Dawata ang Iyang Gasa

Ako ganahan nga maghisgot kabahin sa usa ka naglangkob sa tanan nga gasa sa mahangtorong kamatuoran nga moabag sa atong abilidad sa pagdawat sa tanang gitinguha sa atong Amahan nga ihatag kanato uban sa—usa ka importante nga gasa sa kahibalo nga, kon hingpit nga angkonon ug dawaton sa kahiladman sa kalag, mopahimutang sa mga kalipay ug mga kalisod sa kinabuhi ug sa atong wala pa matubag nga mga pangutana: Kini mao nga kita mga anak gayod sa Dios. Kulba-hinam kini! Makapahingangha! Ug kini nga kamatuoran dili sambingay.

…Ug ang dalan nga inyong giagian mao ang Iyang plano sa kalipay. … Ug oh, Siya nangandoy gayod nga usa ka adlaw kamo mobalik ngadto Kaniya, nga modawat sa kinatibuk-ang katuyoan sa tanan Niyang matahom nga mga gasa, ang kinabuhing dayon uban Niya. …

… Kamo makaduol ngadto ni Kristo uban sa kamasaligon sa Iyang mahigugmaong kaayo ug modawat sa tanan Niyang mga gasa sa kalipay, kalinaw, paglaom, kahayag, kamatuoran, pagpadayag, kahibalo, ug kaalam—uban sa inyong ulo nga gipataas, inyong mga bukton nga gituyhad, ug inyong mga kamot nga bukas, andam sa pagdawat. Ug madawat ninyo kini nga mga gasa tungod kay kamo luwas ug nakagamot diha sa kahibalo nga kamo mga hinigugmang anak nga babaye sa Dios, kamo gimahal nga anak nga lalaki sa Dios, ug Siya migasa kaninyo sa Iyang hingpit, balaan nga Anak sa pagtubos kaninyo, paghatag og kaangayan kaninyo, ug pagbalaan kaninyo.

… Dawata kini nga gasa pag-usab, o tingali matinud-anong dawaton kini sa labing unang higayon, ug tugoti kini nga mousab sa matag aspeto sa inyong kinabuhi. Kini mao ang mas maayo nga paagi sa Dios nga giandam alang kaninyo pinaagi sa gasa sa Iyang Anak. Kamo mao nga kamo makabaton og kamaya!