Matarong nga mga Tinugyanan—Mga Disipulo ni Jesukristo

Ni Presidente Camille N. Johnson

Kinatibuk-ang Presidente sa Relief Society

Tulo ka sambingay ang nagtudlo kabahin sa pagkatinugyanan ug nagpakita og panig-ingnan kon unsaon sa pagpalawom sa atong pagkadisipulo ni Jesukristo.

paghulagway sa sambingay sa napulo ka dalaga

Ang paghimo sa kahayag ni Jesukristo nga mosanag sa atong pagkadisipulo mao ang labing maayong matang sa enerhiya—enerhiya gikan sa usa ka tinubdan nga kanunay nga gipun-an. Pinaagi sa pagdala sa kahupayan ug kahayag ni Kristo ngadto sa uban, makaplagan nato ang atong kaugalingong kahupayan diha Kaniya.

Mao nga magmahimong tigpasiugda og kalinaw sa inyong kaugalingong panimalay ug komunidad ug sa inyong presensiya sa online. Hupaya ang pag-antos sa inyong kaugalingong kasilinganan.

Ang tumong ni Satanas mao nga kita pagaaghaton. Sa kalainan, ang plano sa Amahan sa kalipay naghatag nato og oportunidad sa paglihok, nga mahimong mga tinugyanan alang sa kaayohan, alang sa kalinaw, alang sa paglaom.

Atong mabatokan ang sayop nga impormasyon pinaagi sa pagpakigbahin og makabayaw, malaomon, ug eksakto nga impormasyon, pinaagi sa pagkahimong mga manlalaban sa kamatuoran kaysa sa tigdawat lamang sa impormasyon. Atong matubag ang pagkanegatibo pinaagi sa pagpakaylap ngadto sa kalibotan sa kahayag ug maayong mga balita sa ebanghelyo ni Jesukristo.

Sama sa gipadayag sa atong pinalanggang propeta, si Presidente Russell M. Nelson, ang tubag kanunay mao si Jesukristo: “Bisan unsa nga mga pangutana o mga problema nga ikaw aduna, ang tubag kanunay nga makaplagan diha sa kinabuhi ug mga pagtulun-an ni Jesukristo.”

Si Presidente Nelson midapit nato nga himoon ang atong pagkadisipulo ngadto Kaniya nga atong “kinatas-an nga prayoridad.” Mapalawman nato ang atong pagkadisipulo kon kita makat-on gikan ug mahitungod ni Jesukristo. Mao nga, atong suhiron ang mga pagtulun-an sa Manluluwas.

Ang Napulo ka Dalaga

Ang Mateo 25 adunay tulo ka gisugilon nga mga sambingay. Una, ang sambingay sa napulo ka dalaga (tan-awa sa mga bersikulo 1–13). Maalamon ang lima kanila ug danghag ang laing lima. Ang tanang napulo anaa sa saktong dapit, naghulat sa pamanhonon, ug matag usa miabot nga nagdala og suga.

Sa dihang ang pamanhonon—nagrepresentar sa Manluluwas—miabot sa wala damha nga takna sa tungang gabii, lima sa mga dalaga ang walay igong lana para sa ilang mga suga. Tingali naghunahuna sila nga ang pagbaton og sobra nga lana dili na kinahanglan. O tingali sila dili madaginoton nga mga tinugyanan sa lana nga naa nila. Tingali nalinga, sila napakyas sa pag-andam og igo aron magpadayon og siga ang ilang mga suga.

Ug busa, isip tubag sa ilang hangyo nga makasulod sa panihapon sa kasal, ang pamanhonon miingon, “Wala kamo makaila kanako.” (sa Matthew 25:12). Sa laing pagkasulti, kini nagpasabot nga pinaagi sa ilang pagpangandam ug maalamon nga pagkatinugyanan, ang lima ka maalamon nga dalaga nakaila gayod Kaniya.

Ang bililhon nga lana mahimong makita isip ilang personal nga pagkakabig. Kini nakapahimo sa maalamon nga mga dalaga sa pagpasiga sa ilang mga suga ug mosulod sa kasaulogan sa kasal uban sa pamanhonon. Ang lana dili mahimong ipakigbahin sa ilang mga higala tungod kay ang personal nga pagkakabig ingon lang gyod niana—personal. Kita makahimo ug kinahanglan nga ipataas ang kahayag sa atong mga suga aron sa pagbayaw ug paglig-on, ug pag-awhag sa uban ngadto ni Jesukristo, apan ang matag usa nato mao ang tinugyanan sa atong kaugalingong pagkakabig.

Sama sa gipadayag sa Manluluwas, “Pagmatinud-anon, pag-ampo kanunay, nga ang inyong mga lampara maandam ug magsiga, ug may dala kamo nga lana, nga kamo andam sa pag-anhi sa Pamanhonon” (Doktrina ug mga Pakigsaad 33:17).

Ang mga Puntil sa Salapi

Ang ikaduhang sambingay nga gisugilon diha sa Mateo 25 mao kanang kabahin sa mga puntil sa salapi (tan-awa sa mga bersikulo 14–30). Niana nga istorya, ang agalon, nga nagpaabot nga mobiyahe og layo, mihatag sa iyang tulo ka sulugoon og puntil nga mga salapi. Ang usa ka “puntil nga salapi” nagrepresentar og kwarta. Mahimo usab kitang maghunahuna niini isip mga gasa, mga abilidad, ug mga panalangin gikan sa atong Langitnong Amahan. Ngadto sa usa ka sulugoon ang agalon mihatag og lima ka puntil nga salapi, ngadto sa usa duha ka puntil nga salapi, ug ngadto sa ikatulo siya mihatag og usa ka puntil nga salapi. Ug dayon ang agalon mibiyahe.

Sa dihang siya mibalik, iyang nadiskobrehan nga ang mga sulugoon nga iyang gihatagan og lima ka puntil nga salapi ug duha ka puntil nga salapi nagmatinud-anon ug nagmabungahon nga mga tinugyanan ug mitarong sa paggamit sa mga puntil nga salapi, nadoble ang bili niini. Ug nga nagmatinud-anon sa gamay, ang agalon mihatag kanila og daghan pa, mipahayag, “Maayo! Buotan ka ug matinumanon nga sulugoon: kay kasaligan ka man sa diyotay, piyalan ko ikaw sa daghan. Dali, sulod ngari ug ambit sa akong kalipay” (bersikulo 21).

Sa laing bahin, ang sulugoon nga adunay usa ka puntil nga salapi milubong niini—tingali tungod kay siya nalinga ug naglangay-langay. O tingali siya napakyas sa pagkahibalo unsaon sa pagsugod o nahadlok nga siya mapakyas. Tingali gitandi niya ang iyang kaugalingon ngadto sa ubang sulugoon, ug ang iyang mga pagduhaduha nakapugong niya sa pagsulay. Wala siya makaandam sa pagbalik sa agalon, wala niya masinati ang hingpit nga kalipay sa matinud-anong pagkatinugyanan, ug nawala niya ang iyang puntil nga salapi.

Ang sambingay sa napulo ka dalaga ug ang sambingay sa puntil nga salapi adunay susama nga kahulogan. Ang duha nagpakita nga kita adunay personal nga responsibilidad alang sa atong kaugalingong pagkakabig ug kinahanglan nga moandam sa atong kaugalingon sa pagdawat sa gasa sa Ginoo nga kahimayaan—ug nga kita adunay pagkatinugyanan ug personal nga tulubagon alang sa mga talento ug mga gasa nga gihatag kanato.

Ang mga Karnero sa Maayong Magbalantay

Sa kataposan, ang Mateo 25 nagsugilon sa istorya niadtong kinsa adunay “pagsalig atubangan sa Dios,” nga gihulagway isip ang mga karnero sa Maayong Magbalantay, nga makaplagan sa Iyang tuo nga kiliran, nalingaw sa kombira sa kasal uban Kaniya, ug gipanalanginan nga mahimong mga tigmando ibabaw sa daghang butang (tan-awa sa mga bersikulo 31–40). Ang Ginoo moingon kanila:

“Kay gigutom ako, ug inyo akong gipakaon: giuhaw ako ug inyo akong gipainom: dili ninyo ako kaila, apan inyo akong gidawat sa inyong mga balay:

“Hubo ako, ug inyo akong gibistihan: nagmasakiton ako ug inyo akong giatiman: nabilanggo ako ug inyo akong giduaw” (Mateo 25:35–36).

Isip Iyang mga disipulo, giandam nato ang atong kaugalingon alang sa Iyang Ikaduhang Pag-anhi ug kita sa matinud-anon ug sa mabungahon nga paagi mopakita og pagkatinugyanan nianang gipanalangin kanato. Kaluoy, gugma nga putli, hiyas, ug matinud-anong pagkatinugyanan mopasarang nato dili lamang aron sa pagpuyo uban Kaniya paglabay sa panahon apan usab aron magbaton og pagsalig diha sa atubangan sa Dios karon. Sama sa gitudlo ni Mormon, alang niadtong napuno sa gugma nga putli—ang tiunay nga gugma ni Kristo—“kini makaayo [kanila]” sa kataposan nga adlaw. Sila mahimong sama sa Manluluwas, nga makakita Kaniya ingon nga Siya mao ug mapuno sa paglaom ug mahimong putli sama nga Siya putli. (Tan-awa sa Moroni 7:47–48). Si Presidente Nelson mipahayag, “Ang gugma nga putli ug hiyas moabli sa dalan sa pagbaton og pagsalig sa atubangan sa Dios!”

paghulagway sa usa ka lalaki nga nagpas-an og nating karnero — Ang mga disipulo ni Jesukristo nagpakabana alang niadtong nanginahanglan.

Tanan niining tulo ka sambingay nagtudlo og pagkatinugyanan sa atong kaugalingong pagkakabig; alang sa mga gasa, mga talento, ug mga kabtangan diin kita gipanalanginan; ug alang sa atong mga silingan kinsa gigutom, walay panimalay, nasakitan, ug gikapoy.

Kini nagtudlo kon sa unsang paagi nga ang mga disipulo ni Kristo kinahanglang mangandam alang sa makuyaw nga mga panahon nga mag-una sa Ikaduhang Pag-anhi sa Manluluwas. Mao kini ang mga panahon nga kita nagpuyo! Kinahanglan natong padayonon nga magsiga nga hayag ang atong mga suga sa pagkakabig, mopadan-ag sa atong kahayag, mogamit ug mopalambo sa atong mga talento, ug moatiman niadtong nanginahanglan. Kini maangkon pinaagi sa gugmang putli, ang tiunay nga gugma ni Kristo.