Te Moan Beretitentii a Kabotoa Aia Taromauri i aon Kristo

E taku Beretitenti Gordon B. Hinckley bwa “Akea te tai inanon te ririki, ae te kabanea n tamaroa irarikin te Kiritimati,” n tain Te Taromauri n te Kiritimati man te Moan Beretitentii are e karaoaki n te Conference Center i Salt Lake City ao e kanakoaki n te kanakobwana nakon te aonaaba.

“Ti anga nanora nakoia ake a kainnano. Te tangira e tokanikai iaon te riribai… . E rikirake te tangira ni korakora, naano a rikirake n nanoanga. Ti na keiaki riki ni kamarurungira n rabwatara ao n tabeki riki baai aika aikoa konabwai. A kakukureiaki nanoia ataei. E katobibiaki n te kukurei ae raka. Iai te kukurei ae korakora ae namakinaki ni boong aikai.”

Imwiin karakinan buan tinana imwaain te Kiritimati n te ririki 1930 ao buan buuna ae karawawata n te ririki 2004, e taku Beretitenti Hinckley: “E ota rinanon te roo bannan Natin te Atua, are e anga Maiuna bwa ti aonga ni maiu. Aio nanon raoi te Kiritimati, koauan te Mwakuri ni Kamaiu, are karaoaki iroun Te Tia Kaboa Maiun te Aonaaba.”

Beretitenti Hinckley e kakoaua bwa te Tia Kamaiu e anga nakoia aomata ni kabane te kaantaninga ibukin reken te kamaiuaki, n taai ni buaka naba ngkai, ni itabarara, ao kangaanga aika korakora.

Beretitenti Thomas S. Monson, te Moan Kauntira n te Moan Beretitentii, e taku bwa te Kiritimati bon “te tai ibukiia utu; te tai n ururing; te tai ni kakaitau.

“Te namakin n te Kiritimati bon namakinan te tangira ao te tituaraoi ao te raoiroi … . Au kaantaninga bwa te namakin n te Kiritimati bon te bwai ae na tiku inanora ao ni maiura, tiaki n ti tain te Kiritimati, ma rinanon te ririki ae nang roko.”

E taku Beretitenti Monson bwa ngkana ti kawakina namakinan te Kiritimati, ti kawakina namakinan Kristo.

“Taeka ni butimwaai ae, ‘Akea te nne’ a aki ti ongo Iotebwa ao Maria imwaain bungian Iesu, ma E teimatoa n rinanona inanon ana mwakuri ni maiuna n te aonaaba,” e taku Beretitenti Monson. “Ni mweengara ni boong aikai iai taabo n amwarake, taabo ni matu, taabo ni kakakibotu. Iai te tabo ibukin Kristo? Iai ara tai ibukin … waaki aika bon kanoan maiura ni katoa bong. Iai ara tai ibukin Kristo?”

Beretitenti James E. Faust, te Kauoman ni Kauntira n te Moan Beretitentii, e reirei bwa “n te tai aei n te ririki ao ti kauringa bungiakin [te Tia Kamaiu], ti riai ni iangoa naba Matena ma te karinerine ae korakora ao korakoran tabun [te] Mangauti.”

N ana marooro Beretitenti Faust, e kabotoa i aon teuana Ana “reirei te Tia Kamaiu ae nakoraoi man korakora … karaoan te beku ibukiia tabeman are aki kona ni karaoia i bon ibukiia.”

Te anganano n te aro ae raba e kaota Ana tangira te Tia Kamaiu, e taku Beretitenti Faust.

“I kan kaota kukurein nanou ao au kakaitau nakoia aomata ni kabane ake a kauka nanoia ao anga nakoia tabeman.

“Ngaira ake ti angabwai n te aro ae raba iai iroura namakinan ana tangira te Tamnei are e koburake mai inanora ngkana ti karaoi mwakuri ibukiia raora ake aki kona n ataaki bwa mairoura. Te angabwai n te aro ae raba e angan riki te bwaintangira kakannatona ae raka.”