Mahia Tāu Mahi i runga i Tō Ngākau Katoa
Whakapono ki te Kaiwhakaora, ā, kia uru atu kia manawanui, kia ū tonu, i runga i tō ngākau katoa.
I tērā tau, i taku haerenga ki Ūropi, i toro atu au ki taku wāhi mahi o mua, arā, Lufthansa German Airlines i te Taunga Rererangi o Frankfurt.
Hei whakangungu i ā rātou kaihautū wakarererangi, ka whakahaerehia e rātou ētahi waka whakaharatau (simulators) e taea ai te whakaharatau i ngā tūmomo āhuatanga katoa e heipū ai i a rātou e rere ana. I roto i ngā tau maha hei kaihautū wakarererangi, i tika kia tutuki i ahau tētahi o ēnei momo whakaharatau ia ono marama e mana tonu ai taku raihana kaihautū. E maumahara pai ana au ki aua wā i ngau kino nei te āmaimai me te mānukanuka, engari e mahara tonu ana ki te wairua nō muri iho i taku tutuki i taua aromatawai. He rangatahi tonu au i tērā wā, ā, i pai rawa aua wero ki ahau.
I taku toronga ki reira, ka ui mai tētahi o ngā tumu whakarae o Lufthansa mehemea i te hiahia au kia karawhiua anō taua waka whakaharatau 747 mō te wā whakamutunga.
Kāore anō kia āta whakaarohia taua pātai, kātahi ka rangona tētahi reo—e rite rawa ki tōku ake reo—e mea ana, “Āe, ka pai rawa atu tērā.”
I taua wā tonu ka paripari mai ngā whakaaro ki tōku hinengaro. Kua roa te wā kāore au i hautū i tētahi wakarererangi 747. He rangatahi au i tērā wā, ā, he kāpene māia. Ināianei, me eke ki ngā taumata o tētahi kaihautū wakarererangi o mua. Ka whakamā i a au anō i mua i ēnei tāngata whai pūkenga?
Engari kua tūreiti rawa ki te karo, nō reira ka noho iho ki te tūru kaihautū, ka pā ōku ringaringa ki runga i ngā mea urungi, ka rongo anō ahau i te hīkaka o te rerenga i te harurutanga mai o te waka rererangi i te huanui me tana rewanga ake ki runga ki te kahurangi.
E koa ana te ngākau te kī atu i pai taua rerenga, kāore i pakaru iho te waka rererangi, ā, i pērā hoki tōku mana.
Heoi anō ahakoa tērā, i rongo au i te nui o taku iti. I ahau e kaha pērā ana, kua ngāwari rawa te rere. Ināianei kua uaua rawa kia meatia ngā mahi māmā.
Me Kaha Ū hei Apataki Kaha
He whakamaharatanga pai rawa te waka whakaharatau, mehemea kei te hia kia pakari rawa ki tētahi mahi—ahakoa ko te rere, te hoe, te tuitui, te mōhio rānei—me kaha rawa te whakaharatau i ngā wā katoa.
Tērā pea ka pau ngā tau maha e whakangungua ana tētahi pūkenga. Tērā pea ka kaha rawa atu tō mahi nā konā ka māmā noa. Engari mehemea kei te whakaaro ake koe he pai kia mutu tō whakaharatau me tō rangahau, ka āta memeha haere taua mātauranga me aua pūkenga i whakapau kaha ai i mua ki te rapu.
E hāngai ana tēnei ki ngā pūkenga ako reo kē, te whakatangi i ngā taonga pūoro, me te hautū waka rererangi. E hāngai ana anō hoki ki te mahi hei apataki nō te Karaiti.
Kia ngāwari te kōrero, me kaha ū hei apataki kaha.
Ehara i te mea he mahi ngahau noa, ā, ehara hoki i te mea poka noa iho.
He takoha te whakapono i a Ihu Karaiti, engari he kōwhiringa te whiwhi i taua takoha, nā, he kōwhiringa me whakapau i tō “kaha, whakaaro, mārohirohi hoki.” He meatanga tēnei ia rā, ia rā. Ia hāora. Me ū tonu ki te ako. Ka kaha haere tō tātou whakapono me tā tātou ū ki te Kaiwhakaora i a ia e whakamātauria ana e ngā uauatanga e taipū mai ai i tēnei ao. Ka toitū nā tā tātou kaha whāngai iho, e kaha tonu ana tātou ki te whakatinana, ā, ka kore e tuohu.
Heoi anō, mehemea ka hē tātou whakapono me tōna mana kukume i runga i te mahi, ka iti haere tā tātou mōhio ki ngā mea i tapu ai ki a tātou i mua—ka iti haere tō tātou whakapono ki ngā mea i mōhio ai he pono i mua.
Ka pai haere te āhua o ngā whakawainga ahakoa he mea kino rawa atu tōna āhua i mua.
Ka mahana tātou i te ahi o tō inānahi whakaaturanga mō te wā poto. Me kaha whāngai e pūkauri tonu ai.
I te Kawenata Hou, i whakaako te Kaiwhakaora i tētahi pakitairite e pā ana ki te māhita e hoatu ai ētahi mea tapu ki ana pononga katoa—arā, ētahi moni e kīa ana ko ngā tārena. Ka tipu haere ngā tārena o te hunga i whakamahia ai. Ka ngaro te tārena o te hunga i tanumia ai.
Ko te akoranga? E homai ana e te Atua he takoha ki a tātou—he takoha mātauranga, āheinga, kōwhiringa—ā, kei te hiahia Ia ki te whakamahi kia whakatipuria aua takoha kia manaakitia tātou me ērā atu o Ana tamariki. E kore rawa e pērāhia mehemea ka utaina aua takoha ki runga i tētahi paenga anō nei he wāhi mō ngā taonga e tirohia ai i ētahi wā. Ka whakanuia, ka whakatipuria ā tātou pūmanawa anake ina whakamahia e tātou.
He Tangata Waingōhia Koe
“Engari e Erata Uchtdorf,” tērā pea ka mea mai koe, “kāore aku pūmanawa, aku pukenga rānei — kāore rānei he mea tino pai rawa.” Tērā pea ka titiro koe ki ētahi atu e kitea whānuitia ana, e mīharo ana ā rātou iho pūmanawa, ā, ka whakaaro ake koe kāore e pērā rawa ana te pai o ō pūmanawa. Tērā pea e whakaaro ana koe, nā, i te ao i mua, i te rā i tohaina iho mai ngā takoha nui i te hākari nui o ngā iho pūmanawa, kāore he aha i runga i tō pereti—engari i kī rawa ngā pereti o ētahi atu.
Auē, e manako ana ahau kua taea te awhi i a koutou me te whakamārama atu e pā ana ki tēnei mea pono nui: He māramatanga koe, te tamaiti wairua o tētahi Atua mutunga kore! Ā, kei roto i a koe te pitomata nui tē taea tōna nui te mārama.
Pērā i tā ngā ringa toikupu, ka haere mai koe ki te whenua “e whai ana i ngā kapua whai korōria”!
He mea tapu tō takenga mai, ā, he pērā hoki tō ahunga. I wehe mai koe i te rangi kia tae mai ki konei, engari, kīhai rawa te rangi i wehe i a koe!
Ehara rawa koe i te tangata noa.
He tangata pūkenga rau koe!
I roto i ngā Whakaakoranga me ngā Kawenata, i whakapuakina e te Atua:
“He maha ngā takoha ki reira, ā, kua hoatu ki ia [tangata] tētahi takoha i runga i te Wairua o te Atua.”
“Kua hoatu tētahi ki ētahi, ā, ki tētahi atu ki ētahi atu, [ā] ka whai painga te katoa i reira.”
Kua whakarārangitia ētahi o ā tātou takoha i roto i ngā karaipiture. He maha ngā mea kāore anō.
Pērā i tā te poropiti a Moronai i kī ai, “Kaua e whakahē i ngā takoha a te Atua, nā te mea he maha rawa; ā, e ahu mai ana i taua Atua anō.” Tērā pea ka “rerekē tōna whakatinanatanga … ; engari ko taua Atua tonu e mahi ana.”
Tērā pea he pono ehara ō tātou pūmanawa i te mea wana rawa, engari ehara i te mea kāore e nui ana tōna whakahirahira. Māku e kōrero atu ētahi takoha ā-wairua kua kitea e au i roto i ngā mema tokomaha puta noa i te ao? Kia whakaarohia mehemea kua manaakitia koe ki tētahi, ki ētahi pūmanawa pēnei i:
-
Te whakaatu i te atawhai.
-
Te kite i te hunga e noho huna ana, e warewaretia ana rānei.
-
Te kimi take kia koa ai te ngākau.
-
Kia tū hei kaihohou i te rongo.
-
Te kite i ngā merekara iti.
-
Te tuku kōrero whakamānawa i runga i te ngākau pono.
-
Muru hara.
-
Rīpenetātanga.
-
Tārake.
-
Kia māmā te tuku i ngā whakamārama.
-
Te hono atu ki ngā tamariki.
-
Te tautoko i ngā kaiārahi o te Hāhi.
Tērā pea kāore i kitea ēnei takoha e whakaaturia ana i tētahi whakataetae pūmanawa. Engari e manako ana ahau kei te kitea tōna tongarerewa i roto i ngā mahi a te Ariki me tāu hei manaaki, hei āwhina rānei i tētahi o ngā tamariki a te Atua nā runga i ō takoha. Kia mahara: “Mā ngā mea iti, ā, ngā mea ngāwari e pahawa ake ngā mea nui.”
Me Mahi Tō Ake Mahi Iti
E aku teina me ōku tuāhine, e ōku hoa aroha, e inoi ana ahau mā te Wairua koutou e āwhina kia kitea ō pūmanawa me ō pūkenga, otirā ō tārena kua homai nei e te Atua ki a koutou. Tēnā, tukua tātou, pērā i ngā pononga ū pono i te pakitairite a te Ariki, whakatipuria, ā, whakanuia ērā mea.
Ka tae mai te rā ina tū tātou i mua i tō tātou Matua i te Rangi e atawhai nei kia tuku pūrongo e pā ana ki ā tātou mahi. Ka hiahia Ia kia whakamōhiotia i ahatia aua takoha i homai ai e Ia—arā, he aha tā tātou hei manaaki i Ana tamariki. E mōhio ana te Atua ko wai tātou, ko wai tātou hei te anamata, ā, e tiketike ana te pae e manakohia ana e Ia.
Engari ehara i te mea kei te hiahia Ia kia rūpeke mangamangaia atu tātou ki taua taumata. I tēnei ao Nāna nei i hanga, ka āta tipu ngā mea—engari ahakoa tōna pōturi ka tipu tonu i ngā wā katoa.
Kia mahara, nā Ihu Karaiti te wāhanga mangamangaia i mahi i Tana wikitōria i runga i te mate me te hara.
Ko tā tātou he whai i te Karaiti. Ko tā tātou he tahuri atu i te hara, kia tahuri whaka-te-Kaiwhakaora, ā, kia hīkoi i Tōna huarahi, kotahi te hōkai noa. I a tātou e pēnei ana, i runga i te ū pono, ka makaia iho ngā mekameka o te hē me te ninipa kātahi ka āta whakapakaritia, tae noa ki taua rā tika rawa ina whakatikaina rawatia tātou i roto i te Karaiti.
Kei te paetata noa ngā manaakitanga. Kua takoto kē ngā oati. Kua puare whānui te tatau. Mā tātou te kōwhiringa kia tomo, kia tīmata.
He iti pea te tīmatanga. Engari, he PAI tērā.
Ko ngā wāhi e ngoikore te whakapono, me tīmata ki tētahi manako i te Karaiti a Ihu me Tana mana ki te whakatapu.
E tono ana tō tātou Matua kia whakatata atu tātou ki tēnei wero o te whakapono me te apatakitanga, kaua i runga i te wairua whakangahau noa engari i runga i te ngākau whakapono e rite ana ki te whakarere i a Papurona kia whakaū ai i ō rātou ngākau, hinengaro me te hīkoi atu ki a Hīona.
E mōhio ana tātou ehara mā ā tātou mahinga noa e eke ai ki Tikitiki o Rangi. Engari mā konā tātou e ū pono ai ki a Ihu te Karaiti, ā, Māna tātou hei mea Tikitiki o Rangi.
Nā tō tātou Kaiwhakaora aroha, karekau he āhuatanga tē taea e tātou. Mehemea whakatō i tō tātou manako me tō tātou whakapono i a Ia, kua mana tō tātou wikitōria. E whakaari ana Ia ki a tātou ka whai wāhi atu tātou ki Tōna kaha, ki Tōna mana, ki Tōna atawhai nui. Mā te hōkai a te waewae, iti nei, iti nei, ka whakatata atu tātou ki taua rā nui o te tika ina noho tahi me Ia me ō tātou whānau i te korōria mau tonu.
Kia tae atu ki reira, me mahi tātou i tā tātou mahi i tēnei rā, ā, i ngā rā katoa. E whakawhetai ana mō ngā hōkai o inānahi noa nei, engari kaua e tū ki reira. E mōhio ana e roa tonu te huarahi, engari kua kore e raru i a tātou.
Koinā te matū o tō tātou tuakiri—hei kaiaru o te Karaiti.
E akiaki ana, ā, e manaaki ana ahau i ngā mema katoa o te Hāhi, ā, ko te hunga katoa e hiahia ana kia whaiwāhi atu ki reira, ki te whakawhirinaki ki te Kaiwhakaora me te mahi, e mahi ana i tā tātou mahi i runga i te manawanui i runga i tō ngākau katoa—e ranea ai tō koa, ā, hei tōna rā, ka whiwhi ki ngā mea katoa kei te Matua. Koia tāku e whakaatu atu nei, i runga i te ingoa o Ihu Karaiti, āmine.