Na Lakosivia kei na Siganimate

Mai vei David A. Edwards

Mekasini ni Lotu

Raica na walewale eso ni Lakosivia e rawa ni dusimaki keda ki na solibula veisorovaki i Jisu Karisito kei na noda veiyalayalati kei na Kalou.

Na Lakosivia e vakananuma na veisereki ni Turaga vei ira na tamata na Isireli mai na iotioti ni mate veivakarusai e Ijipita. Mai vei Mosese, sa tukuna na Turaga mera qarava eso na cakacaka vakatabakidua me rawa ni na lako siviti ira na agilosi veivakarusai ka vakabula na nodra ulumatua. Sa qai sereki ira na Turaga mai na veivakabobulataki ka vakauti ira ki na vanua yalataki. (Raica na Lako Yani 12.)

Na veiwalewale ni Lakosivia sa matataka na solibula veisorovaki i Jisu Karisito me baleta na noda ivalavala ca, vakakina na noda veiyalayalati kei na Kalou.

Lami

E dua na lami tagane yabaki dua tawacala.

Sa vakamatei ka qai tavu ena bukawaqa, taucoko—sega na sui e ramusu kei na uluna, yavana, ka tu taucoko na veitikina eloma. Me na laukana tu ena bogi ni Lakosivia, sega tale na ka me vo ena mataka. Ke vo e dua na ka, me na vakamai.

Rawa ni kena ibalebale: Jisu Karisito vaka solibula tawacala ni valavala ca; na kamica ni lako tu ki Vua e veibasaikaya na velavela ni valavala ca; na yalodina vakaoti i Karisito ki na Nona ilesilesi; na yalodina e gadrevi vei ira ka sa veiyalayalati kei na Kalou.

Dra ena Dela kei na Duru

Sa toni na hyssop (dua na kau e qai vakayagataki emuri ena cakacaka ni veivakasavasavataki) ena beseni dra ni lami, ka qai tutuvaki na dra ena dela kei na duru ni katuba.

Rawa ni kena ibalebale: Dua na vakatakarakara e vakatakilai ira na tamata ni veiyalayalati ni Kalou; veivakasavasavataki ena dra i Jisu Karisito, ka sa liviraki me bokoci kina na noda ivalavala ca.

Madrai Sega ni Vakaleveni

Na madrai e sega ni caka ena isi se leveni tale eso, vakalevu mai na emmer witi, bali, se sorghum e Ijipita na gauna eliu. Na leveni e vakamalumutaka na madrai ia e rawa ni vakavuna talega me vuca. Vakakina, na leveni bali oti sa gadreva na gauna me tubu kina, sa balavu tu na kena caka.

E laukana tu me vitu na siga. Leveni (ka semati tu ki na cakaca) sa dodonu me vagalalataki mai na itikotiko yadua ena gauna oqo (raica na Lako Yani 12:19).

Rawa ni kena ibalebale: Savavuka; vakusakusa ena drotaka na bobula; O Karisito na Madrai ni Bula (raica na 1 Korinica 5:7).

Draunikau Wiwi

Oka kina na otakarisi, radishes, endive, horseradish, kei na so tale na draunikau e wiwi tu.

Era sa laukana vata kei na lami.

Rawa ni kena ibalebale: Na totowiwi ni veivakabobulataki kei na tiko vakavesu e Ijipita; totowiwi ni veivakabobulataki ni valavala ca; totowiwi ena vakararawataki i Karisito ena vuku ni noda ivalavala ca.

Buki na Tolo, Vakaivava na Yava, iTitoko ena Liga, Duri ni Kana Tu

Rawa ni kena ibalebale: Tuvakarau ena drotaka na bobula; gagadre ni veivagalalataki mai na ivalavala ca.

Lakosivia Mareqeti Eso kei Jisu Karisito

Lakosivia ena Yabaki 12: Raica o rau na Nona itubutubu ni vosa tiko vei ira na ivakavuvuli ena vale ni soro (“Drau sa sega beka ni kila ni sa kilikili kei au meu tiko ena vale nei Tamaqu?”)—raica na Luke 2:41–49.

Matai ni Lakosivia ni Nona iLesilesi: Vakasavasavataki ni vale ni soro (“Kakua ni cakava na vale nei Tamaqu me vale ni veivoli”)—raica na Joni 2:13–17.

Karua ni Lakosivia ni Nona iLesilesi: Cakamana ni buli madrai kei na ika (“Koi au na madrai ni bula”)—raica na Joni 6.

Katolu ni Lakosivia ni Nona iLesilesi: iOtioti ni Kana Vata (“Dou cakava oqo mo dou vakananumi au kina”)—raica na Luke 22:7–20.

3 ni Epereli, 1836: Ena Sigatabu ni Siganimate 1836, nai karua ni siga ni Lakosivia, a rairai vei Josefa Simici kei Oliva Kaudari na iVakabula ena Valetabu e Kirtland—raica na Vunau kei na Veiyalayalati 110:1–10.