Panalanginan ang Tanang Pamilya sa Kalibotan

Si Elder Bruce C. Hafen, usa ka emeritus nga sakop sa Seventy, kausa nakadawat og tawag sa telepono gikan sa editor sa usa ka nasodnong magasin sa mga balita [national news magazine]. Gusto sa editor nga maghisgot bahin sa usa ka bag-ong libro nga nagsusi sa kasaysayan sa mga pagtuo bahin sa langit sa lainlaing mga relihiyon.

“Nakita sa mga tagsulat nga ang publiko mibati og lapad nga kagutom kabahin sa langit—ug sa mga pamilya sa langit,” misulat si Elder Hafen. Apan samtang ang kadaghanan sa mga tawo nagtuo gihapon sa kinabuhi human sa kamatayon, mahangtorong gugma, ug langitnong mga panag-uban pag-usab sa pamilya, “kadaghanan sa Kristiyanong mga simbahan nagtanyag og gamay nga tubag niini nga kagutom”—gawas lamang sa: Ang Simbahan ni Jesukristo sa mga Santos sa Ulahing mga Adlaw.

Sa gipahiuli nga Simbahan sa Manluluwas, kita adunay sagrado nga mga templo. Kita adunay mahangtorong kaminyoon, nga adunay awtoridad sa pagbugkos nga mopanalangin lapas sa pisikal nga kamatayon. Kita adunay saad sa mahangtorong kaugmaon uban sa mga minahal diha sa presensya sa Amahan ug sa Anak. Tungod niining tanan, ang mga tagsulat nakahukom nga ang konsepto sa langit sa mga Santos sa Ulahing mga Adlaw mao ang labing kompleto—ug, akong idugang, ang labing malipayon.

“Pagkaanindot nga nadiskobrehan!” Miingon si Elder Hafen. “Kadaghanan sa mga tawo karon nangandoy alang sa mahangtorong mga pamilya, ug ang [gipahiuli nga ebanghelyo ni Jesukristo] nagtuman niana nga pangandoy nga mas maayo kay sa bisan unsa nga nailhan nga hugpong sa mga ideya [o relihiyoso nga mga pagtuo]. Unta ang tibuok kalibotan makadungog sa [atong] mga anak nga nag-awit sa malipayong balita: ‘Pamilya mahimong manag-uban ngadtos kahangtoran.’”

Ang mga pamilya dili lamang usa ka sayon nga pagpahimutang sa katilingban. Kini ang walay kataposan nga sundanan sa langit. Kini “mahinungdanon sa plano sa Tiglalang alang sa walay kataposan nga destinasyon sa Iyang mga anak.” Sama sa gitudlo kanato ni Presidente Russell M. Nelson: “[Ang Ginoo] milalang sa yuta [aron] kita makaangkon og pisikal nga mga lawas ug maghimo og mga pamilya. Iyang gitukod ang Iyang Simbahan aron sa paghimaya sa mga pamilya. Naghatag Siya og mga templo aron ang mga pamilya manag-uban sa kahangtoran.”

Apan ang atong interes sa lig-on nga mga pamilya dili lang mahitungod sa mahangtorong destinasyon. Ang pamilya usab adunay importante nga tahas sa atong mortal nga kalipay. Ang atong Langitnong Amahan, kinsa hingpit nga nasayod unsa ang makahatag og kalipay karon ug sa kahangtoran, mipadala sa Iyang mga anak ngadto sa mga pamilya—bisan unsa sila ka dili hingpit—ug nagdapit kanato sa pagtukod ug sa pag-amuma og lig-on nga mga pamilya. Siyempre, “ang kakulangan, kamatayon, o laing mga kahimtang mahimong manginahanglan sa pagsagop o sa pag-usab niini nga mga kalihokan.” Apan walay makapuli sa mahinungdanon, balaanong gisangon nga mga responsibilidad sa bana ug asawa, amahan ug inahan.

Ang pagsiksik bahin sa “biyolohikanhon, nahiusa, may duha ka-ginikanan nga mga pamilya” nagpadayon sa pagpakita nga ang pamilya mahinungdanon sa pagpreserbar sa “lawom nga mga bugkos sa gugma ug pagmahal.” Kini mao ang “panguna nga incubator alang sa lig-on, maayo nga pagpahaom, ug mahunahunaon sa katilingban nga mga tawo.”

Siyempre, dili nato ikatingala nga ang usa ka butang nga importante kaayo sa plano sa Dios mag-atubang og oposisyon. Si Satanas dili gayod mahigalaon sa pamilya, ug ang iyang mga paningkamot nahimong mas dinalian “sanglit nasayod man siya nga hamubo na lamang ang iyang panahon”(Pinadayag 12:12). Sama sa gisulti ni Presidente M. Russell Ballard (1928–2023), Akting nga Presidente sa Korum sa Napulog Duha ka Apostoles, “Nasayod si Satanas nga ang pinakaseguro ug labing epektibo nga paagi sa pagbalda sa buhat sa Ginoo mao ang pagkunhod sa kaepektibo sa pamilya ug sa kabalaan sa panimalay.”

Nasayod sa unsay atong nahibaloan mahitungod sa mahangtorong pamilya sa Dios, sa Iyang plano alang sa Iyang mga anak, ug sa mahangtorong importansya sa mga relasyon sa pamilya, kita kinahanglang mahimong usa sa labing kugihan nga tigpanalipod sa pamilya diha sa kalibotan.

Unsaon nato sa pagbuhat niini?

Si Presidente Dallin H. Oaks, Unang Magtatambag sa Unang Kapangulohan, mitanyag niini nga tambag: “Ang pamahayag sa pamilya … mao ang gihatagan sa Ginoo og gibug-aton sa mga kamatuoran sa ebanghelyo nga gikinahanglan nato ipatunhay bisan pa man sa kasamtangang mga hagit sa pamilya.”

Sa atong personal nga mga kinabuhi, makahimo kita sa “gagmay ug yanong mga butang” (Alma 37:6) nga makapalig-on sa mga relasyon sa pamilya. Kini naglakip sa pagsunod sa mga baroganan sa malamposon nga mga pamilya ug mga kaminyoon nga gilatid diha sa pamahayag sa pamilya: “hugot nga pagtuo, pag-ampo, paghinulsol, pagpasaylo, pagtahod, gugma, kaluoy, buhat ug maayong makalingaw nga mga kalihokan.” Dili igsapayan unsa ang kahimtang karon sa atong pamilya, atong mapakita pinaagi sa atong mga aksiyon nga ang mga relasyon sa pamilya mahangtoron ang ka importante ngari kanato.

Isip “responsable nga mga lumulupyo” diha sa atong mga komunidad, kita makahimo “sa pag-awhag sa mga tawo sa paghimo niadtong mga butang nga gihimo sa pagpadayon ug sa paglig-on sa pamilya.”

Kita ang katawhan sa pakigsaad sa Ginoo sa ulahing mga adlaw. Kita mga manununod sa mga saad nga gihimo ngadto ni Abraham, Isaac, ug Jacob—mga saad nga adunay kalabotan sa mga pamilya. Kadto nga mga saad adunay kauban nga responsibilidad sa pagpanalangin sa “tanang katawhan sa kalibotan.” Ug ang usa ka importante nga paagi nga mahimo nato kana mao ang pagpakabuhi, pagpanalipod, ug pagpakigbahin sa mahangtoron nga mga kamatuoran nga “ang pamilya gi-orden sa Dios” ug nga ang “mga ordinansa ug mga pakigsaad nga anaa sa balaan nga mga templo makapahimo alang sa tagsa-tagsa sa pagbalik ngadto sa atubangan sa Dios ug alang sa mga pamilya nga magkahiusa sa kahangtoran.”

Sa higayon nga si Sister Uchtdorf ug ako magtan-aw sa mga sakop sa among pamilya nga maghimo og sagradong mga pakigsaad ngadto sa atong mahigugmaon, mahangtorong Langitnong Amahan, ang among mga kasingkasing mapuno sa kalipay ug pasalamat. Malipay kami dili lamang sa among mga anak ug sa ilang mga anak kondili usab sa among mga ginikanan ug sa ilang mga ginikanan. Mamalandong kami uban sa lawom nga gugma kon sa unsang paagi ang mga pakigsaad sa ebanghelyo naghiusa kanamo sa tibuok henerasyon. Usa kini ka kasinatian dili sama sa makakita og “usa ka hagdan, … nga misangko sa langit. Sa maong hagdan may mga anghel sa Dios nga nagsaka-kanaog” (Genesis 28:12).

Ang mga panalangin nga gisaad sa Ginoo ngadto ni Jacob diha sa iyang damgo gihatag ngadto sa tanan Niyang mga anak sa pakigsaad—lakip kanimo ug kanako. Sama sa Iyang gibuhat ni Jacob, Siya motubag kanato “sa [atong] adlaw sa kagul-anan” (Genesis 35:3) kon ato Siyang pilion.

“Timan-i,” ang Ginoo nag-ingon, “Ako nag-uban kanimo. Panalipdan ko ikaw bisag asa ka paingon, … Dili ko ikaw biyaan” (Genesis 28:15).

Sama ni Jacob, kitang tanan adunay usa ka kamingawan nga tabokon. Usahay ang gisaad nga mga panalangin ingon og layo pa kaayo. Kon adunay seryoso nga mga problema o mga hagit nga moabot, tingali atong kwestiyonon ang gugma sa Ginoo. Ingon gani nga atong bation nga gitalikdan kita sa Dios. Bisan sa atong labing maayo nga mga paningkamot sa pagkadisipulo, kita mahimong mobati nga kita wala makadawat sa mga panalangin nga atong gilaoman.

Mga kaigsoonan, minahal nga mga higala, ang dalan sa pakigsaad usa ka hingpit nga malipayon nga dalan, bisan pa og naay higayon kini mamansahan sa mga luha. Kon imong gibati nga ang mga bahin sa plano sa kalipay wala matuman sa imong kinabuhi karon, palihog salig nga ang Ginoo mahunahunaon kanimo ug mopanalangin kanimo sa Iyang tukma nga panahon, sumala sa Iyang kaalam.

Ang hugot nga pagtuo kang Jesukristo ug sa Iyang mga saad nagdasig kanato sa paglantaw sa unahan, dili sa mga nangagi. Tungod Kaniya, ang atong kaugmaon dili kinahanglan nga mabihag sa bisan unsa nga nahitabo sa miagi o makababag sa atong panan-aw karon. Oo, kitang tanan, o sa umaabot, masamaran sa usa ka paagi o sa lahi nga paagi. Apan mituo kita sa Gamhanang Mag-aalim. Kita misalig Kaniya—kaayo, sa pagka tinuod, atong gihangop ang Iyang mga saad, sa hingpit “[nadasig niini],” bisan kon sila “layo pa kaayo” (Hebreo 11:13).

“Mopahinumdom ko kanatong tanan nga sa kaugalingong pamaagi ug panahon sa Ginoo, walay panalangin nga pagapugngan [alang] sa Iyang matinud-anong mga Santos,” misulti si Presidente Nelson. “Ang Ginoo mohukom ug moganti sa matag indibidwal sumala sa atong kinasingkasing nga mga tinguha maingon man usab sa atong mga binuhatan.”

Mosaad ko nga samtang kita mosunod ug mopakigbahin sa plano sa atong Langitnong Amahan alang sa mga pamilya, Siya anaa kanato, mopaluyo kanato, ug mouban nato sa atong panaw. Dili kita niya pasagdan nga mag-inusara, ilabina kon moabot ang mga pagsulay kanato o sa atong mga minahal. Siya modala kanato, mobayaw kanato, ug modala kanato ngadto sa gisaad nga yuta sa usa ka hingpit nga kalipay uban Kaniya, uban sa Iyang Anak, si Jesukristo, ug uban sa atong mga pamilya—sa kahangtoran.