Ang Pagsaylo ug ang Pasko sa Pagkabanhaw
Tan-awa kon sa unsang paagi nga ang mga elemento sa Pagsaylo makapunting kanato ngadto sa maulaong sakripisyo ni Jesukristo ug sa atong mga pakigsaad sa Dios.
Ang Pagsaylo nagsaulog sa pagpalingkawas sa Ginoo sa katawhan sa Israel gikan sa kataposang makalaglag nga tunglo sa Ehipto. Pinaagi ni Moises, ang Ginoo misulti kanila sa paghimo og piho nga mga buhat aron ang tiglaglag nga anghel mosaylo kanila ug dili apilon sa paglaglag ang ilang panganayng anak. Dayon ang Ginoo mipalingkawas nila gikan sa pagkaulipon ug gipadala sila sa yutang saad. (Tan-awa sa Exodo 12.)
Ang nagkalain-laing elemento sa Pagsaylo nagrepresentar sa maulaong sakripisyo ni Jesukristo alang sa atong mga sala, ingon man sa atong mga pakigsaad sa Dios.
Nating Karnero
Lalaki nga nating karnero nga may usa ka tuig ang pangedaron nga walay lama.
Kini gipatay ug dayon giasal pinaagi sa kalayo, tibuok—walay nabali nga mga bukog ug ang ulo, mga tiil, ug ang makaon nga mga parte sa sulod sa ginhawaan anaa pa. Kini kaonon atol sa gabii sa Pagsaylo, walay mahabilin inig ka buntag. Kon adunay bisan unsa nga mahabilin, sunogon kini.
Posible nga kahulogan: Si Jesukristo isip walay sala nga sakripisyo alang sa mga sala; ang katam-is sa pagduol ngadto Kaniya sukwahi sa kapait sa sala; ang tibuok debosyon ni Kristo ngadto sa Iyang misyon; ang debosyon nga gikinahanglan gikan niadtong mga mihimo og pakigsaad ngadto sa Dios.
Dugo diha sa Babag Ibabaw sa Pultahan ug sa mga Haligi sa Pultahan
Ang isopo (usa ka utanon nga sa wala madugay gigamit sa ritwal nga mga paghugas) ituslob sa dugo nga gikan sa nating karnero nga anaa sa planggana, ug dayon ang dugo ipaghid sa babag ibabaw sa pultahan ug sa mga haligi sa pultahan.
Posible nga kahulogan: Usa ka timaan nga nagpaila sa mga tawo sa pakigsaad sa Dios; paghugas pinaagi sa dugo ni Jesukristo, nga gipaagas aron sa pag-ula alang sa atong mga sala.
Pan nga Walay Patubo
Pan nga gihimo nga wala butangi og yeast o uban pang patubo, kasagaran gikan sa emmer nga trigo, sebada, o sorgum sa karaang Ehipto. Ang patubo mas makapahumok sa pan apan makahimo usab niini nga mas dali nga madunot. Usab, ang minasa nga harina nga dunay patubo nagkinahanglan og oras aron moalsa, mao nga mas dugay himoon.
Kini (pan nga walay patubo) kaonon sulod sa pito ka adlaw. Ang patubo (nga gilambigit sa pagkadunot) kinahanglan nga kuhaon gikan sa matag panimalay atol niining panahona (tan-awa sa Exodo 12:19).
Posible nga kahulogan: Kaputli; dinalian nga paglayas gikan sa pagkaulipon; si Kristo isip ang Pan sa Kinabuhi (tan-awa sa 1 Mga Taga-Corinto 5:7).
Pait nga mga Utanon
Naglakip sa tangkong, mga labanos, eskarola [endive], kamunggay, ug tingali uban pang hilba nga pait kon tilawan.
Kini kaonon dungan sa nati nga karnero.
Posible nga kahulogan: Ang kapait sa pagkaulipon ug pagkabihag didto sa Ehipto; kapait sa pagkaulipon sa sala; kapait sa pag-antos ni Kristo alang sa atong mga sala.
Mga Hawak nga Gibakosan, Mga Tiil nga Nagsandalyas, Sungkod diha sa Kamot, Nagbarog Samtang Nagkaon
Posible nga kahulogan: Kaandam alang sa dinalian nga paglayas gikan sa pagkabihag; tinguha alang sa kagawasan gikan sa sala.