Ang Malipayong Balita

Paghulagway pinaagi ni Briana Kranz

Isip managsilingan, si Maritza ug ako nagkahimamat sa bata pa kami. Bisan kon mas magulang siya og pipila ka tuig kanako, nahimo kaming maayong managhigala ug suod kaayo kami.

Sa dihang 19 pa ko, ug nagkinahanglan gayod kaayo og direksyon, iya ko nga gipaila sa gipahiuli nga ebanghelyo ni Jesukristo pinaagi sa mga full-time nga misyonaryo. Nakahibalo na ko og gamay mahitungod sa Ang Simbahan ni Jesukristo sa mga Santos sa Ulahing mga Adlaw pinaagi sa akong uyoan ug apohan nga babaye. Sila ang unang mga miyembro sa Simbahan sa akong pamilya.

Si Maritza kauban nako sa tibuok nakong pagkakabig, mitabang nako nga mapalambo ang akong pagpamatuod sa Manluluwas ug sa Iyang ebanghelyo ug mitabang nako matag higayon nga nagkinahanglan ko niya.

Nakat-on ko gikan niya sa hingpit nga kalipay sa pagpuyo sa ebanghelyo nga may kayano ug determinasyon. Gidayeg nako ang iyang pagkamaayo nga makig-abi-abi sa uban, paagi sa paghiusa sa pamilya ug mga higala, ug ang iyang pagpadayon sa pagkab-ot sa temporal ug espirituhanong mga tumong. Akong nakat-onan gikan niya nga kon atong mahibaloan ang kamatuoran, kinahanglan nga atong buhaton unsa ang atong nakat-onan, magtuman sa mga sugo ug gamiton ang mga pagtulun-an sa ebanghelyo diha sa atong kinabuhi ug mga pamilya. Aron magpabilin nga matinud-anon, kinahanglan kita nga magmaisogon sa atong pagpamatuod ug maningkamot nga lig-on nga magkupot sa atong pagtuo, bisan pa sa kalisod.

Niadtong 2010, si Maritza namatay sa usa ka aksidente sa sakyanan. Usa kadto ka subo nga higayon alang nako, apan nakahibalo ko nga pinaagi sa plano sa kaluwasan ug sa Pag-ula ni Jesukristo, makita nako siya pag-usab. Nakahibalo ko nga siya nagpadayon kon asa man siya karon sa sama nga malipayon nga kinaiya ug kakugi nga maoy naglarawan niya dinhi sa kalibotan.

Ako nakahibalo nga kini nga “kahimtang sa pagsulay” (Alma 12:24) dili mao ang kataposan sa tanan. Ako nakahibalo nga makita nato pag-usab ang atong pamilya ug mga higala sa pikas nga bahin sa tabil. Ato silang makita, atong matimbaya, ug makauban pag-usab. Atong masinati ang sama nga mga pagbati sa gugma nga naa nato alang sa usag usa dinhi sa kalibotan (tan-awa sa Doktrina ug mga Pakigsaad 130:2). Ang mga miyembro sa akong pamilya anaa didto. Ako nakahibalo nga si Maritza anaa usab didto.

Si Maritza malipayong nakigsulti sa tanan mahitungod sa ebanghelyo dinhi sa kalibotan. Segurado ko nga iyang gihimo ang sama nga butang didto sa kalibotan sa mga espiritu (tan-awa sa Doktrina ug mga Pakigsaad 138:57). Siya nagtudlo mahitungod sa walay kataposang Pag-ula sa Manluluwas ug sa malipayong balita nga tungod Niya ug pinaagi sa mga ordinansa sa templo, kita makabalik sa presensiya Niya ug sa Amahan aron magpuyo isip mga pamilya sa kahangtoran.