Sabado sa Buntag nga Sesyon
Ang Pag-ula ni Jesukristo Naghatag sa Labing Gamhanan nga Pagluwas
Mga Kinutlo
Ang kasinatian sa pioneer naghatag sa mga Santos sa Ulahing mga Adlaw og talagsaong makasaysayanon nga tradisyon ug gamhanang espirituwal nga kabilin para sa tanan. …
Kadaghanan sa nagkariton nga mga Santos nakasinati og kalisod apan nakalikay sa ngil-ad kaayo nga mga hitabo. Apan ang duha ka pundok sa mga nagkariton, ang Pundok ni Willie ug ni Martin, nakasinati og kagutom, pagkabantang sa makapakaging nga kabugnaw, ug daghang kamatayon. …
Si Presidente Brigham Young unang nakahibalo sa makuyaw nga sitwasyon niini nga mga pundok niadtong Oktubre 4, 1856. …
Iyang gihangyo ang mga bishop nga mohatag og 60 ka team sa mga kabayong mula, 12 o mas sobra pa ka karomata, ug 12 ka tonelada (10,886 ka kilo) nga harina ug miproklamar, “Lakaw og dad-a dinhi kanang mga tawo nga anaa karon sa mga kapatagan.”
… Kon wala ang tukma sa panahon nga pagluwas, mas daghan pa ang namatay. …
Kon wala ang Pag-ula, dili kita makaluwas sa atong kaugalingon gikan sa sala ug kamatayon. …
Atol niining panahon sa Pasko sa Pagkabanhaw, atong tutokan ang Manluluwas ug ang Iyang maulaon nga sakripisyo. Ang Pag-ula maghatag og paglaom ug kahayag nga para sa kadaghanan daw mangitngit ug awaaw. …
Mopakigbahin ko og tulo ka sugyot nga sa akong hunahuna haom kaayo sa atong panahon.
Una, ayaw ipakagamay ang importansiya sa pagbuhat sa unsay atong mahimo aron sa pagluwas sa uban gikan sa pisikal ug ilabi na sa espirituwal nga mga hagit.
Ikaduha, mapasalamaton nga dawaton ang Pag-ula sa Manluluwas. …
Ang akong ikatulong tambag mao ang paggahin kanunay og panahon sa matinud-anong pagpamalandong sa Pag-ula sa Manluluwas. Adunay daghang paagi sa paghimo niini sa atong personal nga relihiyosong pagtuman. Hinuon, ang pagtambong sa panagtigom alang sa sakramento ug pag-ambit sa sakramento hilabihan ka mahinungdanon.
Ingon usab niana ka importante ang regular nga pagtambong sa templo kon diin posible. …
… Ang Pag-ula ni Jesukristo naghatag sa labing gamhanan nga pagluwas gikan sa mga pagsulay nga atong giatubang niini nga kinabuhi.