E Maiu Naba Natiu te Mwaaane

Te aine n au uoote e reireinai te reirei ae rangi ni kakaawaki ibukin te rau ae kakukurei ae reke man te onimaki ni koaua iroun Iesu Kristo ao Ana Mwakuri ni Kamaiu.

Ana kakabwaia te tamanuea nakon te aine aei e berita nakoina bwa e na karekea te kimwareirei n tibangana n tina. Ma inanon ririki aika bwakanako a tataro neiei ma buuna ao a tataninga reken natiia. N tokina, a kaekaaki aia tataro. N te maan ae ruaiwa te namakaina a kaonaki maiuia n te katauraoi ae kakukurei. A beenia te ruu ae onoti, a kabooi bwain nanona, kunnikai, ao bwaai tabeua ibukiia ataei; ao a kamwaita riki aia tataro. A taku taokita bwa e naki kona ni kariki riki imwiin aio, ma ngaia are miin neiei e bane iroun tetei aei.

E roko te bong are bung iai te aine aei ao e ongo tangin natina.

“Bon te nati te mwaane ae tikiraoi,” e taku te neeti.

E kainii matana te tina ao n anga ana tataro ni kakarabwarabwa. Aua te miniti imwiina, e a manga mate natina.

I nooria n te tai ni bootaki n toa uoua te wiiki imwiina. Ngkai bon te tia kaira te anene, e nako mooa n te tabo n taromauri ao n tekateka irarikin te aokan. Iaan ana kairiiri neiei ti anenea “I Ataia ae Maiu Au Tia Kamaiu” (Hymns, no. 136). E tei ni kaetia ao ni kananaua, e oota ubuna, are e kaota iai ana koaua. N taai tabetai ao e kanganga irouna katinakoan taekana. E oonga bawarena ao ni katomai riana. Ngke e toki n anene, ma e reitinako mwaingin baina, ni kairiira ngke ti anene.

Rimwi, ma rannimatana aika bwaro rikaki iaon tabana, te aine aei e kaota ana koaua n taeka aika beebete: “I ataia ae maiu au tia Kaboira. I ataia ae E momotiraoi ao E tangiriira. Ao ibukina ngkai E maiu, e maiu naba natiu.”

N ana onimaki ao I noora ana kakoaua ibukin koauan ara Tia Kamaiu, are e a tia ni karaoa te Mwakuri ni Kamaiu ibukira bwa e aonga n reke te maiu ae aki mamate ao te kamaiuaki ae akea tokina. E a tia n anaaki natina te mwaane, ma e ataia bwa e na manga anganaki n te bong teuana.