Te Rekooti ibukin Katean te Tikauti iaon Cape Town
Bon ngaia te kateniman n Tikauti n rongorongon ngkoa Aberika Maiaki n riki bwa te kateniman n Springbok Tikauti (te kabanea n rietaata ni kaniwanga n Tikauti), ma ngaia naba te moan are e karekea ana Kaniwanga n te Beku ibukin te Atua.
Tera te aba ae ko maeka iai, e tangira te mwakuri ae korakora ni karekean te moan ni kaniwanga n te Tikauti. Ngaia ae iangoa te mwakuri ae korakora ae kainanoaki ni karekean te kaniwanga tenua te tai. Rocco du Plessis bon te moan n Springbok Tikauti (te kabanea n rietaata ni kaniwanga n Tikauti) n te ka 26-n ririki n rongorongon ngkoa te Moan Tautia i Edgemead i Aberika Maiaki. Ngaia ae karekean Springbok Tikauti (te kabanea n rietaata ni kaniwanga n Tikauti) tenua te tai bon te tokanikai ae kangaanga karekeana.
E ngae n anne, manga iai te kaniwanga ae karekea Rocco n te ririki ae nako are e rangin ni kakawaki nakoina. “Karean te kaniwanga ae te Beku Ibukin te Atua e a tia ni buokai ni karekea ae raka riki ibukin rikirakeu n rabwata ao n tamnei,” e taku. “Bon ibukin am reitaki ma Tamam are i Karawa.”
“Ana burokuraem te Tikauti ikai e rangin ni kainanoaki,” e taku Rocco, are kaain te Panorama Uoote n te Cape Town Aberika Maiaki Titeiki. E kangaanga karekean te Springbok. E koaua, ma mataniwiin te Tikauti a mena ikekei bwa ana buokiko. Ma e bon teimatoa ni matoatoa. “Ngkana ko aki mwakuri korakora, ngkana ko aki kakoroa nanon mwiokoam, ao e na bon aki reke iroum,” e reitia Rocco. Te tai ae mwaiti, ni babaire, ao te korakora e nakon taian kaniwanga n tatabeua ibukin karikirakeam n ana burokuraem te Tikauti, are e i Aberika Maiaki e bon aki boutokaaki man te Ekaretia.
Ma ibukin te Kaniwanga n te Beku ibukin te Atua, e taku Rocco bwa aia boutoka ana karo ao ana Mataniwi n Ataeinimwaane e karika te kaokoro. “A tangiri ngkami bwa kam na karekei ami Beku Ibukin te Atua,” e taku, “ngaia ae angiin te bwai ae kainanoaki bon bwaai aika kam a tia ni kakaraoi ni katoa bong.” Ngaia ae ti te mwakuri ma am karo ao am mataniwi n tau mwiin am kekeiaki n taabo aikanne. “Angiin te bwai ae kainanoaki ni maiuia kaain te Moomon bon kanoan te bwai ae tangiraki ibukin Beku Ibukin te Atua—ngkana ko karaoi.” N taekana riki teuana, ngkana e kakaonimaki n roko ni bootakin te Ekaretia te ataeinimwaane, tataro n tainako, reirei iaon booki aika tabu, ao ni kakoroan nanon tabeia kaain te nakoanibonga, e karaoa te mwakuri ae eti.
Riiki bwa te Springbok Tikauti
Bon ti tao teuana ke uoua te betienti n tikauti ni kabuta te aonaaba ae a karekea ana kabanea n rietaata ni kaniwanga te Tikauti i Aberika Maiaki. Ao tao teuana ke uoua te betienti ibuakoia Springbok Tikauti aikai ake a kabanea e raka iaon teuana maibuakon tenua kakaewenako ibukin te Explorer ae kona n reke. E karekei ni kabane kaniwanga ake teniua Rocco, are e a riki ngaia bwa te kateniman n Tikauti i Aberika Maiaki ni karekea te mwakuri aei.
Tikauti i Aberika Maiaki a karikirakeaki rinanon te burokuraem ae moa man te Pathfinder nakon te Adventurer nakon First Class nakon te Explorer. Te kanikina ibukin te Explorer e bwenauaaki inanon tenua te mwakoro: Land Scouts, Air Scouts, ao te Sea Scouts. Ni bon arona te Tikauti e na rinea teuana mai buakon te mwakoro ni kabanea ana iango iaona n ana tai ni mwakuriia ana kabanea n rinan—Springbok. Rocco e rinei ni kabane ake tenua.
N ikotaki ma kanikina ao bwaai aika kainanoaki ake tabeua, iai kanikina tabeua aika onoti nakon aekan Explorer n tatabeua nako: Te Land Explorer e karekea ana Backwoodsman ao ana kanikina n te Mapping. Te Air Explorer e karekea ana Air Navigator ao ana kanikina te Air Traffic Controller. Ao te Sea Explorer e karekea ana kanikina ae te Helmsman ao Boatsman ibukin te ieie ao te aoao.
E kabwarabwara Rocco bwa e na kabanea tao uoua boong ni motirawa n te reirei iaon te kanikina ni karekei kanikinaa ni kabane. Iai kanikinaa aika mainaina—te rabakau n te koroboki irarikin rabakaum ni mwakuri. Ao iai kanikina aika kiriin—karaoan raoi aron rabakaum. Te katooto, ngkana ko na karekea am kanikina ibukin te Backwoodsman, ko na moana am reirei n aron te kamaiu n te buakonikai, borau n taian itoi, ao karaoan te ai n akea te matiati. Ngkanne e a roko karaoana n te mwakuri. Ko katukaki ibuakonikai n ti ngkoe inanon te maan ae 48 te aua.
Ngaia ae rangi n tabetabe Rocco ma te mwakuri n Tikauti inanon ririki aika mwaiti ngkai. Man Beberuare ni karokoa Ritembwa n te ririki ae nako, te katooto, e aki toki n nako inanon motirawa n te wiiki aika mwaiti. “E tara n ae I a tia n tabetabe iaon reirei n te kanikinaa,” e taku. N ikotaki, ma nimaua ririki n nako, e a tia Rocco n riki bwa te tia kairiiri n te bootaki n tikauti. Are nanona bwa e a tia n tararua aron te katauraoi ibukin ana kaembwa te tikauti ni kabane. E na bairea aron te amwarake, karaoa te kabobwai, katiteuanai bootaki n tikauti, taibin boomwa ibukiia Tikauti ake tabeman ao aia tiaina aia karo, ao n tarai ni kabane kaembwa ake a karaoaki.
Teuana anuan Rocco ae a tia n reiakinna bon arona n nanomatoa. “Angiin ana kanikina e aki bwaati n te moan tai n te reirei,” e taku. “Inanon onoua namwakaina ko kona n oki n nako ni karaoia riki ke tuanga te ikawai temanna bwa e na ukeriko iaona.” Te katooto, teuana te bwai ae kainanoaki ibukin te First Aid bon te kabaebae. “I aki bwaati te kabaebae bukina bwa e terenako teutana tabon au kabae,” e taku Rocco. “Ngaia are I a manga karaoa riki au kabaebae bwa I aonga n nakon te kauoua ni mwaneka n te First Aid.”
Irarikin taian kanikina, iai riki karikirake tabeua ae na riai ni kabanei te Tikauti bwa e aonga n reke ana Springbok. Teuana bon te karikirake iaon te kateitei. E rineia Rocco bwa e na katea te buriiti. E na karaoa moa ana tamnei man katea tamnein te buriiti n te tikeera. Ma, kaain ana tiim aika onoman riki Tikauti, e na kateia nakon buburana ni koaua Rocco, tao 20 te buuti rietana (6 miita) ao 30 te buuti abwakina (9 miita). E kabanea e kaniia ruaiwa te aua katean te buriiti ao manga kamaenakoana.
Imwiina ao iai te mwakuri n anganano n te kaawa anne, bon te mwakuri ae bubura ibukin karekean te Springbok ao te Kaniwanga n te Beku ibukin te Atua. Ibukin bwaai aika a kainanoaki ibukin ana anganano n te Springbok, Rocco e kawariia e raka iaon 40 mweengaia ikawai bwa e na buokiia ma aia mwakuri ao karaoan uruaki aika kakaokoro. “Te bwai ae bubura ae uaia n nako bon te 40-n aua ni mwakuri ni ibuobuoki ae I kona ni kabongana ibukiia Tikauti ao te Kaniwanga n te Beku ibukin te Atua,” e taku Rocco.
Mai ibuakon bwaai ake a kainanoaki e a tia Rocco ni karekei ana kaniwanga aika kakaokoro, e kotea teuana ae onoti ae rangi ni bongana ibukin oin rikirakena: “Warekan Ana Boki Moomon,” e taekinna Rocco n akea maakuna. “Anne te kabanea ao te kaniwanga ae rangi n nakoraoi.”
Riiki bwa te Mitinare
“I a tia ni wareka Ana Boki Moomon teuana te tai, teuana te ririki n nako, ma I ti warekia bwa e aonga ni bane,” e kabwarabwara Rocco. “Ngke I a manga warekia riki, I tangiria n reiakinna raoi man karekea au koaua iai.” E moana warekan Ana Boki Moomon n te kawai ae rangin ni kaokoro n ana kauoua n tai. “Ngkai ni katoa tai ngke i warekia ngkai, I tataro imwaina man bubutia Tamnein Tamara are i Karawa bwa e na mena irou n au tai ni wareware.”
E a kaman waaki Rocco n ana karikirake ae bubura ae imwiina riki—bwa e na tibwaua ana koaua ma aomata tabeman ngkai e katauraoia nakon te mwakuri ni mitinare ae bwanin ana tai. Ana atatai iaon te Tikauti ao karekean Kaniwanga n te Beku ibukin te Atua e a tia ni buokia n rikirakena ao n rikina bwa te mitinare. “Ibukin kabutanakoan te euangkerio, I tangiria n ataia bwa tera te bwai inanon Ana Boki Moomon, ao kan ataia bwa e bon koaua,” e taku. “Imwiin warekan Ana Boki Moomon ibukin te kauoua n tai, I karekea au koaua ibukina.”
E ngae ngkana akea te bwai ae na karekea man Kaniwanga n te Beku ibukin te Atua, e taku Rocco bwa e na kaman kakoroi angiin bwaai aika kainanoaki ti bukina bwa e tangiria ni katauraoia nakon te mwakuri ni mitinare. Kaean te taromauri, warekan booki aika tabu, tataro ni katoabong, ao ni ibuobuoki bon iteran kinaakin Rocco bwa antai ngaia, ao aron taraakin te Aomata ae Itiaki ni Boong aika Kaitira.
Ngkai e a tia ni karekea te wewete ibukin ana beku ni mitinare ae bwanin ana tai, te koaua ae a tia ni karikirakea Unimwaane du Plessis e kakoaua bwa e kakawaki riki nakon te buriiti are e kateia ibukin ana karikirake ni kateitei n te Springbok. Ma, tabeua mwakuri ibuakonikai ae reiakinna ngke e Tikauti e na rangi ni ibuobuoki ngkana e beku i Zimbabwe, Zambia, ao Malawi.