Мөнгөний тухай ярилцацгаая!

Есүс та нарт хэрэгтэй (жишээ нь, хоол хүнс) мөн та нарын хүсдэг (жишээ нь, тоглоом) олон зүйл байдгийг мэддэг. Тэрээр “өөрсдөдөө эд баялгийг тэнгэрт хураа. Учир нь тэнд хивэн хорхой ба зэв идэж сүйтгэдэггүй” (Maтай 6:19–21) хэмээн заасан. Мөнгөөр худалдан авдаг зүйлсийн ихэнх нь зүгээр л алга болдог. Тиймээс худалдан авдаг зүйлдээ анхааралтай ханд.

Та нар хэрэгцээгээ хүслээсээ ялгаж салгаснаар мөнгөтэй болгоомжтой харьцаж болно. “Би үүнийг хэрэгтэй учраас авч байна уу эсвэл хүсэж байгаа болохоор худалдан авч байна уу?” гэж дотроо бод. Хэрэв та нар итгэлтэй биш байгаа бол нэг сар хүлээгээд үзээрэй. Энэ хугацаа өнгөрсний дараа дахин асуугаарай. Ингэснээр та нар ямар нэгэн зүйлийг шууд л худалдан авах юм уу бусдад гайхуулах гэж оролдохоос зайлсхийж чадна. Оронд нь та нар хэзээ мөнгө хуримтлуулах, хэзээ зарцуулах талаар ухаалаг шийдвэр гаргах болно.

Талантын тухай сургаалт зүйрлэл дээр Есүс гурван зарцад өөр өөр хэмжээний зоос (“талант” гэж нэрлэгддэг) өгсөн нэгэн эзнийг дүрсэлдэг. Хоёр зарц мөнгөө хоёр дахин нэмэгдүүлж, нэг зарц нь мөнгөө булдаг. Эзэн нь эргэж ирэхдээ талантаа нэмэгдүүлсэн хоёр зарцдаа баярлаж, харин талантаа нэмэгдүүлээгүй зарцдаа сэтгэл хангалуун бус байдаг (Maтай 25:14–30-ийг үзнэ үү).

Сургаалт зүйрлэлд гардаг эзэн зарц нартаа талант өгсөнтэй адил Бурхан та нарыг мөнгөөр адислахдаа санхүүгээ ашиглан өөрийгөө болон бусдыг адислахыг хүсдэг. Та нар бусдад анхаарал тавьснаар “хөршөө өөрийн адил хайрла” (Марк 12:31) хэмээх Есүсийн зарлигийг биелүүлж байгаа хэрэг юм.

Сайхан зүйлс худалдан авах нь асуудал биш ч худалдан авахаасаа өмнө өөрийнхөө болон бусдын хэрэгцээг бодох нь зүйтэй. Та нар бусдын хэрэгцээний талаар бодох үед Бурхан та нарын амьдралд байгаа хүмүүсийг адислахын тулд мөнгөө хэрхэн ашиглахыг мэдэхэд тань туслах болно.

Хэрэв та нар аравны нэг төлсний дараа та нарт хангалттай мөнгө үлдэхгүй гэж санаа зовж байгаа бол Бурханаас ирсэн эдгээр тайтгарлын үгийг унш: “Миний өргөөнд … бүхий л аравны нэгээ агуулахад авчир. Би та нарын төлөө тэнгэрийн цонхыг нээж, та нарын төлөө ивээлийг хальтал асгах эсэхийн талаар Намайг одоо үүгээр шалга” (Малахи 3:10). Хэрэв та нар аравны нэгээ төлөх юм бол Бурхан та нарыг төсөөлж чадахаас ч илүү ихээр адислах болно!

Та нар материаллаг байдлаар адислагдаагүй байж болно. Та нарт таалагддаг үнэтэй цамцаа авах мөнгө байхгүй байж болно. Тиймээс та агшин зуурын сэтгэл ханамжаа хойшлуулах хэрэгтэй болж мэднэ. Гэвч Их Эзэн та нарыг адислах болно. Цаг хугацаа өнгөрөх тусам аравны нэгээ төлөх нь та нарт илүү хялбар болж, санхүүгийн талаарх санаа зовнилынхоо эсрэг сэтгэлийн хаттай байх болно.

“Та нарт туслах Аврагчийн хүчин чадалд хязгаар гэж үгүй” (2024 оны 10-р сарын Ерөнхий чуулган [Лиахона, 2024 оны 11-р сар, 122]) хэмээх ерөнхийлөгч Рассэлл М.Нэлсоны хэлсэн үгэнд итгэ. Хэрэгцээгээ хангах, бусдыг халамжлах, аравны нэгээ төлөхөд мөнгөө ухаалаг зарцуулснаар та нар Бурханыг болон бусдыг хайрлах гүн гүнзгий хайрыг мэдэрч, өөрт байгаа зүйлсдээ талархаж сурах болно.