Tan-awa, Ania Ako

Ang Ginoo misaad og daghang kaliwatan ngadto ni Abraham ug Sara. Kana nga panalangin dugay kaayo nga miabot, o, gani, kini miabot diha sa panahon sa Ginoo. Apan, ang Ginoo misulay sa hugot nga pagtuo ni Abraham sa dihang Siya mihangyo kaniya sa pagsakripisyo sa iyang anak, si Isaac, kinsa mao ang panalangin nga ilang giampo ug dugay nang gipaabot. Mahimong nabasa na nato kini nga asoy sa kasulatan sa makadaghang higayon, apan kapila nato gibutang ang atong mga kaugalingon sa posisyon ni Abraham?

Lisod gani ang paghunahuna sa pagbati sa usa ka malumo og kasingkasing nga amahan sa wala pa ang maong tahas. Apan, ang determinasyon ni Abraham sa pagdesisyon sa pagsunod wala gayod mohunong sa paghingangha kanako samtang siya nangandam sa pag-adto sa usa ka bukid sa Moria ug sa paghalad sa gipangayo nga sakripisyo. Sa pagpahayag sa kaandam ug pagtugyan ngadto sa kabubut-on sa Langitnong Amahan, ang iyang tubag nagpabilin nga, “Tan-awa, ania ako.” (Tan-awa sa Genesis 22:1–2.)

Agig balos sa iyang pagkamasulundon, siya gipanalanginan sa pagpreserbar sa kinabuhi ni Isaac, ingon man usab sa talagsaon ug walay kinutoban nga mga panalangin alang sa iyang kaugalingon, alang kang Sara, ug alang sa ilang kaliwatan (tan-awa sa Genesis 22:15–18).

Ang Pagtugyan sa Manluluwas

Sa walay pagduhaduha, ang labing gamhanan nga ehemplo sa pagkamasulundon ug pagtugyan ngadto sa Langitnong Amahan nasentro diha sa Manluluwas, si Jesukristo. Iyang gipakita ang Iyang kaandam sa pagsunod pinaagi sa pag-anhi niini nga kalibotan; pinaagi sa pagpabunyag, pagkalimpyo ug pagkahingpit; ug pinaagi sa paghatag sa Iyang kinabuhi isip usa ka halad ug sa pagdala diha Kaniya sa mga sakit, mga balatian, mga kahuyang, mga sala, ug kamatayon sa Iyang mga katawhan, aron Siya masayod unsaon sa pagtabang kanato diha sa unod (tan-awa sa Alma 7:11–13).

Grabe kaayo ang kasinatian nga, sa makadiyot, nakaingon kini Kaniya sa pagpangutana kon aduna bay laing paagi nga mapalabay kanang pait nga kopa. Human dayon niana, siya misulti, “Apan dili ang akong pagbuot kondili ang imo maoy matuman” (Lucas 22:42)—sa lain nga pagkasulti, “Tan-awa ania ako”—sa ingon nagpakita sa Iyang pagkaandam sa pagbuhat sa kagustohan sa Amahan.

Unsaon nato sa pag-ugmad niana nga kaandam sa pagtanyag og “Tan-awa, ania ako” agig tubag sa matag hangyo nga gihimo sa Langitnong Amahan kanato isip mga miyembro sa Simbahan, o usahay sa personal nga lebel?

Si Pablo mitudlo sa mga taga Romano, “Ang paghigugma mao ang katumanan sa Balaod” (Mga Taga-Roma 13:10). Kon gusto ko nga mangita og pulong nga may susama og kahulogan nga mailis sa mga pulong nga “pagtuman sa balaod,” nagtuo ko nga ang pulong nga pagkamasulundon mosantop dayon sa akong hunahuna. Sa ingon niana, kita makasulti nga ang gugma mao ang pagkamasulundon. Ug mao nga ang pamahayag sa Manluluwas nga “Kon nahigugma kamo kanako, tumana ninyo ang akong mga sugo” (Juan 14:15) mahimong salabtonon na kaayo.

Mahimo kitang motubag og “Tan-awa, ania ako” o, diha sa mga pulong ni Nephi, “Moadto ako ug mobuhat” (1 Nephi 3:7). Sa atong modernong pinulongan, kita mahimong moingon, “Siyempre andam ko nga mobuhat unsay gisugo sa Langitnong Amahan, bisan unsa pa ang mga sirkumstansya.”

Ang gusto gyod nakong hatagan og gibug-aton, bisan pa, mao ang relasyon sa gugma-pagkamasulundon, nagpasabot nga kita nagsunod sa Amahan tungod kay gihigugma nato Siya. Nagtuo ko nga ang pagpili sa pagsunod mao ang usa sa labing maayong paagi sa klarong pagpahayag sa atong gugma alang Kaniya. “Patay ang pagtuo kon walay mga buhat” (Santiago 2:26), ug para nako sa akong hunahuna, ang gugma alang sa Langitnong Amahan ug ni Jesukristo nga walay pagkamasulundon dili usab buhi.

Unsaon nato sa pagpalambo sa atong gugma alang Kaniya ug sa atong pagkamasulundon ngadto Kaniya? Ang Manluluwas miingon, “Ug kini mao ang kinabuhing dayon: nga ang mga tawo moila kanimo nga mao lamang ang bugtong matuod nga Dios, ug kang Jesukristo, nga imong gipadala” (Juan 17:3). Ang pagkaila ni Jesukristo—ug, pinaagi Kaniya, ang Amahan—makapahimo kanato nga mahibalo sa gugma nga anaa Nila alang kanato ug sa dili mahulagway nga mga butang nga Ilang nabuhat ug Ila pa unyang buhaton alang kanato, lakip sa panahon sa lisod nga mga higayon nga atong nasinati niining mortal nga kinabuhi. Ang pagkasayod mahitungod Kanila makapausab sa atong mga kasingkasing, maghimo kanato nga magtinguha sa pagsunod sa Ilang mga ehemplo sa atong mga buhat ug mahimong andam nga moingon, sa pulong ug sa buhat, “Tan-awa, ania ako.” Kini nga kaandam makita diha sa tinguha sa pagbasa sa mga kasulatan o sa pagpakigsulti sa Langitnong Amahan pinaagi sa pag-ampo.

“Tan-awa, ania ako” mahimong tubag sa usa ka tawag sa pagserbisyo og misyon o mahimong mas mapahinungoron sa pagsunod sa mga sugo sama sa pagbalaan sa Igpapahulay, pagtahod sa atong mga ginikanan, o pagtinguha sa pagpuyo og matarong nga limpyo nga kinabuhi. “Tan-awa, ania ako” mao ang pahayag nga kanunay nga nag-uban sa mga disipulo ni Kristo, bisan kon ang gihangyo nga sakripisyo makaapekto sa kon unsa ang labi nato nga gitinguha o kadtong gigahinan kaayo nato sa atong panahon o kabudlay.

Kini nga kaandam sa pagsunod bililhon kaayo, ilabi na mahitungod sa mga pakigsaad nga atong gihimo sa dihang kita gibunyagan o misulod sa templo. Mahanduraw ba ninyo kon unsa kaha ang atong kinabuhi kon kita kanunay nga maghunahuna, “Tan-awa, ania ako” kon magdala diha kanato sa ngalan ni Kristo o aron sa paghinumdom Kaniya kanunay ug sa pagtuman sa Iyang mga sugo? Ang pag-ambit sa sakramento nagdapit kanato sa pagbag-o niana nga pasalig, nga kinahanglang makita sa atong mga lihok sulod sa semana. Sa sama gihapon kana magamit sa atong pag-adto sa templo samtang kita mohimo o mohinumdom sa mga pakigsaad nga atong gihimo didto.

Nahinumdom ko sa akong panag-istoryahanay sa bag-ong minyo nga magtiayon daghang tuig na ang milabay samtang nagserbisyo isip usa ka bishop. Usa ka gabii, sila adunay taas, init nga panaglalis bahin sa pagbayad sa ikapulo. Ang batan-ong bana nakaagi og usa ka lisod nga semana sa trabaho ug gusto nga motigom sa iyang kinitaan alang sa pipila sa ilang personal nga mga galastohan. Hinoon, akong nahinumdoman ang mga pulong sa batan-ong asawa sa dihang, atubangan sa iyang bana, siya miingon, “Bishop, andam ko nga dili mogasto niadto nga mga galastohan ug gani mohunong sa pagkaon, kon gikinahanglan, apan gusto kong mobayad sa ikapulo ug mosunod sa Ginoo.”

Makalanog kaayo kadto nga “Tan-awa, ania ako,” gipahayag uban sa dakong pagpamatuod sa batan-ong asawa, nga ang bana ug ako mibati sa kusog nga espiritu atol sa panag-istoryahanay. Sa kataposan, wala ko masayod kon tungod ba kini sa iyang kaugalingong tinguha o tungod kay nadani siya sa iyang asawa, apan ang bana mibayad sa iyang ikapulo nianang kataposan sa semana.

Pagkasunod Dominggo, sa wala pa ang mga panagtigom, ang batan-ong bana mihangyo nga makigsulti og kadiyot kanako. Adunay panagway nga lahi sa miaging semana, giingnan ko niya, “Bishop, nahibal-an nimo nga sa miaging semana nakabayad na gyod ko sa akong ikapulo, ug nahadlok ko nga wala koy igong kwarta para sa pagkaon, pero gusto lang nako nga mahibalo ka nga karong semanaha aduna kami doble nga kantidad sa kwarta sa sagad namong igahin alang sa pagkaon. Bishop, usa kadto ka milagro, ug gusto nakong makita kanunay kadtong mga milagro sa akong kinabuhi.” Para nako, ingon og gisultihan ko niadtong batan-ong lalaki nga, “Bishop, andam ko nga motubag og ‘Tan-awa, ania ako’ sa bisan unsa nga ipangayo sa Dios kanako.”

Ang Ginoo nag-ingon nga Siya motuman gayod kon mobuhat kita sa unsay Iyang gisulti (tan-awa sa Doktrina ug mga Pakigsaad 82:10). Nagatuo ba gayod kita sa kahigpit niana nga saad?

Tingali ang mga panalangin dili moabot sa atong panahon o sa paagi nga atong gusto, apan ako mopamatuod kaninyo nga ang saad tinuod ug matuod. Nagkinahanglan kini og gugma alang Kaniya, pagtugyan, tinguha sa pagbuhat sa Iyang kabubut-on, ug pagkinabuhi isip mga disipulo ni Kristo. Siya motabang kanato ug mopanalangin kanato sa pagsabot ug sa pagtuman sa atong mga pakigsaad. Niana nga paagi, kon Siya mohangyo kanato sa pagbuhat sa Iyang kabubut-on, hinaot nga kita motubag uban sa lanog nga “Tan-awa, ania ako, Ginoo!”