Vakalougatataki Kece na Matavuvale e Vuravura

O Elder Bruce C. Hafen, e dua na lewe ni Vitusagavulu vakacegu, a ciqoma e dua na qiri ena talevoni mai vua na edita ni dua na mekasini ni tukutuku raraba. A vinakata na edita me veivosaki ena dua na ivola walega oqo e dikeva tu na itukutuku ni vakabauta eso baleta na lomalagi mai vei ira na veimatalotu.

“Era raica na dauvolaivola ni ra sa walokai ena viakana na lewenivanua baleti lomalagi—kei na matavuvale mai lomalagi,” vola tu o Elder Hafen. Ia ni ra se vakabauta tu ga e levu na tamata na bula ni oti na mate, loloma tawamudu, kei na duavata tale ni matavuvale vakalomalagi, “lailai na ka era tukuna e levu na lotu Vakarisito ki na viakana levu qo”—vakavo ga e dua: Na Lotu i Jisu Karisito ni Yalododonu Edaidai.

Ena Lotu vakalesui mai ni iVakabula, e tiko na noda valetabu eso. Eda vakayaco vakamau tawamudu, ena dodonu ni lewa ni veivauci e veivakalougatataka me sivia yani na mate vakayago. Sa noda na yalayala ni dua na gauna muri mai tawamudu kei ira na daulomani ena mata ni Tamada kei na Luvena. Ena ka kece oqo, era tinia na dauvolaivola ni nodra ivakavuvuli na Yalododonu Edaidai me baleti lomalagi sa taucoko vakaoti—kau na vakuria, ka marautaki sara.

“Sa dua dina na vakadidike!” A raica rawa o Elder Hafen. “Levu na tamata nikua e gadreva tu na matavuvale tawamudu, ka sa vakataucokotaka vakavinaka na gagadre oya na [kosipeli vakalesui mai i Jisu Karisito] mai na vo tale ni nanuma eso [se vakabauta vakalotu]. Au diva ke rawa ni rogoca o vuravura taucoko nira lagata na [luveda] na itukutuku rekitaki: ‘Families can be together forever.’”

Na matavuvale e sega ni dua ga na ituvatuva ni veimaliwai veiganiti. Era sa ituvatuva tawamudu ni lomalagi. Era sa “yavu ni tuvatuva ni Dauniveibuli ni nodra icavacava tawamudu na Luvena.” Me vaka a vakatavulica vei keda o Peresitedi Russell M. Nelson: “[Na Turaga] sa bulia na vuravura [me] rawa ni da bula vakayago ka vaka matavuvale. A tauyavutaka na Nona Lotu me vakacerecerea na matavuvale. A vakarautaka na valetabu eso me rawa ni tiko vataga kina na matavuvale.”

Ia na noda kauwaitaka na matavuvale qaqa e sega walega ni baleta na icavacava tawamudu. Sa bibi na itavi ni matavuvale ena noda bula marau talega. Na Tamada Vakalomalagi, ka kila vakavinaka tu na ka e vakavu marau oqo ka tawamudu, sa talai ira na Luvena ki na matavuvale eso—sega tu ni vinaka vakaoti—ka sureti keda meda tara ka bucina na matavuvale kaukauwa. Dina sara, “sa na dui vakatau vei keda na veilecayaki ni yago, mate, se tuvaki tale eso ” Ia e sega na ka e sosomitaka rawa na itavi dolei mareqeti ka vakalou ni turaga kei na marama vakawati, tama kei na tina.

Na vakadidike ena “matavuvale tubutubu-rua vakadra, duavata tu” sa vakaraitaka tikoga ni sa yaga vakalevu sara na matavuvale ena maroroi ni “ivau titobu ni loloma kei na veikauwaitaki.” E sa “idewadewa taumada ki na cokonaki vinaka, tudei, kei na veimaliwai matau ni tamata yadua.”

Vakaidina, e sega ni dodonu meda kurabui ni na sotava na veisaqasaqa na ka bibi eso ki na ituvatuva ni Kalou. E sega ni kauwaitaka tu o Setani na matavuvale, ka sa tosocake tikoga na nona sasaga “ka kila tu ni sa lekaleka na nona gauna” (iVakatakila 12:12). Me vaka a kaya o Peresitedi M. Russell Ballard (1928–2023), Peresitedi Vakatawa ni Kuoramu ni Apositolo Le Tinikarua, “Sa kila tu o Setani ni sala deivaki ka mana duadua ga me vakaseva kina na cakacaka ni Turaga oya me vakamalumalumutaka na ituvaki dei ni matavuvale kei na bula savasava ni tikotiko.”

Ni kila tu na ka eda kila me baleta na matavuvale tawamudu ni Kalou, Nona ituvatuva baleti ira na Luvena, kei na mareqeti tawamudu ni veimaliwai vakamatavuvale, sa dodonu meda maliwai ira tu na dauveitaqomaki gumatua duadua ni matavuvale e vuravura.

Meda cakava vakacava oqo?

A solia na ivakasala oqo o Peresitedi Dallin H. Oaks, na Matai ni Daunivakasala ena Mataveiliutaki Taumada: “Na ivakaro ni matavuvale esa nona veivakadeitaki na Turaga ena dina ni kosipeli eda gadreva me tokoni keda ki na bolebole ni bula oqo ni matavuvale.”

Ena noda bula yadua, eda rawa ni cakava na “veika lalai ka rawarawa” (Alama 37:6) e vaqaqacotaka na veimaliwai vakamatavuvale. Oqo e oka kina na muri ni vakavuvuli ni matavuvale kei na vakawati rawaka e tuvai koto ena ivakaro ni matavuvale: “vakabauta, masumasu, veivutuni, veivosoti, veidokai, veilomani, yalololoma, cakacaka, kei na itaviqaravi momona eso.” Se cava ga na ituvaki ni noda matavuvale ena gauna oqo, eda rawa ni vakaraitaka ena noda ivalavala ni sa ka bibi tawamudu vei keda na veimaliwai vakamatavuvale.

Vaka “lewenivanua nuitaki” ena noda veitikotiko, eda rawa ni “tokona na mosoni oya ka ivakarautaki tu me maroroya ka vaqaqacotaka na matavuvale.”

Eda sa tamata ni veiyalayalati edaidai ni Turaga. Eda sa itaukei ni yalayala a tukuni vei Eparaama, Aisake, kei Jekope—yalayala era tiko kece kina na ka baleta na matavuvale. Sa yaco na yalayala eso oya ena veikacivi tabu me vakalougatataka “na matavuvale kecega e vuravura.” E dua na sala bibi eda cakava kina oya ena bulataki, taqomaki, kei na wasei ni dina tawamudu ni “sa vakadeitaka na matavuvale na Kalou” kei na “cakacaka vakalotu kei na veiyalayalati era tiko ena valetabu sa rawa ki na tamata yadua me lesu tale ki na mata ni Kalou ka duavata tu vakamatavuvale tawamudu.”

Niu sarava kei Sisita Uchtdorf na nodra caka veiyalayalati tabu na lewe ni neitou matavuvale kei na Tamada Vakalomalagi lomani, tawamudu, sa sinai na lomai keirau ena reki kei na vakavinavinaka. Keirau sega ni marautaki ira ga na luvei keirau kei na luvedra ia na neirau itubutubu talega kei na nodrau itubutubu. Eda tugana ena yalololoma na sala esa vakaduavatataki keda kina ena veitabatamata na veiyalayalati ni kosipeli. E dua na veivakauqeti e sega ni vakataka ni raica e “dua na ikabakaba sa tu e vuravura, a sa yacovi lomalagi na muana: ka raica sa kaba cake ka kevu sobu tiko kina ko ira na agilosi ni Kalou” (Nai Vakatekivu 28:12).

Na veivakalougatataki a yalataka na Turaga vei Jekope ena nona tadra sa roboti ira taucoko na Luvena ni veiyalayalati—oka kina o iko kei au. Me vaka a cakava na Turaga vei Jekope, ena sauma vei keda o Koya “ena siga [eda] na rarawa kina” (Nai Vakatekivu 35:3) kevaka eda digitaki Koya.

”Raica,” sa kaya na Turaga, “Au na tiko vata kei iko, ka vakabulai iko ena nomui lakolako kecega, niu na sega ni biuti iko” (Nai Vakatekivu 28:15).

Vakataki Jekope, sa tiko na lekutu meda takosova taucoko. Sa rairai yawa sara eso na gauna na veivakalougatataki yalataki. Ni basika na leqa se bolebole bibi eso, eda rawa ni vaqaqa na loloma ni Turaga. Eda na rairai nanuma ni sa vakawaleni keda na Kalou. Se cava sara na noda vinaka taucoko ena bula vakatisaipeli, eda na rairai nanuma ni da sa sega ni ciqoma tiko na veivakalougatataki eda nuitaka tu.

Kemuni na taciqu kei na ganequ, itokani lomani, na salatu ni veiyalayalati sa salatu marautaki, dina ga ena rairai vakaturuwainimata tu eso na gauna. Kevaka o vakila ni sega ni vakataucokotaka tu na nomu bula ena gauna oqo na tiki eso ni tuvatuva ni marau, yalovinaka nuitaka ni sa kilai iko tu na Turaga ka na vakalougatataki iko ena Nona gauna ga, vaka na Nona yalomatua.

Na vakabauti Jisu Karisito kei na Nona yalayala sa vakauqeti keda meda rai ki liu, sega ki muri. Ena Vukuna, e sega ni dodonu me tarovi na noda gagadre mai muri ena veika sa yaco oti se tabonaka tiko na noda rai ena gauna oqo. Io, eda sa, ka na, vakamavoataki taucoko ena dua ga na sala e rawa. Ia eda sa vakabauta na Dauniveivakabula levu. Eda vakararavi Vua—vakalevu, vakaidina, meda ciqoma na Nona yalayala, vakataucoko “ka tukuni ira,” ena gauna mada ga era se “yawa [tu kina]” (Iperiu 11:13).

“Meda vakananumi taucoko, ena sala kei na gauna ga ni Turaga, e sega na veivakalougatataki ena bureitaki kivei ira na Nona Yalododonu yalodina,” kaya o Peresitedi Nelson. “Na Turaga ena lewa ka sauma na tamata yadua me vaka na gagadre ni lomadra vakakina na cakacaka.”

Au yalataka ni gauna eda muria ka wasea kina na ituvatuva ni Tamada Vakalomalagi baleta na matavuvale, ena tiko vata kei keda o Koya, tokoni keda, ka tomani keda ena noda ilakolako. Ena sega ni biuti keda taudua tu o Koya, vakabibi ni yaco tu vei keda na veivakatovolei se vei ira na noda daulomani. Ena tauri keda o Koya, laveti keda cake, ka kauti keda kina vanua yalataki ni reki vakataucoko kei Koya, kei na Luvena, o Jisu Karisito, kei na noda matavuvale—me tawamudu.