Tomas: Naglakaw diha sa Panaw sa Hugot nga Pagtuo

Gitawag ni Jesukristo si Tomas nga mahimong usa sa Iyang Napulog Duha ka Apostoles, ug si Tomas misunod sa Manluluwas sa Iyang tibuok tulo ka tuig nga pagpangalagad. Siya adunay mahalaron nga gugma alang sa Manluluwas. Sa dihang si Tomas nabalaka alang sa kinabuhi sa Manluluwas, iyang giawhag ang uban nga Apostoles, “Manguyog kitang tanan sa Magtutudlo aron mohatag usab sa atong kinabuhi uban kaniya” (Juan 11:16).

Sa iyahang debosyon, nangutana gihapon siya. Sa wala pa sa Getsemane, gitudloan ni Jesus ang Iyang mga disipulo nga Siya adunay adtoan. Si Tomas nangutana, “Ginoo, wala kami mahibalo kon asa ka paingon busa unsaon man namo pagkatultol sa dalan?”

Si Jesus mitubag, “Ako mao ang dalan, ang kamatuoran, ug ang kinabuhi: walay makaadto sa Amahan, kon dili moagi kanako” (Juan 14:5–6).

Sama ni Tomas, tingali dili nato masabtan ang tanan nga pagtulun-an sa Dios o ang matag aspeto sa plano sa kaluwasan. Apan ang pagpangutana og matarong nga mga pangutana makapadayag sa kamatuoran gikan sa Ginoo. Mahinungdanon nga atong palamboon ang atong pagtuo.

Si Presidente Russell M. Nelson mitudlo:

“Kon kamo adunay mga pangutana—ug ako naglaom nga kamo aduna—pangita og mga tubag nga inubanan og mainiton nga tinguha nga motuo. …

“… Ang inyong sinsero nga mga pangutana, nga gipangutana uban sa pagtuo, mosangpot kanunay sa mas hugot nga pagtuo ug dugang nga kahibalo.”

Sa dihang ang mga Apostol nakadungog nga si Jesus mibangon gikan sa mga patay, kini “binuang [alang kanila] ang gisulti sa mga babaye busa wala sila motuo kanila” (Lucas 24:11). Ang panahon sa pagduda ni Tomas tingali milungtad og mas dugay kay sa uban tungod kay wala siya sa dihang ang nabanhaw nga Ginoo unang mipakita ngadto kanila (tan-awa sa Juan 20:24).

Human nila giingnan si Tomas nga nakita nila ang Manluluwas, siya mitubag, “Gawas kon makita ko ug ikabutang ang akong tudlo sa inagian sa mga lansang diha sa iyang kamot ug mahikap ko ang samad sa iyang kilid, dili ako motuo”(Juan 20:25).

Human sa walo ka adlaw, ang Ginoo mipakita pag-usab ug giingnan si Tomas nga hikapon ang Iyang mga samad. Isip tubag, si Tomas mituaw, “Ginoo ko ug Dios ko” (Juan 20:28). Ang Manluluwas dayon mitudlo og mahinungdanon nga kamatuoran: “Bulahan kadtong motuo bisan wala makakita kanako!” (Juan 20:29).

Ang mga tubag moabot gayod. Si Elder David A. Bednar sa Korum sa Napulog Duha ka Apostoles mitudlo, “Ang matag sinsero nga pag-ampo dunggon ug tubagon sa atong Langitnong Amahan, apan ang mga tubag nga atong madawat dili tingali unsay atong gipaabot o moabot kanato kon sa atong gusto o sa paagi nga atong gipaabot.”

Kon kita makadawat og mga tubag pinaagi sa paglahutay, pag-ampo, ug pagpadayag, kita usab makabaton og kombiksiyon—usa ka pagpamatuod. Kon kita magpadayon sa pag-amuma sa atong pagtuo, kana nga pagpamatuod magpabilin kanato sa tibuok kinabuhi. Sama sa gitudlo ni Presidente Nelson: “Samtang kamo mapailobon nga motahod sa panahon sa Ginoo, pagatagaan kamo sa kahibalo ug pagsabot nga inyong gipangita. Ang matag panalangin sa Ginoo nga alang kaninyo—gani mga milagro—mosunod. Mao kana ang mabuhat sa personal nga pagpadayag alang kaninyo”

Ang kasinatian ni Tomas nagpakita nga ang pagtuo dili usa ka destinasyon kondili usa ka proseso. Ang Ginoo motahod niana nga proseso ug mopanalangin kanato samtang kita magpabilin nga bukas sa Iyang paggiya ug mangita sa pagsaksi nga nagsulti og kalinaw ngadto sa atong mga kasingkasing (tan-awa sa Doktrina ug mga Pakigsaad 88:63).