Si Caifas ang Pangulong Pari

Bisan pa sa iyang bantogan nga tahas, gamay lang ang atong nahibaloan kabahin ni Caifas. Siya gihisgotan sa siyam lang ka higayon diha sa Bag-ong Tugon. Siya nagsilbi nga tigsumpay tali sa mga Judeo ug mga Romano. Siya usa ka Saduseo, usa ka sekta sa mga Judeo sa panahon ni Kristo nga wala motuo sa pagkabanhaw (tan-awa sa Mga Buhat 23:8).

Si Caifas namulong diha sa konseho human gipabangon ni Kristo si Lazaro gikan sa mga patay, usa ka milagro nga nakapabalaka niya ug sa uban nga mga Saduseo tungod sa ilang mga gituohan.

Ang konseho nakamugna og teyorya nga kon sila walay buhaton isip tubag niining gibantog nga milagro, ang katawhan motuo nga si Jesus mao ang Mesiyas, ang hari sa mga Judeo, “unya manganhi ang kadagkoang Romanhon ug gun-obon nila ang Templo ug ang tibuok nasod” (Juan 11:48).

“Way hibangkaagan,” mitubag si Caifas, “wala ba kamo mahibalo nga mas maayo alang kaninyo nga usa ra ka tawo ang mamatay alang sa katawhan kay sa malaglag ang tibuok nasod?” (Juan 11:49–50).

Ang Apostol nga si Juan misulat nga si Caifas namulong “dili sa iyang kaugalingong kabubut-on kondili, ingon nga pangulong pari niadtong tuiga, nagtagna siya nga si Jesus kinahanglan mamatay alang sa mga Judeo;

“Ug dili lamang alang kanila, kondili aron pagtigom ug paghiusa sa nagkatibulaag nga mga anak sa Dios” (Juan 11:51–52).

Ang ngalan ni Caifas makita na usab diha sa Bag-ong Tugon sa dihang si Kristo gisukit-sukit sa wala pa Siya Gilansang sa Krus.

“Busa ang pangulong pari misulti pag-usab kaniya, Sa ngalan sa Dios nga buhi, papanumpaon ko ikaw: sultihi kami kon ikaw mao ba ang Mesiyas, ang Anak sa Dios” (Mateo 26:63).

Gikompirmar ni Jesus nga Siya mao ang Kristo: “Gisulti nimo. Apan sultihan ko kamong tanan: sukad karon makita ninyo ang Anak sa Tawo nga naglingkod sa tuo sa Labing Makagagahom sa tanan ug moanhi sinapnay sa mga panganod sa langit” (Mateo 26:64). Isip tubag niini, si Caifas misalikway na usab sa Manluluwas. “Gigisi sa pangulong pari ang iyang bisti ug miingon, “Dakong pasipala” (Mateo 26:65).

Bisan anaa na sa presensiya sa Manluluwas sa kalibotan, ang usa nga giordinahan na daan aron moula alang sa mga sala sa tanang katawhan ug mag-antos sa tanang kasakit, kasubo, ug balatian, si Caifas wala makaila nga si Jesus mao ang Kristo, ug siya mikondenar Kaniya.

Si Caifas gihisgotan na usab diha sa Biblia sa Mga Buhat 4. Ang tala naghisgot kon giunsa ni Apostol Pedro pag-ayo ang usa ka tawo nga bakol gikan sa iyang pagkahimugso (tan-awa sa Mga Buhat 3:1–8). Dayon, samtang siya ug si Juan nagsangyaw sa Pagkabanhaw ni Kristo, sila gidakop ubos sa pagbuot sa Sanhedrin. Sila gibilanggo sa tibuok gabii ug gidala sa atubangan sa usa ka konseho nga naglakip ni Caifas ug sa iyang ugangan, si Annas, ang kanhi pangulong pari. (Tan-awa sa Mga Buhat 4:1–6; tan-awa usab sa Juan 18:13.)

Sa dihang gipangutana kon sa unsang awtoridad nga sila nakaayo sa tawo, si Pedro mitubag: “Kinahanglan mahibaloan ninyong tanan, ug sa tanang katawhan sa Israel, nga pinaagi sa ngalan ni Jesukristo nga Nazaretnon, nga inyong gilansang sa krus, nga gibanhaw sa Dios gikan sa mga patay, pinaagi kaniya kining tawhana nagatindog nga maayo na karon sa inyong atubangan” (Mga Buhat 4:10).

Kini mao ang kataposang natala nga kahigayonan ni Caifas nga modawat ni Kristo. Hinuon, ang konseho mihulga ni Pedro ug Juan. Apan ang ilang mga hulga wala makapausab sa kamatuoran nga si Kristo buhi. (Tan-awa sa Mga Buhat 4:13–22.)

Pinaagi sa gahom ug awtoridad ni Jesukristo, naayo ni Pedro ang bakol nga tawo. Sa samang paagi, ang mga milagro mahimong mahitabo karon pinaagi sa gipahiuli nga pagkapari ni Kristo ug pinaagi sa pagtuo diha sa Iyang ngalan. Ang leksiyon nga atong makat-onan gikan ni Caifas kay yano. Siya wala modawat ni Jesus isip ang Kristo, ang Anak sa Dios, apan kita makahimo sa pagdawat kang Kristo. Kon kita motuo Kaniya, ang mga timailhan, mga katingalahan, ug mga milagro mosunod (tan-awa sa Marcos 16:17–18).