Ko te Tango Ake i te Ingoa o Ihu Karaiti

I te tau 2018, i te Whare Wānanga o Utah, i hangaia tētahi karahipi ahorangi motuhake e kīa ana ko te “Dr. Russell M. Nelson rāua ko Dantzel W. Nelson, arā, te Kaiwhakahaere Matua i te Cardiothoracic Surgery”—cardio, tōna tikanga ko te “ngākau,” ā, ko te thoracic, tōna tikanga ko te “poho” koinā te ingoa o taua tohu ahorangi motuhake. He mea whakahōnore i ngā mahi a Tumuaki Nelson i roto i ngā mahi pōkai ngākau me te tautoko i whakawhiwhia ai i tana hoawahine, a Dantzel. He mea taunaki tēnei ahorangitanga e tētahi putea tautoko i whakaritea ai hei mea e haere ake nei i ngā tau e kainamu mai ana. Ko te tangata e kōwhiria ai mō tēnei karahipi ahorangi tētahi tangata e whakamānawatia ai, e tautokona ai ki te taha putea, ā, ka whiwhi hoki i ngā pūtea tautoko rangahau.

Ko te tākuta tuatahi i kōwhiria ai mō tēnei karahipi ahorangi, arā, ko Tākuta Craig H. Selzman, he tākuta pōkai ngākau whai pūkenga ehara i te mema o tō tātou hāhi. I te huinga i hoatu ai tēnei karahipi ahorangi ki a Tākuta Selzman, he tokomaha ngā manuhiri whakahirahira i reira, tae atu ana ki a Tumuaki Nelson rāua ko tana hoawahine a Tuahine Wendy W. Nelson. I roto i taua hui, i kōrero māhaki a Tumuaki Nelson e pā ana ki āna mahi pōkai ngākau.

Kātahi a Tākuta Selzman ka kōrero mō te hiranga nui o tana whiwhinga ki tēnei karahipi ahorangi. I hāngai ana kōrero ki ngā rā e whā i mua, whai muri iho i tētahi rangi roa i te ruma pōkai ngākau, ka kite ia e tika ana kia pokaina anō tētahi o ana tūroro. I te ngenge rawa, i te pōuri i runga i te mōhio ka noho anō ia i te hōhipera mō tētahi pō anō.

I taua pō rā, kōrero ai a Tākuta Selzman i tētahi kōrero ki a ia anō nā konā panoni ai tōna oranga. I taua wā tonu, i whakaaro ia: “Hei te Paraire, ka tohua au ki taua karahipi ahorangi kua whakaingoatia ki te ingoa o Tākuta Nelson. E mōhiotia ana ko ia tētahi tangata i kaha pākorokoro i ōna kare ā–roto, i whakaaro nuitia e ia ngā tāngata katoa, ā, kīhai rawa i takariri. Ināianei, nā te mea ka hono nei tōku ingoa ki tōna me kaha ake au kia rite ki a ia.” He tākuta ngākau atawhai kē a Tākuta Selzman. Engari i te hiahia ia kia pai rawa ake.

I mua, tērā pea kua whakamōhiotia tana tīma e pā ana ki tana ngenge me tana hōhā nā te mea tērā pea nā te āhua o tana reo, o tana mahi rānei mōhio ai rātou e pērā ana ia. Engari i te ruma pōkai ngākau i taua pō, i kaha a Tākuta Selzman kia tino nui tana tautoko, tana manawanui ki tana tīma. He mea nui tērā āhuatanga ki a ia, ā, ka whakatau i roto i a ia anō me kaha tonu kia rite ki a Tākuta Nelson.

E rima tau ki muri, ka takohangia atu e Tumuaki Nelson ana pepa rangahau ki te Whare Wānanga o Utah. I haere ngā mana nui o te whare wānanga ki te tuku mihi ōkawa ki a Tumuaki Nelson. I te wā o tēnei hui, i kōrero a Tākuta Selzman anō. E aro ana ki ngā pū ingoa o Tumuaki Nelson, RMN, ko tāna, “Kei reira tētahi whakaaro ‘RMN’ e noho ana hei kara i te wāhanga Cardiothoracic Surgery ki te Whare Wānanga o Utah.”

Hei ngā wā e raru ana, tā Tākuta Selzman i whakamārama mai: “Ka pērā au i tā mātou e whakaako nei ki ngā tākuta whakangungu—kia aro, waiho atu, kātahi ka pau te kaha ki te mahi i tāu e taea ai. Kei te ora tēnei whakaaro i roto i a mātou ia rā, ia rā. Ka hoatu e mātou ngā pine ki ngā mema katoa o tō mātou wāhanga, ā, ki ia tauira anō hoki. Kei te wāhi whakararo o taua pine ngā pū kupu “RMN.” Ko te kara RMN te tūāpapa o tā mātou whakangungutanga; kei te whakaako mātou i tērā ki ngā tāngata katoa.” I pai ake tā Tākuta Selzman waiaro i tāna o mua me ōna wawata nā te mea kua hono tahi tōna ingoa ki te ingoa o Tumuaki Nelson.

Nā ēnei āhuatanga e hāngai ana ki a Tākuta Selzman ka ui au ki ahau anō: “He aha ōku panonitanga nō te hononga o tōku ingoa ki te ingoa o Ihu Karaiti? Kua pūmau au ki tētahi kara Karaiti nā konā? Kua tino pono taku ngana kia rite ki a Ia?”

Kia aro ki a Tākuta Selzman, ka kite tātou i ngā hāngaitanga e rima e pā ana ki te āhuatanga o tā tātou tango ki runga i a tātou te ingoa o Ihu Karaiti. Ahakoa e tīmata ana taua āhuatanga ki te rumakitanga, kāore anō kia oti tae noa ki te wā e urutapu ana tātou, ā, tae noa ki te wā kua tino rite ake ki a Ia.

Ko te hāngaitanga tuatahi ko te whakahono. Ko tā Tākuta Selzman whakatau ki taua tohu ahorangi Nelson te maurua i whakahonoa tōna ingoa ki te ingoa o Tumuaki Nelson, ā, ka tīmata a Tākuta Selzman ki te whakahono atu ki te ingoa o Tumuaki Nelson. Ina tangohia ki runga ki a tātou te ingoa o Ihu Karaiti, ka whakahonoa ō tātou ingoa ki Tōna. Ka whakahono ki a Ia. Ka mōhiotia koangia tātou he Karaitiana. Ka whakamānawahia te Kaiwhakaora, ā, ka tū ake tātou kia tatauria hei mea Nāna.

E pātata ana ki te whakahono tētahi atu hāngaitanga—arā, te whakamaharatanga. Ina haere a Tākuta Selzman ki roto i te tari, ka anga atu ōna karu ki te metara i whiwhi ai ia i te wā i whakatauhia taua tohu ahorangi Nelson ki runga ki a ia. Nā tēnei metara mahara ai ia ki te kara RMN ia rā, ia rā. Mō tātou, mā te kai i te hākarameta e āwhina ai kia mahara tātou ki a Ihu Karaiti puta noa i te wiki. I a tātou e kai ana i te hākarameta, ka meatia e tātou i runga i te maharatanga ki te utu i utua ai e Ia hei hoko i a tātou. Ka whakahoungia tā tātou kawenata kia mahara ki a Ia, kia kitea Tōna nui, ā, kia whakamoemititia Ōna painga. Ka whakamoemiti putuputu nei tātou kei roto anake i Tōna aroha e whakaorangia ai tātou i te matenga o te tinana me te wairua.

Ko te tikanga o te maharatanga, arā, he whai i ngā tohutohu a te poropiti a Arami kei roto nei i te Pukapuka a Moromona. Ka “tukua e [tātou] kia meatia ā tātou mahinga ki te Ariki, ā, ahakoa [haere ai tātou ki hea] tukua kia meatia ki te Ariki; … ka tukua [e tātou] kia hāngai katoa [ō tātou] whakaaro ki te Ariki; … [ā] ka tukua ngā kare ā–roto o [ō tātou ngākau] kia whakataungia ki runga i te Ariki mō āke tonu atu.” Ahakoa kua warea tātou e ērā atu āhuatanga, ka ū tonu te mahara ki a Ia, pērā i tā tātou mahara ki ō tātou ake ingoa, ahakoa ērā atu mea e aro nei tātou.

Ko te maharatanga nui ki tā te Kaiwhakaora mō tātou te hāngaitanga tuatoru—arā, ko te whakatinanatanga. Ko tā Tākuta Selzman he whakatinana i tā Tumuaki Nelson me te kara RMN. E whakapono ana ahau ko te kara o Tumuaki Nelson te whakatinanatanga mai o tana ū kaha ki a Ihu Karaiti mō te roanga o tōna oranga. Mō tātou, ki te kaha aro tātou, ki te kaha mahara tātou ki a Ihu Karaiti, ka kaha ake tā tātou hiahia kia rite ki a Ia. Pērā i Ana apataki, ka panoni tātou e pai ake ai tā tātou aro ki a Ia, he mea kaha ake i tā tātou aro ki a tātou anō. Ka ū tātou kia rite ki a Ia, ā, ka whaia kia manaakitia ki Ōna āhuatanga. Ka inoi pono tātou kia whakakīa tātou ki te aroha noa, arā, ki te aroha tūturu o te Karaiti.

Pērā i tā Tumuaki Nelson i whakaako ai i Āperira: “Ki te noho mai ko te aroha i ō tātou whatumanawa, ka ngaro haere te hiahia ki te whakaiti i ētahi atu. Ka mutu tā tātou whakawā i ngā tāngata kē atu. Ka aroha noa tātou ki ngā tāngata katoa, ahakoa te āhua o tā rātou hīkoitanga i te ao. He tino whaitake nui te aroha noa ki ngā tāngata katoa i ō tātou whanaketanga. Ko te aroha noa te tūāpapa o te ira atua.” E haere ngātahi ana me te aroha noa, ko tā tātou whai, “whakawhanake, … ā, ka whakawhānui” i ērā atu takoha o te wairua mai i te Kaiwhakaora, tae atu ana ki te ngākau pono, te manawanui me te ngākau ū tonu.

Mā te whakatinana i te āhua o Ihu Karaiti e puta ai tētahi hāngaitanga tuawhā—arā, ko te whakahāngai ki Ana take. Ka hono atu ki a Ia i Tana mahi. I tana mahi hei Tākuta pōkai ngākau, He kaiako, he ringa whakaora, ā, he kairangahau a Tākuta Nelson. Ko te pine i whakamahia i tā Tākuta Selzman wāhanga tētahi mea e whakanui ana i ēnei tūāhuatanga, kei runga rā ngā kupu ako, whakaora, me te rapu. Mō tātou, ko tētahi wāhanga o te tango ake ki runga ki a tātou te ingoa o Ihu Karaiti he hiahia, he aro pūmau, ā, he hīkaka ki te whakahāngai i ō tātou whāinga ki Āna. Ka hono atu tātou ki a Ia i roto i Tana mahi ina “arohaina, tohaina, ā, tonoa.” Ka hono tātou ki a Ia i roto i Tana mahi ina minita atu ki ētahi atu, ki te hunga e raru ana me te hunga e taotū ana, e māngi ana, e pōraru ana rānei i ngā āhuatanga o te oranga.

Nō reira ka kaha ake tā tātou tango ake ki runga i a tātou te ingoa o Ihu Karaiti mā roto i te whakahono, te mahara, te whakatinana me te whakahāngai. Mā te mahi i ēnei mea e whā ka puta ake tētahi hāngaitanga tuarima—arā, ko te whakamana. Ka toro atu tātou ki te mana o te Atua me ngā manaakitanga i ō tātou oranga. Mā te tohu ahorangi Nelson e tuku ki a Tākuta Selzman tētahi whakamānawatanga me ngā pūtea tautoko e whakamahia ana ki te panoni i te ahurea i tana wāhanga. Ka whakamahia tēnei “hoatutanga mana” hei āwhina i ētahi atu. He pērā anō, ina tangohia ake ki runga ki a tātou te ingoa o te Kaiwhakaora, ka manaakitia tātou e te Matua i te Rangi ki Tana mana kia taea ai e tātou te whakatutuki i tō tātou mīhana i tēnei ao kikokiko.

I a tātou e mea ana i ngā kawenata anō ki te Atua, ka kaha ake tā tātou tango ki runga i a tātou te ingoa o Ihu Karaiti. Waihoki, ka manaakitia tātou kia nui ake Tōna mana ki runga ki a tātou. Pērā i tā Tumuaki Nelson i whakaako: “Ko ngā tāngata katoa e meatia ai ngā kawenata i roto i ngā rumakanga i roto i ngā temepara—ā, ka puritia ērā—ka nui ake tana toronga ki te mana o Ihu Karaiti. … Ko te mana o te rangi te utu mō te pupuri i ngā kawenata ki te Atua … nā konā whakakahangia ai tātou e pai ake, ai i roto i ngā taumahatanga, ngā whakawainga me ngā mamaetanga o te ngākau.”

Ka meinga tātou hei mea e kaha ake te whakarongo ki te wairua. Ka nui ake te māia kia aro atu ki ngā āhuatanga ko te āhua nei tē taea te tutuki. E whakakahangia ake ana tātou kia whakatauhia kia whai atu i a Ihu Karaiti. Ka tere ake tātou rīpenetā me te tahuri atu ki a Ia ina hara tātou. Ka meinga hei mea pai ake ki te kauhau atu i Tana rongopai i runga i Tōna mana. Ka āwhina tātou i te hunga e hapa ana engari kāore i runga i te wairua whakawā. Ka whiwhi i tētahi murunga i ō tātou hara. Ka nui ake te maungārongo, ā, ka koa ake tātou nā te mea e taea ana te whakamoemiti. Ka karapotia tātou e Tōna korōria, ā, ka whaimana Ōna anahera ki runga i a tātou.

E tonoa mai ana tātou, “Haere mai ki te Matua i runga i tōku ingoa, ā, hei tōna wā ka whiwhi i tana raneatanga.” E akiaki ana au i a koutou kia pēnei. Haere mai ki tō tātou Matua i te Rangi. Kia tangohia ake ki runga ki ahau te ingoa o Ihu Karaiti. Whakahonoa atu ki a Ia. Maharatia Ia i ngā wā katoa. Kia ngana kia rite ki a Ia. Ka hono atu ki a Ia i Tana mahi. Whakawhiwhia Tōna mana me ngā manaakitanga i tō oranga. Whaoa Tōna ingoa ki runga i tō ngākau, me pērā i runga i tō ake hiahia. Mā konā “whai tūranga” ki te aroaro o te Atua ā, ka rite koe mō tā te Kaiwhakaora wawao mōu. Ka meinga koe hei kaiwhiwhi teitei i roto i te kīngitanga o tō tātou Matua i te Rangi, ā, he kaiwhiwhi tahi kōrua ko Tana Mātāmua, arā, tō tātou Kaiwhakaora, tō tātou Kaihoko.

E ora ana Ia. E mōhio mārika ana au. E aroha ana Ia ki a koe. I tāpaea e Ia Tōna oranga mōu. E inoi ana Ia kia haere mai ai ki te Matua mā roto i a Ia. I runga i te ingoa o Ihu Karaiti, āmine.