Ko Kaiafa na Bete Levu

Se cava sara na nona itavi kilai levu, e sega soti ni levu na ka e kilai me baleti Kaiafa. E cavuti walega vakaciwa ena Veiyalayalati Vou. A veiqaravi vaka-mata vei ira na Jiu kei na Roma. O koya e dua na itokani i Setoki e dua na mataqali vei ira na Jiu ena gauna i Karisito ka sega ni vakabauta na tucake tale (raica na Cakacaka 23:8).

A vosa o Kaiafa ena matabose ni oti na nona vakaturi Lasarusa mai na mate na Karisito, e dua na cakamana ka na vakaleqai koya kei ira tale eso na itokani i Setoki ena vuku ni nodra vakabauta.

Era sa qai vakadeitaka na matabose ni kevaka era sega ni vakayacora e dua na ka me baleta na cakamana kilai levu oqo, era na vakabauta na tamata ni o Jisu na Mesaia, na Nodra Tui na Jiu, “era na lako mai na Kai Roma ka kauta tani na noda vanua kei na noda matanitu” (Joni 11:48).

“Dou sa sega sara ni kila e dua na ka,” a sauma ko Kaiafa, “se vakasamataka ni sa kilikili me mate e dua na tamata ena vukudra na tamata, ka me kakua ni rusa na matanitu taucoko” (Joni 11:49–50).

E tukuna na iApositolo o Joni ni sa vosa ko Kaiafa ka “sega ni baleti koya: ia ni sa bete levu ena yabaki ko ya, sa parofisaitaka ni na mate ko Jisu ena vuku ni matanitu ko ya;

“Ia e sega ni o koya wale ga na matanitu oqori, ia me vakasoqoni ira vata talega na luve ni Kalou era sa veiseyaki tu e veivanua” (Joni 11:51–52).

Ena basika tale na yacai Kaiafa ena Veiyalayalati Vou ni vakatarogi tiko na Karisito ni bera nona Vakamatei ena Kauveilatai.

“A sa qai vosa na bete levu ka kaya vua, au vakaroti iko matua ena mata ni Kalou bula, mo tukuna mai vei keitou se o iko na Karisito, na luve ni Kalou se segai” (Maciu 26:63).

Sa kaya vua ko Jisu, ko sa kaya dina mai; “Ia kau sa kaya talega vei kemudou, Ena gauna maimuri dou na raica na luve ni tamata ni sa tiko ena liga imatai i Koya sa kaukauwa, ni sa lako talega mai ena veio ni lomalagi” (Maciu 26:64). Me isau ni ka oqo, a sega tale ni vakalewa na iVakabula o Kaiafa. “Sa qai dresulaka na nona isulu na bete levu, ka kaya, sa qai vosavakacacataka na Kalou ko Koya; sa yaga vakacava me so tale na ivakadinadina? raica dou sa rogoca ga na nona vosavakacacataka na Kalou” (Maciu 26:65).

E dina ga ni a tiko ena iserau ni iVakabula kei vuravura, o koya sa lesi taumada me sorovaka na ivalavala ca ni kawatamata ka sotava na mosi kecega, yaluma, kei na vakararawataki, a sega ni kila ko Kaiafa ni o Jisu na Karisito, ka sa vakacacani Koya.

E cavuti tale na Kaiafa ena iVolatabu ena Cakacaka 4. E tukuni ena ivolatukutuku na sala a vakabula kina o Pita na iApositolo e dua na tamata a lokiloki ni sucu mai (raica na Cakacaka 3:1–8). Ia, ni rau sa vunautaka tiko o koya kei Joni na Tucaketale i Karisito, erau a vesu ena nodra lewa na Sanedrini. Erau a vesu tu ena bogi taucoko ka kau mai ki na dua na matabose ka okati kina o Kaiafa kei na tamai watina, o Anasa, na bete levu e liu. (Raica na Cakacaka 4:1–6; raica talega na Joni 18:13.)

Ni tarogi se ena kaukauwa cava eratou vakabula kina na tamata oya, a sauma o Pita “Mo ni kila kecega, kei ira kecega na Isireli, ni ena yaca i Jisu Karisito na kai Nasareci, ko koya ko ni a vakota ki na kauveilatai, ko koya sa vakatura cake tale na Kalou mai na mate, ia ena vukuna ga sa tu kina eke ko koya oqo a tamata lokiloki e liu e na matamuni ka sa bula vinaka” (Acts 4:10).

Oqo na iotioti ni madigi ka volai a rawa kina vei Kaiafa me ciqomi Karisito. Ia, a vakarerei Pita kei Joni na matabose oya. Ia na nodra veivakarerei a sega ni veisautaka na dina ni bula tiko na Karisito. Raica Cakacaka 4:13–22.)

Mai na kaukauwa kei na lewa nei Jisu Karisito, a vakabula kina o Pita na tamata lokiloki. Sa vakakina, na cakamana e rawa ni yaco nikua ena vuku ni matabete vakalesui mai i Karisito kei na vakabauta na Yacana. Na lesoni e rawa ni da vulica mai vei Kaiafa e rawarawa. A sega ni ciqoma o koya nio Jisu na Karisito, na Luve ni Kalou, ia e rawa vei keda. Ni da vakabauti Koya, na ivakatakilakila, veika veivakurabuitaki, kei na cakamana ena muri mai (raica Marika 16:17–18).