Kua Whakamātauria, ā, Kua Whakakahangia i roto i te Karaiti

E ōku teina me ōku tuāhine, e rongo ana ahau i te aroha o te Ariki i a tātou e hui tahi ana. Nōku te maringa kia kōrero atu ki a koutou i te rā nei. E inoi ana ahau mā te Wairua e kawe ngā mea e pai ana ki te Ariki ki roto i ō koutou ngākau, arā, ko ngā mea i tua atu i ngā kupu e kōrerohia ai e ahau.

I ngā tau ki mua, i ngana ahau ki te ako i ngā akoranga mātai ahupūngao(physics) me te pāngarau(mathematics) i ngā tau nōku i te whare wānanga. I rongo au i te taumaha. Ko te āhua nei i te ako au i tētahi mea kāore e taea ana. Ka nui haere te taumaha, ka iti haere taku whakapono ki ahau anō. Nā taua āhuatanga ka whakapono ahau kāore he take ō aku mahi. Ka tīmata taku hiahia kia whakarērea, ā, kia mahia tētahi mea māmā ake.

I ngoikore ahau. I ahau e inoi ana, ka rongo au i te tautoko mārie o te Ariki. Ka rongo au i Tana kī mai ki tōku hinengaro, “Kei te whakamātau au i a koe, engari kei konei anō Au.”

Kāore au i mārama i taua wā ki te hōhonutanga o aua kupu. Engari i mōhio au me aha—ka haere au ki te mahi.

Mā te whakaaroaro me te mahi i ngā tau whai muri iho, ka mārama au ki tēnei karere whakapiki wairua i roto i ngā karaipiture: “Ka taea e au ngā mea katoa mā roto i te Karaiti e whakakaha mai nei i ahau.”

Nāwai ka ako au he takoha nā te Ariki taku nonoke ki te kaupapa o te ahupūngao. I te whakaako mai Ia mā Tana āwhina ka taea ngā mea uaua katoa te whakatutuki mehemea ka whakapono ahau ka piri mai Ia ki te āwhina i ahau. Mā roto i tana takoha, i te mahi te Ariki ki te whakamātau me te whakakaha i ahau.

He maha ngā whakamārama ō te kupu whakamātau . Ehara i te mea e rite ana te whakamātau ki te aromatawai. Ko tāna he whakapiki i tōna kaha. Ki te whakamātauria tētahi maitai, ka utaina tētahi taumaha ki runga rā. Ka karawhiua ki te wera me te taumaha tae noa ki te wā ka kitea kua whakakahangia ake tōna āhua tūturu. Kāore e ngoikore te maitai i tēnei whakamātauranga. Engari kē, ka meinga hei mea e taea te whakawhirinaki, tētahi mea e taea ngā taumahatanga nui rawa te pīkau.

Ka whakamātauria tātou e te Ariki i runga i tēnei tūāhuatanga kia whakakaha i a tātou. Kāore e whakamātauria i ngā wā ngāwari, i ngā wā hāneanea. Ka whakamātauria i ngā wā e rangona ana te taumaha nui e whakaarohia ana tē taea te pīkau. E whakaakona mai ana e te Ariki kia whanake tonu tātou, ā, kia kore rawa e ngoikore i ā tātou mahi, kia kaua e tuohu, engari kia whawhai tonu.

Ina ū tonu tā tātou whakapono i a Ihu Karaiti—hei roto pū anō i ngā wā e whakaarohia ana tē taea—ka kaha ake te taha wairua. Ka tautokona tēnei mea pono e ngā tuhinga karaipiture.

Hei tauira, i whakakahangia pērātia te poropiti a Moronai. I noho takakau noa ia i ngā tau whakamutunga o tōna oranga. Nāna nei i tuhi kāore ōna hoa, kua whakamatea tōna matua, ā, kua whakangaromia tōna iwi. I arumia ia e te hunga i hiahia ai ki te whakamate i a ia.

Heoi, kīhai a Moronai i ngaro noa. Ko tāna kē, he whao i tana whakaaturanga mō Ihu Karaiti ki runga i ngā papa mō ngā tāngata kāore e kitea i tōna oranga, tae noa mai ki ngā uri o te hunga i hiahia ai ki te whakamate i a ia. I tuhituhi ia mā tātou. I mōhio ia ka whakatoi ētahi i ana kupu. I mōhio ia ka whakaparahako ētahi i ana kupu. Heoi, ahakoa tērā ka tuhituhi tonu ia.

I tana whakamātauranga, i whakarākeihia, i whakakahangia te whakapono o Moronai. Ka poke kore ake. Kei roto i ana kupu te mana o tētahi i ū pono ai tae noa atu ki te mutunga. Ka rongo tātou i taua mana i a tātou e pānui ana i tana whakaaturanga:

“Ināianei au, a Moronai, e tuhituhi e pā ana ki tāku e pai ai; ā, e tuhituhi ana au ki aku huānga ngā Rāmana; ā, e hiahia ana ahau kia mōhio rātou kua pahemo noa atu i te whā rau rua tekau tau mai i te putanga mai o te tohu e pā ana ki te haerenga mai o te Karaiti.

“Ā, e hīri ake ana ahau i ēnei tuhinga, whai muri iho i taku kōrero i ētahi kupu akiaki ruarua ki a koutou.

“Nana, e akiaki ana ahau i a koutou ina pānui koutou i ēnei mea, mehemea he mātauranga i roto i te Atua kia pānuitia aua kupu e koutou, kia mahara koutou anō te te nui o te aroha o te Ariki ki ngā tamariki a te tangata, mai i te hanganga rā anō o Arama tae noa iho mai ki te wā e whiwhi ai koutou i ēnei mea me te whakaaroarohia i roto i ō koutou ngākau.

“Ā, ina whiwhi koutou i ēnei mea, ka akiaki ahau i a koutou kia inoi ake ki te Atua, te Matua Ora Tonu, i runga i te ingoa o te Karaiti, mehemea kāore e pono ana ēnei mea; ā, mehemea ka inoi ake koe i runga i te ngākau tapatahi, ki te kōingo tūturu, e whakapono ana i te Karaiti, ka whakakitea ngā mea pono ki a koe, mā runga i te mana o te Wairua Tapu.

“Ā, mā te mana o te Wairua Tapu e mōhio koutou ki pono o ngā mea katoa.”

I whakarākeihia te whakaaturanga a Moronai e te whao o te mokemoke, engari e kānapanapa ana tērā hei ārahi i ngā whakatipuranga katoa e rapu ana i tō tātou Matua i te Rangi me te Kaiwhakaora a Ihu Karaiti.

I whakamātauria, ā, i whakakahangia tētahi atu poropiti i te Pukapuka a Moromona, arā, a Hākopa, i ngā whakamamaetanga me ngā pōuritanga maha i a ia e tamariki ana. Engari i whakaakona ia e tana matua, a Rīhai, ka manaakitia ia e te Atua i roto i ana whakamātautauranga.

“Ā, nana, kua rongo koe i ngā whakamamaetanga me ngā pōuritanga maha i tō taitamarikitanga, he mea ngā te kino o ō tuākana.

“Hei ahakoa, e Hākopa, taku mātāmua i te koraha, e mōhio ana koe ki te nui o te Atua; ā, māna e whakatapu ō whakamamaetanga hei painga mōu.

“Nā reira, ka manaakitia tō wairua, ā, ka noho haumaru koe ki te taha o tō tuakana, a Nīwhai; ā, ka pau ō rā i te mahi ki tō Atua. Nā reira, e mōhio ana ahau kua hokona koe, nā te tika o tō Kaihoko; na te mea kua kite koe ka whakaputa mai i a ia te whakaoranga ki ngā tāngata i te raneatanga o ngā wā.”

I kaha whakamātauria, i whakakahangia te Poropiti Hōhepa Mete i te wā i a ia i te Whareherehere o Ripati. I te hōhonutanga o te pōuritanga, ka karanga ake te Poropiti:

“E te Atua, Kei whea rā koe? …

“Ka pēhea te roa i puritia ai tō ringa?”

Ka kite te Ariki i roto i ngā whakamamaetanga o Hōhepa te āhuatanga tapu o tana manawanui i Tana whakautu:

“E taku tama, kia rangimārie tō ngākau; ka poto noa ō taumahatanga me ō whakamamaetanga;

“Kātahi, mehemea ka manawanui koe, ka whakateiteingia koe e te Atua; ka wikitōria koe i runga i ō hoariri katoa.”

I heipū ake te whakamātautau nui ake me te whakakaha nui ake i roto i te Whakamārietanga a te Kaiwhakaora. I pīkauria e Ia ngā hara katoa o te ao. I amohia e Ia ō tātou mamae me ō tātou pōuri. I inumia e Ia te kapu kawa. I whakamātauria hei mea ū pono i te roanga o ngā mea katoa.

Nā Tana Whakamārietanga whai korōria, ka whakakaha a Ihu Karaiti i a tātou i ngā wā e whakamātauria ana tātou. E mōhio ana Ia me pēhea te atawhai i a tātou nā te mea kua waia Ia ki ngā uauatanga katoa e rongo ai tātou i tēnei oranga. “Ka pīkauria e ia ngā mamae me ngā mate o tōna iwi … kia mōhio ai ia e rite ana ki tā te kikokiko me pēhea te atawhai i tana iwi e rite ana ki ā rātou mate.”

E ako ana tātou e pā ana ki te wā kei te Kāri o Erene, i inoi ake te Kaiwhakaora ki te Matua mehemea ka hipa atu tēnei whakamātautau i a Ia—engari i kī ake anō Ia, nā, mehemea ko tā te Matua e pai ai, ka meatia e te Kaiwhakaora. Kia pēnei kē te kupu, i pīkauria anōtia e te Kaiwhakaora te rangirua me te ngākau ruarua, engari whakapono Ia ki Tana Matua i te Rangi.

E ngā teina me ngā tuāhine, tērā pea kāore e rite ana te āhua o tō whakamātautauranga, o tō whakakahatanga ki te āhua o tō Moronai, o tō Hākopa rānei, o tō te Poropiti Hōhepa rānei. Engari ka tau mai. Tērā pea ka haere momoka mai, mā roto i ngā uauatanga o te whānau. Tērā pea ka hau mai mā roto i te māuiuitanga, te pōuri rānei te mokemoke rānei.

E whakaatu ana ahau ehara ēnei wā uaua rawa i te taunakitanga kua whakarērea koe e te Ariki. Engari kē, e taunaki ana ērā, nā, he pērā rawa te nui o Tana aroha nā konā ka whakapakari, ka whakakaha Ia i a koe. E meatia ana koe e Ia hei mea kaha kia pīkauria ai ngā taumahatanga o te oranga tonutanga.

Mehemea ka ū pono tonu i tā tātou mahi, ka whakapakarihia tātou e te Ariki. Māna koutou e whakakaha. Ā, hei tōna wā ka huri whakamuri te titiro me te kite atu he taunaki ērā taumahatanga mō Tōna aroha. Ka kite tātou i te tārei Ia i a tātou kia tāea te tū tahi me Ia i runga i te korōria. Pērā i tā te Āpotoro o te Ariki a Pāora kī i te mutunga o tōna ake oranga, “Kua whawhai au i te whawhai pai, kua mutu taku mahi, kua mau ki te whakapono.”

E whakaatu ana ahau e aroha ana te Atua ki a koe. E mōhio ana Ia ki ngā taumahatanga kei runga i a koe. Kei tō taha Ia. E kore koe e whakarērea iho e Ia. E whakaatu ana ahau, nā, ko Ihu Karaiti te Tama a te Atua. Ko Ia tō tātou mea kaha, tō tātou Kaihoko, tō tātou manako. Mehemea ka whakawhirinaki tātou ki a Ia, ka meatia e Ia kia ōrite tō tātou kaha ā–wairua ki ngā taumahatanga katoa e pīkauria ai e tātou. E pēnei ana taku whakaaturanga i runga i te ingoa o Ihu Karaiti, āmine.