Digital Lamang: Dali, Sunod Kanako
Kon Kita Dili Makasabot sa mga Sugo
Ang pipila sa mga sugo nga tingali walay kahulogan nato sa pagkatinuod mao ang mga timaan sa gugma sa Dios alang nato.
Nakadungog na ba kamo nga adunay misulti nga ang mga sugo “usa lang ka pundok sa mga lagda”?
Siyempre, nasobrahan ra usab kana ka yano. Usahay tingali dili nato masabtan kon ngano nga ang Dios naghatag nato og mga sugo, o kon unsa ang katuyoan niini. Apan ang nasabtan gayod nato mao nga ang Dios ang atong mahigugmaong Langitnong Amahan. Ug kon Siya hingpit nga nahigugma nato (nahigugma gyod Siya!), mohatag Siya nato og mga sugo gumikan sa gugma ug pagpakabana alang nato.
Tan-awon nato ang duha ka ehemplo kon giunsa pagpakita sa Dios sa Iyang gugma pinaagi sa Iyang mga sugo.
Ang Pulong sa Kaalam
Ang Pulong sa Kaalam adunay piho nga mga lagda, pananglitan ang instruksiyon nga dili moinom og kape, ilimnon nga makahubog, o tsa. Apan ang pagpadayag wala nagbutang og lista sa matag makadaot nga butang. Gihatag kini isip usa ka “baroganan inubanan og saad” (Doktrina ug mga Pakigsaad 89:3).
Unsay gipakita niiini nga pagpadayag mao nga ang Langitnong Amahan nahigugma nato ug nagpakabana sa matag aspeto sa atong kinabuhi. Naglakip kana sa atong espirituwal ug pisikal nga kaayohan.
Hunahunaa ang mga panalangin nga gisaad sa Dios niadtong kinsa naningkamot sa pagsunod sa Pulong sa Kaalam:
“[Sila] makadawat og kahimsog sa ilang pusod ug uyok sa ilang mga bukog;
“Ug makakaplag og kaalam ug dagkong mga bahandi sa kahibalo, gani tinago nga mga bahandi;
“Ug modagan ug dili kapoyon, ug molakaw ug dili maluya.
“Ug ako, ang Ginoo, mohatag ngadto kanila og saad, nga sila labyan ra sa tiglaglag nga anghel, sama sa nahitabo sa mga anak ni Israel, ug dili mopatay kanila” (Doktrina ug mga Pakigsaad 89:18–21).
Kini nga mga panalangin mas daghan pa kaysa mga sakripisyo nga atong himoon sa pagsunod sa Pulong sa Kaalam. Bisan kon ang pagsunod sa mga sugo dili sayon kanunay, ang Langitnong Amahan mohinumdom kanunay sa atong mga sakripisyo ug, diha sa Iyang kaugalingong panahon, mopakita nato nga kini angay lamang niini.
Ang Balaod sa Ikapulo
“Ngano nga ang Dios magkinahanglan man sa akong kwarta?” ang uban tingali mangutana. Ang tinuod mao nga ang Dios wala magkinahanglan og kwarta—apan gusto Niya nga ang Iyang mga anak mopaduol ngadto Kaniya pinaagi sa pagsunod sa Iyang mga sugo. Ang Simbahan sa Ginoo nanginahanglan usab og mga paagi sa pagtabang sa pagdala sa ebanghelyo ni Jesukristo ngadto sa tibuok kalibotan. Ang ikapulo ug ubang mga halad gamiton alang sa daghang butang sa pagsuporta sa buhat sa Ginoo, lakip sa:
-
Pagtukod og mga bilding ug pagmentinar sa mga templo, mga meetinghouse, ug ubang mga bilding sa Simbahan.
-
Pagsuporta sa mga kalihokan ug mga pagdumala sa Simbahan ug sa lokal nga mga kongregasyon niini.
-
Pagpakigbahin sa ebanghelyo sa tibuok kalibotan.
-
Pagsuporta sa mga programa sa Simbahan, sama sa edukasyon ug family history.
-
Pagsangkap og pagkaon, kapuy-an, ug ubang mga panginahanglanon sa mga tawo nga nanginahanglan.
Ang ikapulo mao ang paagi sa atong pagpakita og pasalamat ngadto sa Langitnong Amahan sa paghatag nato og paagi sa pagsangkap alang sa atong kaugalingon ug sa atong mga pamilya. Sa samang higayon, kon kita mobayad sa ikapulo, nagtabang kita sa Dios nga mapakita ang Iyang gugma alang sa Iyang mga anak sa tibuok kalibotan. Nagtabang kita sa pagpundok sa Israel!
Si Presidente Russell M. Nelson makausa miasoy og usa ka istorya sa dihang misugod siya sa pagbayad sa ikapulo human nga dihay panahon nga wala siya nagbayad niini. Mitudlo siya:
“Ang Simbahan nahimong lahi ba tungod kay among gidugangan ang among ikapulo? Sa tinuod wala. Apan, ang pagkahimong hingpit nga tigbayad sa ikapulo nakapausab nako. Mao kadto nga ako nakakat-on nga ang pagbayad og ikapulo mahitungod ang tanan sa hugot nga pagtuo, dili sa kwarta. Isip usa ka hingpit nga tigbayad sa ikapulo, ang mga tamboanan sa langit nagsugod sa pag-abli ngari kanako. …
“Ang pagbayad sa ikapulo nagkinahanglan og hugot nga pagtuo, ug kini usab naglig-on sa pagtuo diha sa Dios ug sa Iyang Pinalanggang Anak.”
“Tungod kay Gihigugma Ko Nimo!”
Si Sister Carole M. Stevens, kanhi Unang Magtatambag sa Kinatibuk-ang Kapangulohan sa Relief Society, makausa mihinumdom sa usa ka istorya mahitungod sa iyang apo nga babaye nga si Chloe. Samtang nagdrayb si Sister Stevens, si Chloe magsige og tangtang sa iyang seatbelt ug mobarog sa sakyanan.
Human sa pipila ka pagsulay sa pagkombinser ni Chloe nga molingkod nga itaod ang iyang seatbelt, si Sister Stevens nakadawat og inspirasyon nga tudloan si Chloe nga kinahanglan niya ang seatbelt aron luwas ug malikayan nga masakitan. Human sa usa ka gutlo, si Chloe nakaamgo: “Lola, gusto kang magseat belt ko tungod kay gihigugma ko nimo!”
Ang Langitnong Amahan matinguhaon sa pag-atiman nato ug sa pagtabang nato. Gusto Siya nga mohatag nato sa matag oportunidad nga mahimong luwas sa espirituwal ug sa pisikal nga paagi. Ang Iyang mga sugo dili mga lagda nga adunay restriksiyon—mga oportunidad kini sa pagdawat sa gisaad nga mga panalangin ug sa pagpakita sa atong gugma alang Kaniya.