Te Tabo Ibukin Rongorongon te Utu e karaoa te bukamaru ibukin Katei man te Aonaaba ni Kabuta

Rarangaan te bwai ni katamaroa ibukin aia Kiritimati kaain Scandinavia ao anenean “Auld Lang Syne” n te taetae n Scotland bon ti uoua man waaki aika karaoki n Ritembwa n te Tabo Ibukin Rongorongon te Utu i Salt Lake City. Naake a iri angareirei n te tairiki aika aki kaboaki ae moanaki man Nobembwa 28 nakon Ritembwa 22 a reiakini katei ni motirawa man aaba aika kaokoro ao kurubu ni katei.

Angiin angareirei aika uarereke a baireaki ao a reiakinaki irouia kaain aaba aika kakaokoro aika a marooroakini bwaai n aron te bukamaru n Ritembwa, amwarake, katamaroa, ao katangitang. A bon uki nakon te botanaomata taian angareirei, ao a karaoaki naba waaki ibukin te utu.

A kaungaaki utu bwa a na karaoi aia katei riki aia ataei. A tuangaki ataei bwa a na korea tamneia, aia karo, ao tibuia iaon te tiaata (chart). Aomata ni kabane a anganaki aia kanre te peppermint, ao utu ake a kona ni kabwanina aia katei riki nakon aua te atu anganaki te kai ni koroboki ae mwakoro iaona taeka aikai “Rongotongon te Utu e kakukurei.”

A karinanaki iango ibukin bootakin te utu n te tairiki ao rongorongon te utu a bon tauraoi ibukia utu bwa a na uoti nakon mweengaia. Teuana te beeba e kabwarabwara aron te intawiu ma tiibu irouia ataei ao kaaro.

A kaairaki ma aaba aika kaotaki Norway, France, Germany, Scotland, Netherlands, te Czech Republic, Sweden, ao Denmark. Aia katei Iutaia ao bwaeonia a marooroakinaki naba.

Diane Loosle, te manatia ibukin mwakuri aika tibwa wakinaki, e taku bwa aio te moan tai ae mwanenaki te waaki aei man te tabo aei.

Titita Loosle e kabwarabwara bwa waaki a kainetaki ibukin karokoaia aomata aika aki tataneiai n roko n te Tabo ibukin Rongorongon te Utu. E taku neiei: “Teuana ana kouru te tabo ibukin rongorongon te utu bon bairean aron kawaran te tabo ibukin rongorongon te utu bwa e na tamaroa riki iai te namakin. Ti tangiria aomata bwa a na roko ao a na kunea bwa e aki kangaanga n aron are a iangoia.”

Boton ana Tabo te Ekaretia ibukin Rongorongon te Ekaretia bon te kabanea ni bubura mai ibukon tabo ae aekakina, ao e uki nakon te botanaomata n akea boona. E katautauaki bwa 1,900 ke mwaiti riki aomata aika kakawara te tabo ni katei riki ni katoaa te bong are e uki iai.

Angareirei aika akea booia nakoia naake a kakaokoro rabakauia ae a tia n rinanoi, ni ikotaki ma aika tibwa moan waaki, ao 125 taan mwakuri aika kamatoaki ao aika a itera n tai a tauraoi ni ibuobuoki. E kaniia 400 taan anganano aika tia ni kataneiaaki aika a anga aia tai ni ibuobuoki naba. Ibukin rongorongona riki, nakon www.familysearch.org.