Koi Au, Noqu Turaga

A yalataka na Turaga na kawa vakaitamera vei Eparaama kei Sera. Na veivakalougatataki oya a taura toka na gauna me yaco kina, se, a yaco tu ena gauna ni Turaga. Ia, a vakatovolea na Turaga na vakabauta i Eparaama ena Nona kerei koya me cabora na luvena tagane, o Aisake, na vu ni veivakalougatataki rau a masulaka ka waraka tu vakadede. Eda sa na rairai wilika vakavuqa na itukutuku oqo, ia sa vakavica na noda vakatauvatani Eparaama kina noda bula?

Sa ka dredre me raitayaloyalotaki tu na yalo ni dua na tama malua ni bera na ilesilesi vakaoya. Ia, na cikecike i Eparaama ni navuca me talairawarawa e vakurabuitaki au saraga ena nona vakarau tu me gole ki na ulunivanua e Moraia ka cabora na isoro e kerei. Ena ivakaraitaki ni lomasoli kei na talairawarawa kina loma ni Tamada Vakalomalagi, na nona isaunitaro e dua tu ga, “Koi Au, Noqu Turaga.” (Raica na Nai Vakatekivu 22:1–2.)

Me isau ni nona talairawarawa, a vakalougatataki o koya ena maroroi ni bula i Aisake, vakakina na veivakalougatataki totoka ka tawayalani me baleti koya, Sera, kei na nodrau kawa (raica na Nai Vakatekivu 22:15–18).

Na Solibula ni iVakabula

Sega na vakatitiqa, ni sa yavutaki kivua na iVakabula, o Jisu Karisito, na ivakaraitaki cecere duadua ni talairawarawa kei na solibula vua na Tamada Vakalomalagi. A vakaraitaka na Nona lomasoli me talairawarawa ena Nona lako mai ki na vuravura oqo; mai papitaisotaki, savasava ka vinaka sara, kei na soli ni Nona bula me isoro ka colata ga ki Vua na mosi kei na tauvimate, veivakararawataki, malumalumu, ivalavala ca, kei na mate, me vukei ira kina na Nona tamata me vaka na nodra veimalumalumu (raica na Alama 7:11–13).

Sa bibi sara na ka a sotavi ni, dua na gauna, a vakavuna Vua me taroga ke tiko e dua tale na sala me vakatikitiki kina na bilo wiwi oya. A qai kaya vakasauri, “Ia, me kakua ni yaco na noqu lewa, ia me yaco ga na nomuni lewa” (Luke 22:42)—ena dua tale na kena vosa, “Koi au, noqu Turaga”—sa vakaraitaki kina na Nona lomasoli me cakava na lomai Tamada.

E rawa vakacava nida usumaka na lomasoli oya me dolei na “Koi au, noqu Turaga” me isau ni vakatakekere kecega e vakayacora vei keda na Tamada Vakalomalagi vaka lewe ni Lotu, se na noda bula yadua eso na gauna?

A vakatavulica o Paula vei ira mai Roma, “Na loloma sa taucoko kina na ivunau” (Roma 13:10). Ke au via raica e dua na vosa e sosomitaka vakatautauvata na malanivosa “taucoko kina na ivunau,” au nanuma na vosa talairawarawa e rawa ni votu totolo. Oya na vuna, eda rawa ni kaya kina ni sa talairawarawa na loloma. Sa vakaibalebale vakalevu kina na vosa ni iVakabula “Kevaka dou sa lomani au, dou talairawarawa ki na noqu vunau” (Joni 14:15).

Eda rawa ni sausaumi ena “Koi au, noqu Turaga” se, ena vosa i Nifai, “Au na lako ka kitaka” (1 Nifai 3:7). Ena noda vosa ni gauna oqo, eda rawa ni kaya, “E dina au sa lomasoli tu ni cakava na ka sa vakarota na Tamada Vakalomalagi, se cava ga na kena ituvaki.”

Na ka au na via vakadreta, oya, na isema ni loloma-talairawarawa, e kena ibalebale ni da talairawarawa kivua na Tamada baleta ni da lomani Koya. Au vakabauta na digidigi ni talairawarawa sa dua na sala uasivi sara me vakatakilai vakamatata kina na noda lomani Koya. “Na vakabauta e sega ni cakacakataki e sa mate” (Jemesa 2:26), ka au sega ni nanuma ni bula sara tale tu ga na loloma kivua na Tamada Vakalomalagi kei Jisu Karisito ke sega na talairawarawa.

Eda na vakalevutaka vakacava na noda lomani Koya kei na noda talairawarawa ki Vua? A kaya na iVakabula, “Ia sai koya oqo na bula tawamudu, me ra kilai kemuni na Kalou dina duadua ga, kei Jisu Karisito ko koya ko ni a tala mai” (Joni 17:3). Na kilai Jisu Karisito—ka, mai Vua, na Tamada—sa rawa kina meda kila na loloma e tiko vei Rau me baleti keda kei na veika tawavakamacalataki rawa Rau sa cakava ka na cakava tu vei keda, oka kina na veigauna dredre eda sotava tu ena bula oqo. Na Nodrau kilai sa veisautaka na lomada, ka vakavuna na gagadre meda muria na Nodrau ivakaraitaki ena noda ivalavala ka lomasoli tu ni kaya, ena vosa kei na ivalavala, “Koi au, noqu Turaga.” Na lomasoli oqo sa ivakaraitaki ni gagadre ni wilika na ivolanikalou se na kaci vua na Tamada Vakalomalagi ena masumasu.

“Koi au, noqu Turaga” sa rawa ni sausaumi ki na veikacivi ni veiqaravi vakaulotu se ki na vakatabui vakalevu cake ni talairawarawa ki na ivunau vakataka na rokovi ni Siga ni Vakacecegu, dokai ni noda itubutubu, se na segati ni tutaka na bula savasava. “Koi au, noqu Turaga” sa ivakaraitaki tu ni kedra idivi na tisaipeli i Karisito, ena gauna madaga e rawa kina na ka eda gadreva vakalevu se tauca kina vakabibi na kena isau na kerei ni solibula.

Na lomasoli ni talairawarawa oqo sa yaga vakalevu, vakabibi ena veiyalayalati eda vakayacora ni da papitaiso se curuma na valetabu. O rawa li ni raitayaloyalotaka na ituvaki ni noda bula kevaka eda vakasamataka tu ga, “Koi au, noqu Turaga” ni da taura na yaca i Karisito se dau nanumi Koya ka muria na Nona ivunau? Na vakayagataki ni sakaramede sa sureti keda ni vakavoutaka na veidinadinati oya, ka sa dodonu me vakaraitaki tu ena noda ivalavala ena loma ni macawa. E tautauvata tu ni da gole kina valetabu ni da cakava se nanuma na veiyalayalati eda vakayacora ekea.

Au nanuma lesu e dua na veitalanoa kei na dua na veiwatini vou ena vuqa na yabaki sa oti ni au veiqaravi tu vaka bisopi. Dua na bogi, a drakidrakita ka balavu sara na nodrau veivosaki me baleta na saumi ni katini. A lako curuma na turaga watina e dua na macawa dredre vakacakacaka ka vinakata me maroroya na ilavo a rawata me baleta eso na nodrau sausaumi vakairau. Ia, au nanuma na vosa i watina gone ni, ena matai watina, a kaya, “Bisopi, au sa lomasoli me au kua ni cakava na sausami oya ka tarova tu noqu kana, ke gadrevi, ia au via sauma na ikatini ka talairawarawa vua na Turaga.”

Sa veivauqeti dina na “Koi au, noqu Turaga” oya, a vakadinadinataka tu na [marama] gone, ka vakavuna me au vakila kina kei na watina e dua na yalo kaukauwa ena gauna ni veitalanoa. E muri, au sega ni kila ke sa mai na nona gagadre vakaikoya se baleta ni a cikevi koya na watina, ia a mani qai sauma o watina na nona ikatini ena mua ni macawa oya.

Ena Sigatabu ka tarava, ni bera na soqoni, a kerei au na turaga watina me dua na neirau veivosaki totolo. Ena irairai ni matana e duatani mai na macawa sa oti, a tukuna vei au, “Bisopi, o kila au a qai sauma na noqu ikatini ena macawa sa oti, ka au leqataka ni na sega ni rauta na ilavo ni kakana, ia au vinakata ga mo kila ena macawa qo a vakaruataki na levu ni ilavo ni kakana e dau tiko vei keirau. Bisopi, esa dua dina na cakamana, ka au sa via raica tu ga na cakamana oya ki na noqu bula.” Vei au, e sa vaka e tukuna tiko vei au na cauravou oya, “Bisopi, au sa lomasoli tu ni sausaumi ena ‘Koi au, noqu Turaga’ ki na ka kecega e kerei au kina na Kalou.”

E kaya na Turaga ni sa vauci o Koya nida cakava na ka e kerea (raica na Vunau kei na Veiyalayalati 82:10). Eda vakabauta vakaidina li na bibi ni yalayala oya?

De rairai era sega ni basika na veivakalougatataki ena noda gauna se na ivakarau eda vinakata, ia au vakadinadinataka vei kemuni ni sa dina ka dei na yalayala. E vakabibitaka na loloma ki Vua, talairawarawa, na gagadre ni kitaka na Lomana, kei na bula voli vaka tisaipeli i Karisito. Ena vukei keda ka vakalougatataki keda o Koya ni kila vinaka ka maroroya na noda veiyalayalati. Ena ka qori, ni sa kerea o Koya meda kitaka na Lomana, meda sa vakauqeti ni sauma tu “Koi au oqo, noqu Turaga!”