Tamata Yalodina—Tisaipeli i Jisu Karisito

E tiko enaMaciu 25 e tolu na vosa vakatautauvata doudou. Matai, na vosa vakatautauvata ni tini na goneyalewa (raica na tikina 1–13). Lima e vuku ka lima e lialia. Na lewe tini a tiko taucoko ena vanua donu, waraka tiko na tagane sa qai vakawati, ka ra dui kauta mai na nodra cina.

Ni sa basika na tagane sa qai vakawati—matataka tiko na iVakabula—ena auwa tawanamaki na bogilevu, lima na goneyalewa a sega ni veirauti tu na nodratou waiwai ni cina. Rairai ratou nanuma ni sega soti ni yaga me tiko na ikuri ni waiwai. Se ratou sega tu ni tamata nuitaki sara ena waiwai e tiko vei ratou. Ena vakawelewele, ratou a sega sara ni vakarau vinaka ni waqaca tu na nodratou cina.

Mani yaco, me isau ni nodratou vakatakekere ni curu ki na vakayakavi ni vakamau, a sauma na tagane sa qai vakawati, “Dou sa sega ni kilai au” (Vakadewa i Josefa Simici, Maciu 25:11 [ena Maciu 25:12, ivakamacala e botona a]). Vakavosa, sa vakaraitaka qo ni mai na nodratou vakavakarau kei na lewa vuku, na yalewa vuku e lima sa kilai Koya.

Na waiwai mareqeti sa rawa ni laurai me nodratou saumaki vakairatou. E vakatarai ratou na yalewa vuku ni waqaca na nodratou cina ka tiko ena kana magiti ni vakamau kei na tagane sa qai vakawati. Na waiwai e sega ni rawa ni wasei ki na nodratou itokani baleta na saumaki vakaiiko sai koya saraga oya—vakaiiko. E rawa ka dodonu meda taura cake na rarama ni noda cina me veilaveti ka vaqaqacotaki ka sureti ira na tani kivei Jisu Karisito, ia eda sa ivakalesilesi yadua ni noda saumaki vakaikeda.

Me vaka a tukuna na iVakabula, “[Mo] yalodina, ka dau masu tikoga, me vakarau tu na [nomu] cina ka me waqa tikoga, ka me tu ga vei [iko] na waiwai, mo [na] vakarau tu ena gauna sa yaco mai kina na Tagane sa qai Vakawati” (Vunau kei na Veiyalayalati 33:17; vakamatatataki).

Na ikarua ni vosa vakatautauvata e tukuni ena Maciu 25 oya baleta na taledi eso (raica na tikina e 14–30). Ena italanoa oya, na turaga, ni nanamaki tu ki na ilakolako yawa, a solia na taledi eso ki na tolu na nona tamata cakacaka. Na “taledi” e matataka na ilavo. E rawa talega ni vakatakarakarataka na isolisoli, kilaka, kei na veivakalougatataki eso mai vua na Tamada Vakalomalagi. Kina dua na tamata cakacaka a solia na turaga e lima na taledi, kina dua tale rua na taledi, kei na ikatolu a solia e dua na taledi. Sa qai cavutu na turaga ena nona ilakolako.

Ni sa lesu mai, a raica o koya ni tamata cakacaka a soli vei rau e lima na taledi kei na rua na taledi sa ivakalesilesi yalodina ka qaqa ka sa vakayagataka vakavinaka na taledi, vakaruataka tu na kena levu. Ni rau yalodina tu ena ka lailai, sa solia vakalevu vei rau na turaga, ka kaya “E vinaka, a tamata vinaka ka dina: ko sa dina ena ka e vica ga, au na lesi iko mo lewa na ka e vuqa: curu kina marau ni nomu turaga” (tikina e 21).

Ni veibasai, na tamata cakacaka ni dua na taledi sa buluta —baleta beka ni a vagolei tani ka lokuyara tu. Se lomaleqataka beka o koya na sala me tekivu kina se rere ni na sega ni rawata. Rairai a vakatauvatani koya kina tamata cakacaka e rua, ka sa tarovi koya na nona vakatitiqa me tovolea tu. A sega ni vakavakarau tu kina lesu mai ni turaga, a sega ni vakila tu na reki ni lesilesi yalodina, ka sa vakayalia na nona taledi.

Sa tautauvata na vosa vakatautauvata ni tini na goneyalewa kei na vosa vakatautauvata ni taledi. Rau vakadreta ni sa tiko na noda itavi vakayadua kina noda saumaki ka vakarautaki keda tu ni ciqoma na isolisoli ni bula vakacerecerei ni Turaga—ka sa tiko na noda ilesilesi kei na vakatulewa vakataki keda ena taledi kei na isolisoli eso sa soli vei keda.

Kena itinitini, e tukuna na Maciu 25 na kedra italanoa o ira ka “yalodei tu ena mata ni Kalou,” ka vakamacalataki me sipi ni Vakatawa Vinaka, kune ena Yasana imatau, marautaka tu kei Koya na magiti ni vakamau, ka vakalougatataki mera iliuliu ena vuqa na ka (raica na tikina 31–40). Ena kaya vei ira na Turaga:

“Ni au a viakana, ka ni a solia mai vei au na kakana: au a viagunu, ka ni a vagunuvi au: au a vulagi, ka ni a kauti au ki vale:

“Luvawale, ka ni vakasulumi au: au a tauvimate, ka ni a mai raici au: au a tiko ena vale ni veivesu, ka ni lako mai vei au” (Maciu 25:35–36).

Vaka Nona tisaipeli, eda sa vakarautaki keda ki nai Karua ni Nona Lesu Mai ka cakacakataka noda ilesilesi ena yalodina kei na qaqa ena ka eda sa vakalougatataki tu kina. Na yalololoma, loloma uasivi, ivalavala dodonu, kei na ilesilesi yalodina sa vakatarai keda sega walega ni bula malua vata kei Koya ia meda yalodei talega oqo kivua na Kalou. Me vaka a vakatavulica o Momani, vei ira ka sa vakasinaiti ena loloma cecere—na loloma savasava i Karisito—ena “vinaka vei ira” ena siga mai muri. Era na vakataka na iVakabula, raici Koya tu vakataki Koya ka vakasinaiti tu ena nuinui ka vakasavasavataki me vaka sa savavuka ko Koya. (Raica na Moronai 7:47–48). A cauraka o Peresitedi Nelson, “Na loloma cecere kei na valavala dodonu sa tadolava na sala ni kena rawati na yalodei ena mata ni Kalou!”

Shepherd—Variation IV, mai vei Jorge Cocco

Na tolu na vosa vakatautauvata kece oqo e vakatavulica na ilesilesi ni noda saumaki; ena isolisoli, taledi, kei na iyautaukeni eso eda sa vakalougatataki tu kina; vakakina o ira na wekada ka viakana, sega ni vakavale, rarawa, ka oca.

Era vakatavulica na sala mera vakavakarau kina na tisaipeli i Karisito ki na veigauna drakidrakita ena vakaliuca na iKarua ni Lesu Mai ni iVakabula. Oqo na gauna eda sa bula tiko kina! Me sa waqa rarama tiko na noda cina ni saumaki, me caudre tiko na noda rarama, vakayagataka ka vakalevutaka tiko noda taledi, ka vukei ira na vakaleqai tu. Oqo sa vu mai na loloma cecere, na loloma savavuka i Karisito.