”
Na vakararavi vua na Turaga e vaqaqacotaki au meu vukei ira na tani. E vaqaqacotaka talega na noqu vakadinadina ka dolava na sala ni madigi eso ni nodra qaravi na tani ena Vukuna.