“E Tuangiira Iesu Kristo bwa Ti Na Taua te Toa,” Riaona, Maati 2021
Te Rongorongo n te Riaona ni Katoa Namwakaina, Maati 2021
E Tuangiira Iesu Kristo Bwa Ti Na Taua te Toa
Ti kaitiakaki ao ti kamaiuaki ngkana ti uringa ara Tia Kamaiu ni katoa wiiki.
Te Kabanea ni Katairiki iroun Carl Heinrich Bloch
Imwain Matena, Iesu Kristo e kana te kabanea ni katairiki ae atongaki bwa te Toa Are te Riao. N tokin te amwarake aei, E kabwarabwara te toa nakoia taan Iriiria. E tabeuta te kariki ao e tataro ni kakakabwaia. “Kam na karaoa aei bwa kanuringau,” E taku (Ruka 22:19). Imwiina e kakabwaia ao e tibwaua te mwangko ni wain.
Mwakoron te Nebonebo ni Katoa Wiiki
Ngke e kaokaki Ana Ekaretia Iesu Kristo nakon te aonaaba, e riki te toa bwa mwakoron te nebonebo ni katoa wiiki. N tain te taromauri, e kakabwaiaki te toa ao ni kabutaki irouia naake iai irouia te nakoanibonga. A tataro ni kabonganai taeka man booki aika tabu (taraa Moronaai 4; 5). Aomata ni kabane ake n te taromauri a kana te kariki ao n nima te ran ni kanuringa, Iesu Kristo ao Ana angakarea ibukira, te kawai ae E tuangiira bwa ti na karaoia.
Rawetamnei iroun Angela Suitter
Katauraoi ni Katongnga
Ni katauraoi n taua te toa, ti riai ni koaua raoi n iangoa maiura ao ara rinerine. Ti riai n rairananora n ara kairua ao ara bure inanon te wiiki ae nako, n raonaki ma butiakin te Atua ibukin kabwaraan ara bure. Ti aki kainnanoia bwa ti na kororaoi n taua te toa, ma a riai nanora n nanorinano.
Te Tataro i Ketetemwane, iroun Del Parson
Iaon Riki te Kariki ao te Ran
Tauan te toa bon te tai ae tabu, ao ni mimitong. Tataro n toa a kauringiira bwa ngke ti taua te kariki ao te ran, ti uringa rabwatan ao raraan Iesu Kristo are e anga ibukira. Ti berita bwa ti na Iria ao ni maiuakina aron te maiu ni Kiritian. Ti berita bwa ti na kataia ni kawakin ana tua te Atua. Ibukin aei, te Tamnei ae Raoiroi e na anganiira te kabebeteaki, te kairi, ao kamarurungakira.
Kabouan Berita aika Tabu
Ngkana ngaira ake ti a tia ni bwabetitoakio ao n taua te toa ma te nano ae itiaki, ti kaboua te berita are ti karaoia ngke ti bwabetitoaki. E raonaki aei ma karekean te Tamnei ae Raoiroi ao n tia ni kaitiakaki man te bure ae kanga ti a manga bwabetitoaki riki. Aio ana kantaninga ao ana akoi Iesu Kristo ae anganiira n tatabemaniira nako. Bon akea tain te raiannano ao kabwaraan ara bure.
Bwa Kam Aki Toki n Uringai, iroun Gary L. Kapp, e na aki katotongaki
Tera Ae a Reirei Booki aika Tabu Ibukin te Toa?
Ti riai n tarai arora n tamnei, n tirotiroa raoi nanora, imwain, anaakin te toa (taraa 1 I-Korinto 11:28).
Imwiin Are E a Mangauti, Iesu e kaotia nakoia Ana aomata n aban Amerika bwa a na kanga n taua te toa (taraa 3 Nibwaai 18).
A tia burabeti n taai aikai n tuangiira bwa ti na kabongana te kariki ao te ran ibukin te toa, ma te bwai are ti kanna ke n nimma e aki kakawaki (taraa Reirei ao Berita aika Tabu 27:2). N tabetai naake iai aorakiia ni kanakina a kona ni kabonganai bwaai riki tabeua ae ti tebo ma te kariki.
© 2021 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/19. Kariaiakaki rairana: 6/19. Rairan te Monthly Liahona Message, Maati 2021. Kiribati. 17464 859
Te Kabanea n Amwarake, iroun Carl Heinrich Bloch; tamnein te ataeinnaine ngke e tataro iroun Angela Suitter; Te Tataro i Ketetemwane, iroun Del Parson; Bwa Kam Aki Toki n Uringai, iroun Gary L. Kapp, e na aki katotongaki