Pagpangga sa Kinabuhi

Usahay, ang lisod kaayo ug makasakit nga mga pagduda mahimong mag-uban sa pagpanalipod sa kinabuhi.

Duha ka pulong ang kanunay nga may kalabotan sa pagkabalaan sa mortal nga pagkahimugso: kinabuhi ug pagpili. Ang kinabuhi usa ka bililhong bahin sa hingpit nga Plano sa atong Amahan, ug pinaagi sa Iyang pahayag atong panggaon ug ipreserbar ang kinabuhi; ug atong pilion ang pagpadayon sa kinabuhi kon kini gipanamkon na. Ato usab nga ibahandi [ang gasa sa pagpili,] ang gasa sa moral nga kabubut-on—motabang sa paglig-on sa matarong nga mga pagpili nga gitugotan sa Dios nga magdala og mahangtorong kalipay. …

Ang pag-alima ug pagprotekta sa kinabuhi nga wala pa matawo dili usa ka politikal nga baroganan. Kini usa ka moral nga balaod nga gipamatud-an sa Ginoo pinaagi sa Iyang mga propeta.

… Atong himoon ang mas makanunayon nga pagpakigsulti inubanan sa pagtuo ug kaluoy sa atong kabatan-onan diha sa atong mga panimalay, ug sa usag usa diha sa mga miting sa atong Relief Society ug sa korum sa mga elder, mahitungod sa balaod sa Ginoo sa kaputli, sa pagkabalaan sa kinabuhi, ug sa pag-atiman sa wala pa matawo ug sa ilang mga inahan. …

Si bisan kinsa nga naminaw nga nakasinati sa lawom nga kasakit ug pagmahay tungod sa paghimo o pag-apil sa usa ka aborsyon, palihog hinumdomi: Bisan tuod dili nato mausab ang nangagi, ang Dios makaayo sa nangagi. Ang kapasayloan mahimong moabot pinaagi sa milagro sa Iyang maulaon nga grasya, samtang moduol kamo Kaniya uban sa mapaubsanon ug mahinulsolon nga kasingkasing.

Minahal ko nga kaigsoonan, ang nagkaminos nga gugma alang sa wala pa matawo nga mga bata sa tibuok kalibotan usa ka grabe nga problema. Gipangga sa Dios ang kinabuhi. Iyang buhat ug Iyang himaya ang pagpahitabo sa imortalidad ug sa kinabuhing dayon sa Iyang mga anak. Isip mga disipulo ni Jesukristo, atong gipangga ang kinabuhi.