Ā, Kua Kite Au Ināianei

E tautoko ana tātou i ngā kupu whakamānawa a Tumuaki Oaks i utaina mai nei ki runga i a Tumuaki Russell M. Nelson kua riro nei, he mea tautoko i runga i te aroha mutunga kore. Ā, he pērā hoki te nui o te aroha me te pōuri e kōtuia mai nei ki ngā kupu e whakawhārikihia iho ki runga i ngā aituā i Michigan, otirā, huri noa i te ao. E maumahara ana tātou ki ēnei mea i runga i te aroha me te whakawhirinaki ki te Ariki a Ihu Karaiti.

Kei roto i te upoko tuaiwa o Hoani ngā kōrero e pā ana ki tā Ihu rātou ko Ana apataki whātaretare atu ki tētahi tangata tuakoka, i whānau kāpō mai ai ki te ao nei. Nā konei uia mai a Ihu e ngā apataki ngā pātai whakapono uaua e hāngai ana ki te taketakenga mai me te pānga iho o tēnei mate ki runga i te tangata nei. He mea māmā, ā, he mea ohorere te whakautu a te Māhita. Ka tuha Ia ki roto i te puehu, ā, ka hanumitia ki te uku. Kātahi ka pania ki ngā karu o taua tangata, ā, ka tohua ia kia haere ki te horoi i ana karu i te puna o Siloam. Ka pēneitia katoatia ēnei e te tangata kāpō, ā, mea rawa ake ka “puta [mai] e kite ana,” e ai ki te karaipiture. Anō te hirahira o te taunakitanga, he tauaro ki te manako noa, ki te tohetohe noa rānei, ki te riri rānei e pakanga ana ki te pono.

Nā, nā te mataku kei hau te rongo o tēnei merekara, ā, nā runga hoki i te mataku ka turakina iho e Ihu tō rātou mana, ka haere atu ngā hoariri o te Kaiwhakaora ki te tangata kātahi anō ka mahu tana kāpōtanga, ā, ka kī atu rātou ki a ia, “E mōhio ana mātou he tangata hara a [Ihu].” Ka āta whakarongo atu te tangata rā mō te wā poto, kātahi ka kī ake, “kāore au i te mōhio: mehemea he tangata hara ia … , [engari] e mōhio ana au ki tētahi mea, … i kāpō au i mua, engari kua kite au ināianei.”

Nā Ihu ngā whakamāramatanga tuatahi ki tēnei whakawhitinga kōrero, e mea atu ana ki Ana apataki, nā, kua meatia katoatia ēnei mea “kia whakakitea mai nei ngā mahinga a te Atua.” Kia mahara tātou ki ngā taima e rua i whakahāngaitia ngā mahi a te Kaiwhakaora anō nei he “whakawahinga” i ngā karu o te tangata kāpō, he mahi hei whakakōpanitia ki te horoinga. Mā tēnei whakamāramatanga pea mō “ngā mahinga a te Atua [e] whakakitea mai nei” e tīwhiri mai ki a tātou tētahi takenga mai o tētahi tikanga tapu.

Kei te kitea ake anō hoki i konei ngā taputapu e meatia ai e te Kaihanga o te rangi me te whenua me ērā mea katoa kei roto rā hei whakatutuki ake i tēnei merekara: he tuha me tētahi paoro puehu! Mā konei mōhio ai tātou e taea ana e te Atua te manaaki i a tātou ki ngā rautaki e pai ai ki a Ia. Pērā i tā Naaman whakarongo kore atu i te Awa o Hōrana i tā ngā tamariki a Iharaira rānei kīhai i hiahia ki te titiro ki te nākahi i runga i te tokotoko, anō tā tātou wawe ki te whakakore atu i te puna o tō tātou hokonga nā te māmā noa o ngā kīnaki me ngā taputapu.

Engari kei te mahara tātou ki tā te Pukapuka a Moromona, nā, he māmā, ā, he taonga hoki ētahi mea, ā, i mua i te whānautanga mai a Ihu, i poropititia ai, nā, “[kāore] ia e whai āhua, kāore ōna ātaahua; ā, [ina] kite atu tātou i a ia, kāore he ātaahua ki reira e hiahia ai tātou ki te kite atu i a ia.” I hia ngā wā kua tukuna mai e te Atua Tana karere whai korōria mā roto i tētahi tumuaki Huinga Wahine hou e mānukanuka ana, i tētahi tamaiti ihu hūpē noa iho i runga i tētahi pāmu i Niu Ioka, i tētahi mihingare hou rānei, i tētahi pēpi rānei e takoto iho ana i tētahi kumete kararehe.

Nō reira hei aha mehemea ka tau mai ngā whakautu ki ō tātou inoi i ngā āhuatanga māmā, i ngā āhuatanga rerekē rānei? E hiahia tonu ana tātou ki te tārake tonu, kia ū tonu atu ki te whakatinana i te rongopai a te Karaiti ahakoa pēhea te nui o te tuha me te uku e tika ana? Tērā pea kāore e mārama atu te titiro i ngā wā katoa ki ngā mea e mahia ana, he aha rānei e mahia ai, ā, i ētahi wā, ka pērā i te tuahine kaumātua nāna nei te kī, “E te Ariki, homai koa tētahi manaakitanga kāore e huna ana?”

Kia aro ki ngā taunaki o tētahi atu mea pono, e hāngai ana tēnei ki te tohungatanga tapu. I te whakapukapukatanga i te whakapūmautanga mai o te Hāhi meritiana, e pēnei ana te rerenga tuatahi a Ruka, “Kātahi ka karanga ia i ana tekau mā rua kia hui tahi, ā, ka hoatu ki a rātou te kaha me te mana,” ngā taonga kāore i hoatu i runga i te nui o ngā tohu mātauranga whakamīharo, kīhai rānei i hoatu nā runga i te whakapapa. Kāore e hoatu ana e tētahi kura tapu, e tētahi hemenari whakapono rānei. Kua whakataungia anake mā runga i te whakapākanga o ngā ringaringa e tētahi kua whakamanaia ki te whakapākanga o ngā ringaringa ki runga ki a ia anō, he mea tuku iho mai anō kīhai i whati tae noa atu ki te puna o ngā mana tapu katoa, te Ariki a Ihu Karaiti.

Ā, i roto i tētahi hāhi e mārama nei ki te takoha o te aroha, he taunaki mīharo anō tēnei ki te pono o taua hāhi kia kitea ēnei manaakitanga me ēnei kawenata e tukuna iho ana ki ō tātou tini mate, otirā, ki ō tātou tūpuna kua riro atu ki te pō? Me hāmene rātou nā te mea kīhai i whai wāhi atu ki te rongopai, i te mea rānei i whānau mai ai i tētahi wā, ki tētahi wāhi rānei kāore i reira ngā tikanga tapu me nga kawenata? Kei te Hāhi o Ihu Karaiti o te Hunga Tapu i ngā Rā o Muri Nei ngā whare tapu, arā, ko ngā whare o te Ariki kua whakatapua iho, e meatia ana ngā mahi whakaora ia rā, ia rā, ao mai, pō mai mō ēnei hunga mate, i reira hoki ngā mahi koropiko hoki mō te hunga ora. Ki taku mōhio, kāore e kitea ana tēnei momo taunaki o te pono o te Atua, Tana aroha nunui mō te hunga ora me te hunga mate, i tētahi atu wāhi huri noa i te ao—hāunga te hāhi kotahi e whakatinana ana i tēnei tūāhuatanga: Ko te Hāhi o Ihu Karaiti o te Hunga Tapu i ngā Rā o Muri Nei.

Kīhai taku taunaki tuku-kitenga, tuku-oranga mō te pono i pā mai nei i runga i te whakawahinga o te uku, i roto rānei i te puna o Siloam. E kāo, ko te taputapu pono nāna nei te rongoā mahu e kawe mai i te Ariki ki ahau, he mea kawe mai i ngā whārangi i tētahi pukapuka, āe rā, te Pukapuka a Moromona: He Whakaaturanga Mai Anō mō Ihu Karaiti! Kua werohia, ā, kua whakakorea ngā kōrero whakaatu mō tēnei pukapuka e ētahi o te hunga whakapono kore, i te nuinga o te wā e rite ana te riri me te hikareia o taua hunga i haere atu ai ki te tangata kāpō rā e mea ana kīhai rawa ia i kite i ngā mea i mōhio ai ia i kitea.

Kua karawhiua ki ahau ngā kōrero e mea ana i ahu mai ai tēnei pukapuka i tētahi āhuatanga tito noa, teka noa, whakamā, ā, tapu kore. Ināianei, he kupu taunu katoa ēnei kupu mai i tētahi tangata e kīa ana kei te mōhio ki ngā āhuatanga i takea mai ai tēnei pukapuka, ki te mea ko te whakamāramatanga anake kua homai, arā, he mea whakapākehātia “e te takoha me te mana o te Atua.” Koinā noa iho. Koinā katoa. Heoi anō ahakoa tērā, he mea mīharo nui te kaha o te Pukapuka a Moromona i tōku oranga, he rite anō ki te mīharo o te pani i te tuha me te uku ki ngā karu o te tangata kāpō. Kua meinga mōku, he tokotoko haumaru mō tōku wairua, he māramatanga whakakitenga, he tīramatanga ara e kite ai i te ara me whai e au ina tau mai ngā kohu pōuriuri. Ā, kāore e kore kua pērāhia, ā, kāore e kore ka pērāhia.

Ā, nā taua tīramatanga iho kua kite au i te aroha nui o te Kaiwhakaora me Tana atawhai Nāna nei au i hoko, e tukuna atu e au taku whakaaturanga, e whakamanaia ana i konei pērā i te kī o ngā mātua o te tangata kātahi anō ka manaakitia, me whakarongo ki tā rāua tama nā te mea “kua pakeke” ia. Nā, kei te pērā hoki ahau. Kua pakeke ia nā konā me whakarongo atu, tā rātou kī. Nā, kei te pērā hoki ahau. Ka rua marama noa ka 85 ahau. Kua tae atu au ki te taparere o te mate, ā, kua hoki mai. Kua hīkoi tahi au i te taha o ngā kīngi me ngā poropiti, ngā tumuaki me ngā āpotoro. Te mea pai ake, i ētahi wā kua warea au e te Wairua Tapu o te Atua. E whakawhirinaki ana ahau e tika ana kia whakaarohia noatia tāku i konei.

Ināianei, e ngā teina me ngā tuāhine, kua tau ki taku whakapono koia Ko te Hāhi o Ihu Karaiti o te Hunga Tapu i ngā Rā o Muri Nei te whakahokinga tūturutanga mai o te Hāhi Kawenata Hou—hei āpiti—nā te mea tē taea e ahau aua taunaki o te whakahokinga te whakakore. Mai i aua āhuatanga i mua, taku mōhio kua neke atu i te kotahi mano—tekau mano?—neke atu ngā taunaki e mea ana kei te pono tāku i tēnei rā. Nō reira e koa ana ahau ki te piri ki taku hoa e noho piri ana i ngā tiriti o Hiruharama, i reira waiata ai au i runga i taku reo ngoikore:

I runga i te ingoa o Ihu Karaiti, āmine.