Te hepetoma mo’a o Mia

’Ua tai’o māmā ’e ’o pāpā i te ’ā’amu o te Sābati o te ’āma’a tāmara i roto i te pāpa’ira’a mo’a. I tō Iesu Mesia tomora’a i Ierusalema, ’ua tāhiri te mau ta’ata i te mau ’āma’a tāmara ’e ’ua pi’i, « Hosana ! »

Tē tāpe’a ra tō’u tuahine ’o Lucy i te hō’ē hōho’a nō Iesu i ni’a i te hō’ē ’āsini. Te toe’a o mātou ’ua tāhiri i tā mātou mau ’āma’a tāmara ’api parau. ’Ua ’oa’oa roa vau i te ferurira’a ē, tē fa’ari’i poupou nei au ia Iesu.

’Ua riri Iesu i te ho’ora’a te ta’ata i te mau tao’a i roto i te hiero, nō reira ’ua tīahi ’oia ia rātou i rāpae. ’Ua ’ohi mātou i te mau pehu nā rāpae ’ati a’e te fare purera’a. Tē ’oa’oa nei au i tō mātou tauturura’a i te ’atu’atu i te fare o te Atua !

’Ua tai’o māmā i te mau ’ā’amu ’o tā Iesu Mesia i fa’ati’a i te mau ta’ata. ’Ua fa’aro’o mātou ’e ’ua fa’a’ohipa i te repo ’araea nō te hāmani i te mau tao’a nō roto mai i te mau ’ā’amu. ’Ua hāmani Lucy i te hō’ē māmoe nō te mea ’o Iesu te tīa’i māmoe maita’i. ’Ua hāmani au i te hō’ē mōrī hinu iti. ’Ua tauturu te reira iā’u ’ia ha’amana’o ’ia tāpe’a i tō’u ’ā’au ’ia ’ī noa i te fa’aro’o.

’Ua fa’ati’a pāpā ia mātou mea nāhea Maria i te hōro’ara’a nā Iesu Mesia i te hō’ē hinu ta’a ’ē nō tōna ’āvae. ’Ua fa’a’ī tōna no’ano’a i te fare tā’āto’a.

’Aita tā mātou i te reira hinu ta’a ’ē. ’Ei mono, ’ua fa’a’ohipa mātou i te tīnamo nō te hāmani i te hō’ē mā’a monamona. ’Ua parau māmā ē, ’ia hau’a ana’e mātou i te no’ano’a o te tīnamo i te taime tunura’a, e ti’a ia mātou e feruri i te mea tā mātou e nehenehe e hōro’a nā Iesu.

’Ua tūtu’i mātou i te mau mori hinu ’e ’ua hīmene i te hō’ē hīmene, mai tā Iesu Mesia ’e tāna mau pipi i hīmene i te tāmā’ara’a hope’a. ’Ua ’amu mātou i te faraoa pita ’e ’ua inu i te pape vine nō te ha’amana’o i te ’ōro’a mo’a mātāmua. Tē vai ato’a tā mātou te mau rēmuna nō te fa’aha’amana’o ia mātou i te toto o Iesu, ’e te mau ’ōlive nō te ’ō nō Getesemane.

’A ’amu noa ai mātou, tē haruru ra te pātiri i rāpae. ’Ua putapū vau i te pārurura’a ’e te māuruuru i te ’itera’a ē, ’ua fa’aruru a’ena Iesu i te pōiri ta’o roa o te mau vero.

’Ua tai’o mātou mea nāhea Iesu Mesia i te pohera’a nō mātou. I muri iho, ’ua ’āfa’i atu mātou i te fāri’i tiare pau i rāpae i roto i te ’āua ’e ’ua fa’atī’opa i te pae ’ao’ao, mai te hō’ē mēnema. ’Ua tāpo’i mātou i te repo ’e te mau ’ōfafa’i nā te hiti, ’ua vaiiho rā mātou i te ’ūputa ’ia matara noa. ’Ua hōro’a mai māmā i te hō’ē pēpe ha’avare nō te fa’ahōho’a i te tino o Iesu. ’Ua pū’ohu mātou i te reira ma te tura i roto i te hō’ē ’ahu ’uo’uo ’e ’ua tu’u atu i roto i te fāri’i tiare.

Noa atu pa’i e fāri’i tiare noa te reira, ’ua ’oto vau i te tāpo’ira’ahia te ’ūputa i te hō’ē ’ōfa’i.

’Ua parau māmā ē i muri mai te pohera’a o Iesu Mesia, ’ua fa’anaho ’oia i te ’ohipa misiōnare i roto i te ao vārua. I reira, te mau ta’ata tei ’ore i ha’api’i mai i tāna ’evanelia i te fenua nei, e nehenehe ā rātou e ha’api’i mai nō ni’a iāna. I roto i te mau hiero, e nehenehe mātou ’ia bāpetizohia nō te feiā tei ’ore i bāpetizohia hou rātou ’a pohe ai.

’Aita vau ’e ’o Lucy i rae’ahia te matahiti nō te tomo atu i roto i te hiero, ’ua tauturu rā māua i te tāpūpū i te mau tāreta i’oa i nene’ihia. ’Ua rave māmā ’e ’o pāpā i te ’ohipa hiero te tahi i muri mai i te tahi, nō te mau ta’ata i ni’a i te mau tāreta ’e ’ua ori haere mātou nā roto i te ’āua hiero. I rāpae’au ato’a, e ha’aputapū mai te hiero mai te hō’ē tuha’a o te ra’i.

I te po’ipo’i Pāsa, ’ua mo’e ’ē te ’ōfa’i i mua i te fāri’i tiare ’e ’aita e ’ahu i roto. Tē vai ra te hō’ē tāreta e parau ra, ’Ua ti’afa’ahou ’oia !

’Ua ’ite a’ena vau ē, ’o Iesu Mesia te tumu nō te Pāsa. I muri a’e i te fa’ahanahanara’a i te hepetoma mo’a, e au ra iā’u ’ua mātau ri’i a’e vau iāna.