E Rawa Vua na iVakabula Vinaka me Kila e Vakacava Tu ni Sotava na Dredre?

Au nanuma ni sa daumaka sara tu na noqu kaulotu—au tubera tiko e dua na daukaulotu vou, vakavakarau tu kina papitaiso, ka vakamatautaki au voli ena veika vakaulotu. Au marautaka dina.

Ia au sega ni vakila na lomaocaoca kei na nuiqawaqawa mai na vu ni yaloqu.

Au davo sobu koto meu moce ena dua na bogi ni sa tekivu tarai au na ikarua ni lomataqaya au bau sotava ena noqu bula taucoko—na imatai a yaco ni oti e ciwa na yabaki. Ciwa na yabaki!

Cava na vuna, ni oti ga e dua na gauna lailai ni nuiqawaqawa vagone, na kena basika vakasauri tale oqo?

Au tovolea meu tomana na noqu kaulotu, ka nanuma tu niu rawa ni walia na noqu leqa.

Ni veiqali tu na ituvaki ni noqu vakasama, a wasea vei au e dua na rai ni wilika tu na ka a lakocuruma na iVakabula e Kecisemani.

Kaya o Jisu, “Sa rarawa vakalevu na yaloqu, me vaka au na mate.” Sa qai masu na iVakabula, “I Tamaqu, kevaka e rawarawa, me lako tani mada vei au na bilo oqo; ia me kakua ga ni vaka na noqu lewa, me vaka ga na nomu lewa” (Maciu 26:38–39).

O sa bau vakila mada na bibi ni nomu rarawa vakai iko? O sa bau taroga tu na Kalou, “E tiko tale beka e dua na sala?“

Ena lomasoli uasivi, talairawarawa uasivi, kei na loloma uasivi, sa vakayacora kina na noda Dauveivueti na loma i Tamada. E uasivi o Koya baleta ni tawacala, ia e se vakila ga na mosi, rarawa, kei na galili.

Ni sa oti, e lako sobu o Koya na ka kecega—me rawa ni laveti keda cake.

A vakatavulica o Peresitedi Jeffrey R. Holland, na Peresitedi Vakatawa ni Kuoramu ni Apositolo Le Tinikarua, “O Jisu ‘sa tamata daurarawa‘ [Aisea 53:3], e kaya na ivolanikalou. A sotava o Koya na veika rarawa, oca, dredre, kei na galili mosimosi. Ena ka oqo kei na veigauna, sa sega ni mudu na loloma i Jisu, ka sa vakakina na Tamana.”

Na kilai ni veika dredre a sotava na Karisito sa vakananumi au ni kila vinaka tu o Koya na mosi ni yalo, yaluma, lomaocaoca, rarawa, nuiqawaqawa, kei na galili mai vua tale e dua.

Sai Koya e tagi ena mate i Lasarusa (raica na Joni 11:33–36). Ka sai Koya ka taroga ni a rube tu ena kauveilatai, ”Noqu Kalou, noqu Kalou, ko sa biuti au ena vuku ni cava?” (Marika 15:34).

Ia sa kila talega o Jisu Karisito na reki, loloma, yalololoma, loloma veivueti, kei na vakacegu mai vua tale e dua. Ni sa uasivi sara o Koya Ia, e kila vinaka o Koya na veika eda vakila.

A vakadinadinataka o Peresitedi Holland: “Dua na vakacegu levu ena Siganimate oqo oya baleta ni a lakova duadua o Jisu na salatu balavu oya, meda kua kina ni lakova. Na Nona ilakolako e kauta mai e vuqa na rai me baleta na salatu oya—na loloma veivueti ni Tamada Vakalomalagi, na veitokani tawacala ni Luvena Daulomani, na isolisoli cecere ni Yalo Tabu.”

Eda kila nio Jisu Karisito e kila vinaka na veika au vakila ena noqu lomaocaoca, au vakatarai Koya me colata na noqu icolacola.

E sega ni yali vakasauri na noqu lomaocaoca. Au se sotava tikoga na dredre. Ia niu volekati Karisito e solia vei au edua na marau levubaleta niu kila e toka e yasaqu o Koya, ka kaya, ”Au sa kila. Au sa kila vakavinaka na veika o vakila.”

Ena ka sotavi oqo, e yaco me noqu itokani voleka sara o Karisito.

Au kila ni so na gauna eda nanuma ni nona savasava o Kairisito e sa yawa mai vei keda o Koya eda sega ni yacova, ni Nona cakacaka vinaka kei na bula ni cakamana e cakava me dredre kina meda yacovi Koya, valavalaca, ka dokadoka dokadoka. Ia sa sega ni voleka cake o Koya vei keda ena gauna ni noda veiraravui, noda rarawa levu, kei na noda gauna dredre.

Ena Siganimate oqo, meda nanuma ni kila vinaka o Jisu Karisito na sotavi dredre baleta ni sa uasivi o Koya—na tamata duadua ga e rawa ni vakila na noda mosi ka colata na noda icolacola.

Ia, nio sotava na dredre, gole Vua. E kila vakavinaka o Koya.