Ang Akong Kasub-anan nahimong Hingpit nga Kalipay

Paghulagway pinaagi ni Briana Kranz

Sa dihang 18 anyos pa ko, ang akong apohan nga lalaki sa habig sa akong inahan mitaliwan. Niana nga panahon sa akong kinabuhi, wala pay si bisan kinsa nga suod nako ang namatay. Nasayod ko nga mahitabo gyod na sa umaabot, apan wala ko magdahom nga kalit kini nga mahitabo.

Ang akong lolo baskog, apan sa walay sinyales, siya na-stroke. Gidali dayon siya og dala ni lola sa ospital, apan mitaliwan siya pagkahuman sa upat ka adlaw.

Ang mawad-an og usa ka tawo sa kalit lang sa unang higayon sakit. Wala ko maanad nga ang akong lolo motambong sa matag importanteng panghitabo sa akong kinabuhi ug dayon mawala na siya.

Human sa lubong, nakakita ko og paagi sa paghinumdom sa handumanan sa akong apohan ug sa among panag-uban. Ganahan siyang motrabaho sa iyang trak ug mobuhat og ubang mga proyekto. Gani, sa dihang na-stroke siya, naa siya sa iyang garahian nga nagkupot og liyabe sa usa sa iyang puno sa kalyo nga kamot, nagtrabaho sama sa naandan.

Nakahukom ko nga motrabaho pod ko sa mga kotse. Ang pagbuhat niini makatabang nako nga mobati nga duol ngadto niya. Midangop usab ako sa pag-ampo ug sa mga kasulatan, diin nakakaplag ko og kalinaw sa pagpadayon sa unahan nga adunay hugot nga pagtuo ug paglaom diha sa iyang pagkawala.

“Adunay pagkabanhaw,” si propeta Abinadi nagpahinumdom nako, “busa wala magmadaogon ang lubnganan, ug ang kahapdos sa kamatayon gituhop diha kang Kristo” (Mosiah 16:8).

Ang pagtaliwan sa akong apohan nga lalaki nakatabang nako nga makabaton og panglantaw nga nakahimo sa Pag-ula ni Jesukristo nga mas makahuloganon sa akong kinabuhi. Sama nga akong gipasidunggan ang akong lolo pinaagi sa pagtrabaho sa mga kotse, nakaamgo ko nga atong gipasidunggan si Jesukristo—ug mobati nga duol Kaniya—samtang kita naningkamot sa pagpakabuhi sama sa Iyang pagkinabuhi, pagtuon sa Iyang mga pulong, pagpakigbahin sa Iyang ebanghelyo, ug pagbuhat sa “mga buhat sa [Iyang] Amahan” (Juan 10:37). Ang pagbuhat sa ingon makahatag og mas lawom nga kahulogan sa Pag-ula sa Manluluwas ug makadugang sa atong pagsalig diha Kaniya.

“Sa higayon nga kita mohilak tungod sa kasakit o kalipay, si Jesukristo hingpit nga nakasabot,” mitudlo si Elder Gerrit W. Gong sa Korum sa Napulog Duha ka Apostoles. “Siya mahimong anaa sa mga higayon nga kita labing nagkinahanglan sa mahinungdanong mga gasa sa kahangtoran: Pag-ula ni Jesukristo, Pagkabanhaw, pagpahiuli.”

Si Jesukristo mihimo sa akong kasub-anan nga hingpit nga kalipay. Tungod Kaniya ug sa Iyang Pag-ula, nasayod ko nga makita nako pag-usab ang akong apohan nga lalaki.