“Managhigala tungod sa mga Gummy Bear,” Higala, Abril 2026, 18–19.

Managhigala tungod sa mga Gummy Bear

Ni Norman Hill

Gusto ni Rowan nga mahimong higala ni Ernest, apan dili siya kabalo unsay isulti.

Usa ka tinuod nga istorya gikan sa USA.

Paghulagway sa masulob-ong batang lalaki nga naghunahuna kon unsaon pagtabang sa usa ka masulob-ong batang lalaki nga naglingkod sa sagbot sa gawas, nga dunay porma sa mga gummy bear nga naglutaw-lutaw diha sa background

Si Rowan nagtan-aw sa dihang gidapit ni Miss Brody ang usa ka bag-ong estudyante nga mobarog diha sa atubangan sa klasrom.

“Kini si Ernest,” miingon si Miss Brody. “Bag-o lang siyang naabot sa Hawaii gikan sa nasod nga gitawag og Ukraine. Dili siya kaistorya og Iningles. Pwede ba kamong tanan mahimong buotan ug makig-amigo niya?”

Si Rowan ug iyang mga klasmeyt mitando.

Midungo si Ernest ug nagmug-ot. Siya ra ang nagsul-ob og pantalon ug long-sleeved nga kamiseta.

Naghunahuna si Rowan unsa kaha ang bation kon mobalhin sa usa ka bag-o nga nasod ug dili kaistorya sa pinulongan. Murag hadlok paminawon!

Sa recess, nakita ni Rowan si Ernest nga naglakaw padulong sa usa ka dapit nga nag-inusara samtang ang ubang mga bata magkauban nga nagdagan-dagan. Nagmug-ot gihapon siya.

Gusto ni Rowan nga makig-amigo niya, apan dili siya kabalo unsaon pag-istorya. Unsaon nila pagkahimong managhigala kon dili sila mag-istorya sa sama nga pinulongan?

Human sa klase, mipauli si Rowan ug nangayo og tabang sa iyang Papa. “Pwede ba ko nimong tabangan nga makapangita kon unsaon pag-istorya sa mga butang gamit ang Ukrainian?” Nangutana si Rowan. “Dunay bag-ong estudyante sa among klase nga dili makaistorya og Iningles.”

Mitando iyang Papa. “Siyempre.”

Una, nangita sila kon unsaon pagsulti ang, “Ting-paniudto na.” Naminaw si Rowan sa tubag. “Nastav obidniy chas.” Gisulayan kini ni Rowan pagsulti sa makadaghang higayon. Lisod gyod! Busa nangita siya kon unsaon pagsulti og “hello.”

“Pryvit,” ang tingog gikan sa computer misulti kaniya. Mas sayon na. Gibalik-balik og play ni Rowan ang pulong ug gibansay ang pagsulti niini.

Pagkasunod adlaw panahon sa recess, nakita na usab ni Rowan si Ernest nga nag-inusarang naglingkod sa sagbot. Nagbarog si Rowan tupad niya ug mipahiyom. “Pryvit!” miingon siya nga kusog ang tingog. Unta nasulti niya kini nga sakto.

Mipahiyom si Ernest ug mitunol ni Rowan og gummy bear.

Milingkod si Rowan tupad ni Ernest ug miingon pag-usab og pryvit. Dayon misulti siya og, “Hello.”

“Hello,” hinay nga misulti si Ernest. Gihatagan niya si Rowan og laing gummy bear. Morag pareha og baho sa orange, ug lami kini ug humok.

Paghulagway sa batang lalaki nga naghatag og gum bear ngadto sa batang lalaki nga miagbay kaniya

Nagdrowing og upat ka linya si Rowan diha sa yuta tupad nila aron makahimo og tic-tac-toe nga kwadro. Iyang gitudloan si Ernest kon unsaon pagdula. Lisod ang pagpasabot tungod kay dili pareha ang ilang pinulongan. Usahay mobutang si Ernest og mga X bisan dili niya turno. Apan wala kini panumbalinga ni Rowan. Gusto lang niya nga dunay bag-ong higala.

Kada adlaw niana nga semana, nakigdula si Rowan kang Ernest panahon sa recess. Nangaon sila og mga gummy bear ug magkauban nga nagdula.

Usa ka adlaw sa balay, nangutana iyang Papa, “Kumusta ang bag-ong estudyante sa inyong klase? Imo bang gipraktisan ang mga pulong nga imong nakat-onan?”

“Oo! Ang iyang ngalan si Ernest,” si Rowan miingon. “Nagdula mi pag-recess, ug gihatagan ko niya og mga gummy bear.”

Mipahiyom iyang Papa. “Nindot kana.” Milingkod siya tupad ni Rowan diha sa sopa. “Si Ernest ug iyang pamilya mga bakwit. Gikan sila sa layo nga nasod. Si Elder Kearon miingon nga si Jesukristo usa ka bakwit samtang bata pa ug mihangyo kanato nga makighigala kon makatagbo kita og mga tawo gikan sa laing mga nasod. Unsa sa imong tan-aw ang gikinahanglan aron mahimong maayo nga higala?”

Naghunahuna si Rowan sa makadiyot. “Nagkinahanglan kini og gugma ug mangita og dula nga dulaon nga magkauban,” miingon siya. “Dayon, ang uban pwede ra moapil ug modula usab ug mag-ila-ila sa usag usa.”

Gibira si Rowan sa iyang Papa aron gakson. “Nagsunod ka ni Jesus ug mihimo sa unsay gihangyo sa mga propeta nga atong buhaton,” miingon siya. “Ug karon duna na kay bag-ong higala.”