“Dili Maayo sa Badminton,” Higala, Abril 2026, 38–39.
Dili Maayo sa Badminton
“Apan gusto kong momaayo karon,” miingon si Shia.
Usa ka tinuod nga istorya gikan sa Pilipinas.
Miginhawa og lawom si Shia ug naningkamot sa pag-focus. Mahimo ra niya kini. Gibuhian niya ang shuttlecock gikan sa iyang kamot, ug gihapos sa iyang racket, ug …
Tonk!
Ang shuttlecock natagak sa salog diha gyod atubang sa mga tudlo sa iyang tiil.
Gisapot si Shia ug nagmug-ot. Wala niya maigo. Balik na sad.
Midagan iyang Papa gikan sa kilid sa korte sa badminton. “Maayo nga pagsulay! Tingali maayong ipiko pa gyod nimo ang imong pulso inig serve nimo sunod.”
“Lisod kaayo ang pag-serve!” Miingon si Shia. Gitan-aw niya ang pikas korte diin ang iyang mga ig-agaw, si Analyn ug Jovan, nanagdula. Ang shuttlecock milupad ibabaw sa net samtang nagbanos-banos sila sa paghapak niini gamit ang ilang mga racket. Sayon ra kaayo silang tan-awon!
Giagbayan siya sa iyang Papa. “Mas momaayo ra unya ka sa badminton. Nagkinahanglan lang kini og pipila ka pagpraktis.”
“Apan gusto kong maayo na karon,” miingon si Shia.
Mipahiyom iyang Papa. “Tingali ang inyong praktis sa team ugma mas momaayo.”
Apan sa pagkasunod adlaw, ang pagpraktis sa team dili kaayo maayo. Nasipyat og kadaghan si Shia sa shuttlecock kay sa iyang pag-igo niini. Dili gyod niya kini ma-serve ibabaw sa net. Ug atol sa pagpahulay, natakilpo siya ug nayab-an og tubig ang tibuok niyang uniporme.
Si Layla, ang captain sa team, mitudlo sa iyang basa nga sinina ug mikatawa. “Yamhangan kaayo ka, Shia!”
Gibati ni Shia nga nanginit ang iyang mga aping. Dayon gitawag sa coach ang tanan ngadto sa korte.
“Sige, tanan, ang tournament magsugod sa pipila na lang ka semana. Tanan magparespares na!”
Gipikpik ni Analyn ang abaga ni Shia. “Pwede rang kita ang magpares. Tabangan teka sa pagpraktis.”
Mikatawa si Layla. “Si Shia ang pinakahinay sa maong team! Dili gayod kamo makadaog kon siya ang imong kapares.”
Miduko si Shia. Eksakto si Layla. Siya ang pinakahuyang sa team, ug dili gani siya segurado kon momaayo pa ba siya.
Pag-abot ni Shia sa balay, ang iyang Mama nagluto og adobong manok sa kalan. Ang manghod niyang lalaki, si Tolome, naghilak ug naggunit sa batiis sa iyang Mama.
Morag nahupay si Mama nga nakakita ni Shia. “Uy maayo, nauli na ka! Pwede ba nimong kuhaon si Tolome ug makigdula niya samtang humanon nako ang panihapon?”
Si Shia wala ganahi nga magdula sa pagkakaron. Apan si Tolome subo kaayong tan-awon! Gikugos siya ni Shia. Si Tolome padayon sa paghilak.
Gipalingkod siya ni Shia sa salog ug mikuha og pipila ka hinimo sa papel nga dulaan gikan sa kabinet. Sa hilom, nagsugod siya sa pagpilo og origami nga iring.
Si Tolome nagtan-aw kaniya, ug sa hinayhinay, mikalma na siya. Nahuman ni Shia ang iring ug gigunitan kini pataas. “Meow!”
Miagik-ik si Tolome. Gihatag ni Shia ang origami nga iring ug nagsugod sa pagpilo og mga papel aron makahimo og mga crane, mga kuneho, ug mga bao-bao nga ilang madulaan.
“Maayo kaayo ka nga tigtabang!”
Milingi si Shia ug nakita ang iyang Mama nga nagpahiyom. “Salamat sa imong pagtabang nako karon. Sama gayod kang Kristo ang imong gibuhat,” miingon iyang Mama.
“Nalipay ko nga nakatabang ko.” Gitan-aw ni Shia kon unsa ka malipayon si Tolome ug mibati og kainit sa sulod. Bisan og dili kaayo siya kamao mo-serve sa shuttlecock sa badminton, tingali pwede siyang maningkamot og maayo aron mahimong labing maayo nga moserbisyo sa iyang pamilya.
Sa miaging pipila ka semana, si Shia naningkamot nga mahimong mas maayo sa pag-serve—sa korte man ug sa panimalay. Nagpraktis siya matag adlaw human sa eskwela didto sa korte sa badminton. Gitabangan niya iyang Mama sa pag-atiman kang Tolome sa balay human magpraktis. Ug nag-ampo siya nga ang Langitnong Amahan motabang niya sa pag-andam alang sa iyang sangka.
Dihang ang adlaw sa sangka miabot na, gikulbaan kaayo si Shia! Siya ug si Analyn nanglakaw padulong sa korte. Ang iyang Mama, Papa, ug si Tolome miwarawara gikan sa ilang mga gilingkoran. Dihang iya nang turno sa pag-serve, miginhawa og lawom si Shia. Mahimo ra niya kini.
Gibuhian ni Shia ang shuttlecock sa badminton gikan sa iyang kamot, ug mihapos sa iyang racket, ug …
Pak!
Nakalabang gayod kini sa net! Nadungog niya iyang Papa nga miabiba. Nahimo niya kini!
Tingali ang pag-serve dili na kaayo lisod human sa tanan.
Mga paghulagway pinaagi ni Beatrice Costamagna. Mahimong kopyahon alang sa Simbahan nga paggamit lamang.