Ang Gubat-gubat sa Jelly

“Aksiyon!”

Ang manghod nga lalaki ni Evan nga si Ethan mitulpok sa record diha sa tablet, ug si Evan nagsugod sa pagpamulong. “Hi, ang akong ngalan si Evan. Nangita ko og daghang mga oportunidad nga makaserbisyo ug akong nakita ang food pantry sa among lungsod.”

Si Evan ug Ethan ganahan nga maghimo og mga salida, apan kini nga bidyo espesyal.

Ang pantry manghatag og pagkaon ngadto sa mga pamilya nga nagkulang ang kwarta nga ipalit og mga grocery sa tindahan. Karon, ang pantry nahutdan na sa jelly. Nanghangyo sila og mga tawo nga modonar pa og dugang.

Si Evan kanunayng mobati og kalipay kon moserbisyo siya, mao nga nakahukom siya nga magtigom og jelly aron idonar. Naghimo siya og bidyo aron mohangyo og tabang sa iyang mga silingan usab.

“Kon gusto kamong motabang, pwede ninyong ihatod ang jelly sa akong balay. O pwedeng kwarta ang inyong ipadala, ug ako ang mopalit sa jelly para ninyo!” Miingon si Evan samtang si Ethan ang nag-bidyo.

Sa nahuman sa sila sa pag-bidyo, gi-edit ni Evan ang bidyo hangtod nga husto na kini nga ipakigbahin. Human nga ma-post ni Mama ang bidyo diha sa online, ang mga tawo nagsugod sa paghatag og jelly ug pagpadala og kwarta nga ipalit og mas daghan pa!

Didto sa tindahan, gikarga ni Evan ang mga ginarapon nga jelly ngadto sa cart. “Mas makalingaw pa unta kon duna pay mas daghang bata,” miingon siya. “Tingali ang mga bata sa akong eskwelahan makatabang.”

“Nindot nga ideya,” miingon iyang Mamá.

Pagkasunod adlaw sa eskwelahan, mihangyo si Evan nga makigkita sa Principal nga si Sanchez. Gipasabot niya ang ideya sa pagkolekta og jelly alang sa food pantry.

“Mahimo kini nga sama sa usa ka dula,” miingon si Evan. “Pweding tawagon nato kini og Gubat-gubat sa Jelly.”

“Nindot kaayo kana nga plano!” miingon si Principal Sanchez.

Naghimo si Evan og espesyal nga mga sulat sa pagpahibalo [flyers] nga ipanghatag ngadto sa tanang taga-grade four aron ingnon sila bahin sa Gubat-gubat sa Jelly.

Pagkasunod semana, ang tibuok grade four nagsangka sa Gubat-gubat sa Jelly. Ang matag klase naningkamot nga makadala sa labing daghang ginarapon sa jelly.

Sa tingpaniudto, ang tanan mahinamon kaaayo mahitungod sa Gubat-gubat sa Jelly. “Wala pa gayod ko kasuway og ing-ani nga sangka,” miingon ang higala ni Evan nga si Maria. “Unta ang akong klase maoy modaog.”

“Sa akong tan-aw ang akong klase ang modaog!” miingon ang ilang higala nga si Isaac. “Nagdala ko og tulo ka garapon karon.”

Gibantayan ni Evan ang mga kahon sa donasyon sa matag klasrom nga nagsugod sa pagkapuno og mga garapon.

Pagka-recess, nagkalot si Evan sa balas kauban sa iyang higala nga si Gabe. “Nagdala na ba ka og mga garapon sa jelly?” nangutana siya.

“Ang akong papa mihatag nako og lima aron idonar! Gibutang ko kini sa kahon ganinang buntag,” miingon si Gabe.

“Wow!” Dili makatuo si Evan sa kadaghang mga bata nga miapil sa Gubat-gubat sa Jelly.

Wala madugay ang mga kahon sa jelly nagsugod sa pagkapuno. Ang tanang grade four ug mga titser nagpundok sa usa ka klasrom aron maminaw ni Evan nga mopahibalo sa mga mananaog sa Gubat-gubat sa Jelly.

“Tanan nakakolekta kami og 200 ka garapon sa jelly!” miingon si Evan. Mihugyaw ang mga bata.

“Ang tanan nakahimo og maayo gayod, apan usa lang ka klase ang mahimong mananaog,” mipadayon si Evan.

Ang tanan naghinam-hinam nga makadungog kon kinsay modaog.

“Ang klase ni Mrs. Child maoy mananaog!”

Ang mga bata sa klase ni Mrs. Child naglukso-lukso ug namakpak.

Human sa klase, nagkita si Evan sa iyang mga higala aron manglakaw pauli.

“Ang akong klase wala makadaog, apan nalipay lang ko nga nakahimo ko sa pagtabang sa ubang tawo,” miingon si Maria.

“Ako pod,” miingon si Evan. “Kinsay nasayod nga ang gagmayng bata makahimo diay og ingon ana ka dakong kalainan?”

Dili na makahulat si Evan nga dad-on ang tanang jelly ngadto sa food pantry. Gibati niya ang kainit sa sulod dihang naghunahuna siya sa tanang tawo nga makadawat sa mga pagkaon tungod sa ilang mga donasyon.

Labaw sa tanan, nasayod siya nga iyang nasunod si Jesukristo pinaagi sa pagtabang sa uban. Gusto ni Evan nga mobati niini nga paagi sa tanang panahon.

“Uy, Ma,” miingon siya dihang nauli siya sa balay. “Kanus-a ta makahimo sa atong sunod nga service project?”

Ablihan ang PDF

Paghulagway pinaagi ni Minna Miná. Mahimong kopyahon alang sa Simbahan nga paggamit lamang.