“5 ka Paagi sa Paghigugma Sama sa Gibuhat ni Jesus,” Higala, Abr. 2026, 26–27.

5 ka Paagi sa Paghigugma Sama sa Gibuhat ni Jesus

Usa sa kataposang mga butang nga gisulti ni Jesukristo ngadto sa Iyang mga higala sa wala pa ang Iyang Pag-ula mao ang “maingon nga ako nahigugma kaninyo, … paghigugmaay kamo” (Juan 13:34). Kana nga sugo alang usab kanato! Ania ang lima ka paagi nga kamo makahigugma sa uban sama sa Iyang gihimo.

Higugmaa ang Imong Silingan

Paghulagway sa usa ka batang lalaki ug babaye nga magkaubang nanglimpyo sa bintana

Ang Manluluwas nagtudlo nga ang unang duha ka sugo mao ang higugmaa ang Dios ug higugmaa ang imong silingan sama sa imong kaugalingon (tan-awa sa Mateo 22:37–40). Kinsa ang imong silingan? Ang tanan!

Kon maningkamot kamo nga mas mohigugma sa usa ka tawo, hinumdomi si Jesus. Sulayi sila sa paghunahuna isip usa ka anak sa Dios ug tagda sila kon unsay imong gustong paagi nga ikaw tagdon.

Higugmaa ang Imong mga Kaaway

Paghulagway sa usa ka batang babaye nga nagluhod sa pag-ampo nga dunay hunahuna nga porma og bula sa usa ka batang lalaki nga nagtukmod kaniya

Gitugyan ni Jesukristo ang Iyang kinabuhi alang sa tanan, bisan sa mga tawo nga may kayugot Kaniya. Gipakita gayod Niya ang labing dako nga gugma.

Kon dunay tawo nga lahi og tratar kanimo, hinumdomi si Jesus. Makabarog ka sa imong kaugalingon sa mabinationg paagi o makahangyo og kasaligan nga hamtong alang sa tabang. Sulayi ang pagpahiyom niana nga tawo o sa pag-ampo alang kanila. Tingali dili sila mausab, apan ang pagpakita og gugma mousab sa imong kasingkasing.

Higugmaa ang mga Tawo Kinsa Mibati nga Walay Mitagad

Paghulagway sa batang babaye nga Nagtunol og usa ka bola sa basketball ngadto sa batang lalaki

Nasayod ba ka nga si Jesukristo migahin og daghan sa Iyang panahon ngadto sa mga tawo nga gisalikway sa uban? Daghang sugilanon diha sa Biblia nga nagsugilon kon giunsa Niya sa pagtabang ang mga makasasala ug sa paghunong aron motambal sa mga sinakliway.

Kon makakita ka og usa ka tawo nga tingali mibati nga walay labot, hinumdomi si Jesus. Sulayi ang pagpakigsulti kanila, pagdapit kanila sa pagpakigdula, o sa pagpaminaw kanila.

Higugmaa ang mga Tawo Kinsa Nagkinahanglan og Kahupayan

Paghulagway sa usa ka batang lalaki nga naglingkod kauban sa masulub-on nga batang babaye

Dihang ang higala sa Manluluwas nga si Lazaro namatay, mihilak Siya kauban sa igsoong mga babaye ni Lazaro—bisan og Iya nang buhion si Lazaro gikan sa pagkamatay! (Tan-awa sa Juan 11:32–36.) Mipakita Siya og gugma pinaagi sa paggahin og panahon nga magmasulub-on kauban sa mga tawo nga nagsubo, dili lamang sa pagsulay og sulbad sa ilang problema.

Kon dunay tawo nga nagsubo, hinumdomi si Jesus. Sulayi lang sa paglingkod uban nila, paggakos, o pagsulat og mabination nga mugbong sulat.

Higugmaa ang mga Tawo Kinsa Nagkinahanglan sa Iyang Tabang

Paghulagway sa batang babaye nga naa sa wheelchair nga naghatag og makaon ngadto sa batang lalaki nga dunay banting [sling] ang iyang bukton

Giayo ni Jesukristo ang masakiton ug kadtong mga nanginahanglan. Siya miayo usab og mga tawo gikan sa sala pinaagi sa paghinulsol. Tingali dili kita makaayo sama sa Iyang gihimo, apan makatabang gihapon kita sa Iyang buhat sa pagpang-ayo kon moserbisyo kita sa uban.

Kon dunay tawo nga nagkinahanglan og tabang, hinumdomi si Jesus—ug nga tanan kita nagkinahanglan sa Iyang tabang. Sulayi sa paghunahuna ang labing maayo nga paagi sa pagserbisyo kanila ug paghigugma kanila.