“Thomas: Walking the Faith Journey,” Liaona, Maji. 2026.
Era Kila na iVakabula.
Tomasi: Lakova na iLakolako ni Vakabauta
Na italanoa kei Tomasi e vakaraitaka vei keda ni taro, vosota, kei na rawati ni dua na ivakadinadina e tiki ni kena vakatuburi na noda vakabauta kei na yalodina.
Droini mai vei Laura Serra, me kakua ni lavetaki
Na cava e votu mai ki na nomu vakasama ni ko rogoca na yaca ni tisaipeli ni iVakabula o Tomasi? Eda dau semata wasoma na yacana kei na “vakatitiqa” se “lomalomarua.”
Ia e levu cake sara na ka baleti Tomasi. Ena Kosipeli i Joni, eda raica na ilakolako ni vakabauta nei Tomasi ka rawa me vakalolovirataki keda ga: Na vakabauta e rawa ni vaqaqacotaki ena veigauna ni da vakabauta ka cakacakataka me vakalevutaka noda vakabauta.
“Sa itovo matau tu me tiko na vakatataro.”
A kacivi Tomasi o Jisu Karisito me dua vei ira na Nona iApositolo Le Tinikarua, ka muria o Tomasi na iVakabula ena nona gauna taucoko ni veiqaravi ena tolu na yabaki. Sa dau lomana dina na iVakabula. Ni sa leqataka o Tomasi na bula ni Turaga, a vakauqeti ira na iApositolo tale e so, ”Meda lako talega, me da mate vata kei koya” (Joni 11:16).
Ena nona yalodina, e se taroga tikoga na taro. Ni se bera o Kecisemani, a vakavulici iratou na Nona tisaipeli o Jisu ni na lako tani o Koya. “Kemuni na Turaga, keitou sega ni kila se ko ni sa lako ki vei; ia keitou na kila rawa vakaevei na sala?
“Sa kaya vua ko Jisu, Oi au na sala, kei na vu-ni-dina, kei na vu-ni-bula, sa sega ni torovi Tamaqu walega e dua na tamata, ena vukuqu ga” (Joni 14:5-6
Me vakataki Tomasi, eda na sega beka ni kila vakamatata na ivakavuvuli taucoko ni Kalou se na veitiki kece ni ituvatuva ni veivakabulai. Ia na tarogi ni taro dodonu e rawa ni vakatakila na dina mai vua na Turaga. E gadrevi me tubu kina na noda vakabauta.
A vakatavulica o Peresitedi Russell M. Nelson:
Kevaka e tiko na nomu taro—ka’u nuitaka ni tiko—vakasaqara na kena isau ena gagadre dina mo vakadinata.
“Na nomu taro ena yalodina, tarogi ena vakabauta, ena dau veimuataki ki na vakabauta cecere cake kei na kila ka vakalevu cake .”
Vakabauta Uasivita na Rere
Ni ratou sa rogoca na iApositolo ni sa tucake tale mai na mate ko Jisu, sa “vaka vei iratou ni italanoa walega, ka ratou sega ni vakabauta” (Luke 24:11). Na gauna ni lomatarotaro nei Thomas ena rairai balavu cake mai vei ira na kena vo baleta ni a sega ni tiko o koya ena imatai ni gauna a rairai kina vei ira na Turaga sa tucaketale (raica na Joni 20:24).
Ni ratou tukuna vei Tomasi ni ratou sa raica na iVakabula, a voqa nona vosa, “Kevaka ka’u na sega ni raica na we ni vako ena ligana ka daramaka na noqui qaqalo ki na we ni vako, ka daramaka na ligaqu ki na sarisarina, au na sega ni vakadinata” (Joni 20:25).
Ni oti e walu na siga, a rairai tale mai na Turaga ka vakaroti Tomasi me tara na Nona mavoa. Ena kurabui a qai kaya, “Noqu Turaga, ka noqu Kalou” (Joni 20:28 A sauma vei Tomasi na iVakabula ka kaya, “Sa kalougata ko ira era sa sega ni raica, ka sa vakadinata” (Joni 20:29
Ena yaco mai na kena isau. E vakatavulica o Elder David A. Bednar ena Kuoramu ni iApositolo Le Tinikarua, “Na masu kece sara e dau rogoci ka saumi mai vua na Tamada Vakalomalagi, ia na isau eda na ciqoma ena sega beka ni ka eda namaka se lako mai vei keda ni da vinakata se ena sala eda namaka.”
Na Yalodina e Tudei
Ni da ciqoma na isaunitaro ena noda vosota, masumasu, kei na ivakatakila, eda na rawata talega e dua na veivakadeitaki—e dua na ivakadinadina. Kevaka eda tomana tiko na noda vakania na noda vakabauta, na ivakadinadina oya e rawa ni tikoga vata kei keda ena bula taucoko. Me vaka a vakavulica o Peresitedi Nelson: “Ni o doka ena yalovosota na ituvatuva ni Turaga, ena soli vei iko na vuku kei na kila ka o vakasaqara. Na veivakalougatataki kece ka tiko vua na Turaga me nomu—ia na caka mana talega—ena tarava mai. O ya na ka ena cakava vei iko na ivakatakila yadudua”.
Na veika e sotava o Tomasi e vakaraitaka ni vakabauta e sega ni icavacava ia e dua na iwalewale. Na Kalou ena rokova na ivalavala oya ka vakalougatataki keda ni da tadolava tikoga na Nona veidusimaki ka vakasaqara na ivakadinadina ka vosataka na vakacegu ki yaloda (raica na Vunau kei na Veiyalayalati 88:63).