“Mga Mata nga Makakita sa Maayo,” Liahona, Mar. 2026.
Mga Tingog sa mga Santos sa Ulahing mga Adlaw
Mga Mata nga Makakita sa Maayo
Sa dihang ang panan-aw sa akong asawa nagsugod sa pagkagrabe, kami midangop ngadto sa Pag-ula ni Jesukristo alang sa kahupayan.
Paghulagway pinaagi ni Briana Kranz
Niadtong Enero 2025, ang akong asawa, si Kayla, nagsugod nga naglisod sa iyang panan-aw. Kanunay siya nga adunay mga pagsakit sa ulo ug sakit sa iyang wala nga mata. Dili siya makakita og tarong, ug nagsugod na kami og kabalaka.
Sa dihang miadto kami sa usa ka optometrist, iyang nadiskobrehan nga ang wala nga mata sa akong asawa adunay taas nga presyur. Iya kaming gipaadto sa usa ka opthalmologist aron masusi kon aduna bay glaucoma. Delikado kaayo ang panan-aw ni Kayla. Nanawag kami og pipila ka doktor, apan daghang opisina ang sirado pa gihapon tungod sa mga holiday. Ang among mabuhat mao lamang ang paghulat.
Nabalaka na kami og maayo. Midangop kami sa Langitnong Amahan pinaagi sa pag-ampo alang sa tabang, naghangyo nga ang tanan mahitabo sumala sa Iyang plano. Kami nangandoy og suporta, ug among nabati ang Iyang gugma. Kami nasayod nga ang tanan mamahimong OK ra.
Sa kataposan, nakakuha kami og appointment human lamang sa upat ka adlaw sa usa ka espesyalista nga kasagaran adunay taas nga lista sa mga naghulat nga moabot og pipila ka bulan. Nadiskobrehan sa opthalmologist nga ang presyur sa mata ni Kayla mius-os na. Miresita siya og pipila ka eyedrop, ug mibiya na kami.
Walay dili maayong epekto nga makapausab sa kinabuhi ang nahitabo sa mga mata sa akong asawa, apan nakat-on kami nga makita ang kaayohan pinaagi sa pagdangop ngadto sa Pag-ula ni Jesukristo. Ang Manluluwas nagtabang namo nga mahimong positibo ug malipayon bisan pa sa mga pagsulay. Kami nakahibalo nga Siya makaayo kanamo sa Iyang kaugalingon nga oras ug sa Iyang kaugalingon nga paagi.
Si Jesukristo wala lamang mobayad sa atong mga sala—Siya usab nag-antos sa tanan natong mga “sakit ug mga kasakit … sa matag matang; … aron ang iyang kasingkasing mapuno sa kaluoy, sumala sa unod, aron iyang masayran sumala sa unod unsaon pagtabang ang iyang katawhan sumala sa ilang mga kahuyang” (Alma 7:11–12).
Kami mibati og kahupayan tungod kay kami nakahibalo nga si Jesukristo nakasabot sa among kasubo. Tungod kay kami mipas-an sa yugo uban Kaniya, kami nakakaplag og “kapahulayan ngadto sa [among] mga kalag” (tan-awa sa Mateo 11:28–30).
Si Presidente Camille N. Johnson, Kinatibuk-ang Presidente sa Relief Society, mitudlo:
“Si Jesukristo makapagaan sa atong karga.
“Si Jesukristo makaalsa sa atong mga palas-anon. …