« Te fa’a’itera’a i te parau ’āpī maita’i », Hoa, Māti 2026, 36–37.

Te fa’a’itera’a i te parau ’āpī maita’i

Nā Kelvin Njenga

E ’ā’amu mau nō Kēnia mai.

Fa’ahōho’ara’a nō te mau tumu vī, te mau fare tei tāpo’ihia i te ’āretu ’e te hō’ē vahine e hōro’a ra i te hō’ē mereti mā’a i te hō’ē tamaiti ’āpī.

I te hō’ē sābati Pāsa māramarama, ’ua ara ’oi’oi Ryan ’e ’ua horo atu i te fare tūtu. E nehenehe ’oia e hau’a i te ha’ari ’e te mau rā’au no’ano’a nā roto mai i te mahamri tā tōna māma e hāmani ra. ’Ua ’amu mai Ryan i te hō’ē tuha’a o te hō’ē faraoa iti porotoru monamona ’e te mārū maita’i. « Māmā ! E Pāsa teie ! E nehenehe tātou e māta’ita’i i te hōho’a nō Iesu i teie mahana ? » ’ua ui atu ’oia ma te mata ’ata’ata rahi.

’Ua hi’o atu māmā iāna ’e ’ua ’ata’ata. « ’Oia mau ! »

’Ua horo atu te teina o Ryan, ’o Liam, i rāpae ’a pārahi noa ai māmā ’e ’o Ryan i raro nō te māta’ita’i i te hōho’a teata.

Fa’ahōho’ara’a nō te vahine ’e te tamaiti e pārahi ’āmui ra ’e e māta’ita’i ra i te ’āfata teata

’Ua ’ite rāua ia Iesu Mesia i te ravera’a i te mau temeio ’e te tāvinira’a i te ta’ata. I muri iho, i te ha’amāuiuira’a te ta’ata ia Iesu, ’ua ’ī te mata o Ryan i te roimata.

« Māmā, nō te aha rātou i rave ai i te reira ia Iesu ? » ’ua ui atu ’oia ma te ’oto.

« ’Ua mā’iti ’oia e māuiui nō tātou », ’ua parau māmā. « ’Ua here rahi mau ’oia ia tātou, e Ryan. ’Ua pohe ’oia ’ia nehenehe ia tātou ’ia ora fa’ahou ».

I te fa’a’itera’a te hōho’a teata i te ti’afa’ahoura’a o Iesu Mesia, ’ua ’ata’ata Ryan. « ’A hi’o na, e māmā ! ’Ua ora fa’ahou ’oia ! »

« E parau mau », ’ua parau māmā. « ’Ua ti’afa’ahou ’oia ! Mai tā te melahi i parau i roto i te Bibilia ».

I muri a’e, ’ua haere atu Ryan i rāpae’au e ha’uti. ’Ua ’ite atu ’oia ia Liam i te ha’utira’a i te mau rā’au i raro a’e i te tumu vī.

Fa’ahōho’ara’a nō te tamaiti e haere ra i pīha’i iho i tōna teina, e pārahi ra i raro a’e i te hō’ē tumu vī

« Liam ! Tē hina’aro nei au e fa’ati’a ia ’oe i te hō’ē ’ā’amu au roa », ’ua parau Ryan.

’Ua tīa’i Liam ’ia pārahi Ryan i raro a’e i te tumu vī. « Nō ni’a te reira i te mau pere’o’o uira ? »

« ’Aita. E mea maita’i atu ā ! », ’ua parau Ryan. « Nō ni’a ia Iesu. ’Ua pohe ’oia, terā rā i muri iho, ’ua ora fa’ahou mai ’oia ».

« E parau mau ? » ’Ua ui atu Liam.

« ’Ē ! ’Ua parau te hō’ē melahi ē, ‘’aore ’oia i’ō nei, ’ua ti’afa’ahou a’enei ïa !’ Te aura’a o te reira, e nehenehe tātou e ora fa’ahou ato’a ».

« Wow! » ’Ua parau Liam. « E mea pūai mau Iesu ».

’Ua fa’ari’i Ryan. ’Ua feruri ʼoia i te here rahi mau o Iesu nōna. ’Ua fa’a’ī te reira i tōna ’ā’au i te ’oa’oa. ’Ua fa’a’ite atu ’oia i te parau ’āpī maita’i i tōna ’utuāfare, ’e ’o tei fa’ariro i tāna Pāsa e mea ta’a ’ē atu ā.

E piti tamāroa e pārahi ra i raro a’e i te hō’ē tumu vī