Mauri! Ngai Clara Christensen. I maeka i Keewatin, Ontario, Canada

E kukurei Clara Christensen, 11, n tarakin ana tabo mai itinanikun ana auti ae tau ibukin karinana n te karenta. E kateaki ana maeka i etan te tabuki man taraa Lake of the Woods, te nei ae moan te rababa ao ni korakora are e biri nako maiaki n te United States ao maeaon Manitoba. N tain te kabuebue ao taai e raneanea iaon te ran. N te kamwaitoro ao e raneanea te nei man te tino are e kaona te nei.

Te nei ao buakonikai are a katobibia kanga te bwai ae kamiimi ae akea n aiaron tamaroana ibukin te aomata ae rangin tatangira te mwakuri itinaniku n aron Clara. E uaua, e aoao, e akawa, e nakonako ni kakakibotu, ao ni kaembwa n te kabuebue. N te kamwaitoro e kukurei ni buti iaon te tino, takakaro n nakonako iaon te tino, tikii iaon te tino n ruo rikaaki nako naano, ao n tikeera rikaaki ni mangeen te tabuki iaon mwakoron te kaabeti (carpet). E bwaka te kamwaitoro nakon -40˚C n te tairiki, ao matenin te tino e biri imarenan aua nakon itiua te buuti (1–2 m) nanona. Ngaia ae te taini bwakan baan aroka imwain te mwaitoro ao n tain te kamwaitoro bon ana tai Clara ae rangin n tatangiria.

Te ataeinnaine ae korakora ni mwakuri itinaniku iai naba mamaten nanona inanon te auti. E mamate nanona n te wareware, korooti, ao katangan te bwai ni katangitang ae ukaki ao te biano. Iai ana kouru ibukin te reirei iaon katangan anenen kuna n taromauri ao anenen te Moanrinan. Iai te nano n akoi iroun Clara man kukurei ni buokiia ni karikirakeia aomata ao maan. E aki toki n tobwa ai tarina, ao ngkana akea ataei raoi, e katabea n ana taore ake e kaikoikoi. Taian katamwa e bon rangin n tatangiria. Lilo, Hero, ao Hope a rangin n tatangiria ao aki toki ni matu iaon ana kainiwene. E bon rangi ni mamate nanona ni karakin ana aake Nooa bukin taian man. Ngkana e a ikawai Clara ao e na tangiria ni mwakuri ma ataei ke katamwa.

Tera te bwai ae karaoia e na karaoia raoi bukina bwa e aki kona ni bwara nanona ni karokoa e tia raoi. Anuana aei e uotia nakon kakaewenako aika matoatoa riki. Clara bon te ataei are e kuneaki aorakina mai nanon uarerekena bwa te aki konabwai n taetae. Nanona bwa e ngae ngke e ata te bwai ae na riai n taekinna, kanikina a moanna ni mangaongao imarenan kaburorona ma wiina n te aro are e aki itiaki ana taetae. E a tia Clara ni kabanea te tai ae rangin ni maan ibukin kataneiaan kakamwakuran mwangaina, riana, ao newena ni katanga raoi te man ao man rengan manin taeka akanne nakon te taeka. Bon te mwakuri ae matoatoa, ma man aia ibuobuoki ana karo, e a tia n teimatoa ni kataneiai man aki bwarananona. E a kona ngkai n taetae raoi, e ngae ngke e tangira ana kekeiaki ae korakora n taeka tabeua.

N te ririki ae nako ao ataein ana kiraati Clara koraki aua a tuangaki bwa ana taetae inanon aua nakon nimaua te miniti. E rineia Clara bwa e na taetae iaon te Tiritiri Ae Tabangaki, are e bon karaoa ana taetae n aiaron are e bon mena n te tabo are a kainaki iai naake a na kamateaki. Ngke e moanna ni kataneiai n ana taetae, e kabanea waniua te miniti ao 40 te teekan bukina angiin te taeka a kangaanga atongaia. E kataneiai man kataneiai iaona. E moanna ni uarereke ana taetae bukina bwa a moanna n nakoraoi atongan ana taeka. N tokina ao e a kona n taekina ana taetae inanon te maan ae aua te miniti ao 40 te teekan, ao e rineaki irouia kaain ana kiraati bwa e na tei n taetae ibukiia. Ngke e karaoia, ataein te reirei ni kabane a bane n tatakarua man kaota kukureia. Angiia mai buakoia a kaman ata Clara ngke a koraki teuana, ao ana waaki e rangin n rikirake mani kamimi. “Te mataniwi n te reirei e tang,” e taekinna Tinan Clara. “Ana tia reirei Clara n te koraki uoua e tang. Ana tia reirei n ana koraki aua e tatakarua. Bon te tai n tokanikai—te tai ae rangin ni kakukurei inanon maiu!”

Tera ae reiakinna Clara man te bwai ae a tia n rinanona aei? “Teimatoa ni kataia,” e reireiniia ataei n taabo ni kabane. “Tai bwara n nano.”

E koaua bwa te tataro bon mwakoron ana tokanikai Clara ae kakawaki. Bon iai ana onimaki ae korakora iroun Tamara are i Karawa ao Iesu Kristo. Moanrinan, bootakin utu n te tairiki, kamatebwaian booki aika tabu, ao ana reirei ana karo a bon tia ni buokia. Tarina ae te ikawai a bon karika te okoro naba, n rinanon aia banna ni katooto ae tamaroa ao aia boki ni wareware. N te tai naba are a koro 12 aia ririki Carly, 18, ao Josie, 15, a moantaai ni kanim taian boutita man te New Era iaon aia kiraati. E a kaman kamatenanoi koroboki aika tabu Clara ao n reiakin ma tarina ana onoua ni B Beretitenti Hinckley.

Tamana bon te beretitenti n te mwaanga, ao tinana bon te beretitenti irouia Ataeinaine, ngaia ae teimatoa Clara n iriri ana bootaki ni kakukurei te mwaanga. Te mwaanga ae te Kenora e uarereke n tain bwakan banikai imwain rokon te mwaitoro, mwaitoro, ao te tiburing. Ni bon koauana, Clara bon ti ngaia kaain ana kiraati n te Moanrinan, are e kairaki iroun tibuna te unnaine, te Beretitenti n te Moanrinan. Man n tain te kabuebue, ngke ngaa taan neweaba a bane n roko n neweaba n te Lake of the Woods, e onrake te mwaanga irouia taan neweaba ni katoa Tabati. E kukurei Clara ma raoraona aika boou. A rangin n tena ma te Ekaretia kaain ana utu ni kabuta te ririki man kaekakin waaki ni kakukurei n te titeiki I Winnipeg, Manitoba, uoua ma te iterana te aua kaeakina nako maeao. Ngkana a okira mweengaia n te tairiki ao aki toki n noori taura ma karaia aika kakaokoro n oota i meang ni mwamwaie i karawa.

E tiku ni maeka Clara ma ana utu ake tabeman. N tain te Kiritimati ai tarina ma ai mwanena ai tamana ma ai tinana a bane ni matu n ana auti Tibuna te unnaine. A amwarake, anene, katinei titaokin, katea katotongan moani bungiakin te Tia Kamaiu, ongora nakon karaki ni Kiritimati, man katorobubua ni kabane n taromauri. E uoti n moaningabongin te Kiritimati tiaokureti ae kabuebue, te bwan ae kabuebue, ao bwain tangira. N tairikin te Kiritimati ao a manga ikotaki kaain te utu ni katairiki n ana auti Clara. Ni Bongin te Itau (te bong are imwiin te Kiritimati) ao a bon katairiki kaain te utu n amwarake n aia utu nako ma aekakin amwarake aika kakaokoro.

E a tia ni ikawai rake Clara man kairaki n tamaroan bwain te aonaaba aei, aia tangira kaain te utu, ao ootan ana euangkerio Iesu Kristo. Aanga ni kabane n anai nano aikai e kona ni kakoauaki man ubuna ao man tamneina. Riki n tain te kamwaitoro ae korakora e kakukureia maiuia aomata aika rangin ni kina. E taku tinana, “E rabwa te tangira bwa iai Clara.”